Четири од шест натпревари од 14-то коло во Првата македонска фудбалска лига не се одиграа. Причина е бојкотот на дел од прволигашките екипи кои вчера неофицијално го најавија како одговор на според нив нелегитимниот реизбор на претседателот на ФФМ Харалампие Хаџи-Ристески

Натпреварите Милано – Пелистер, Металург – Хоризонт Турново, Слога Југомагнат – Силекс и Вардар – Македонија ЃП не започнаа во предвидениот термин во 13 часот. Во недела се одиграа само две средби: Победа – Тетекс 2:0 и Ренова – Работнички 2:0.Во соопштението до јавноста потпишано од екипите на Македонија ЃП, Слога Југомагнат, Пелистер и Хоризонт Турново, клубовите најавуваат „бојкот на првенство се’ до моментот на исполнување на нивните барања“.Екипите бараат ново Изборно собрание, сметајќи дека вчерашното е нелегитимно, поради грубото кршење на Статутот на фудбалската федерација, формирање на Здружение на екипите во прволигашката и второлигашката конкуренција, како и нивна партиципација во давањето делегати кои ќе учествуваат во работата на Собранието на ФФМ.Претставниците на четирите клубови на денешната средба со претставницте на медиумите најавија и приклучување на уште неколку прволигашки екипи на нивното барање.Веднаш по добивањето на третиот мандат на чело на ФФМ, Харлампие Хаџи-Ристески во саботата беше запрашан како ќе одговори Федерацијата доколку навистина се случи бојкот од некои екипи, а тој одговори дека не очекува такво нешто.„Не очекувам да се случи такво нешто, иако слушам такви гласини. Треба да се прифати во спортски дух исходот од Изборното собрание. Планот за бојкот на мојата опозиција е за да го наруши ритмот на натпреварување. ФФМ е подготвена на секакви инсинуации. Во Статутот се предвидени такви случувања и ако се случи такво нешто, органите ќе постапат по Статутот и никако поинаку“, изјави по неговиот повторен избор Хаџи-Ристески.