Акцијата „Заедно за чисто и зелено Скопје“ денеска продолжи во општината Шуто Оризари со големо чистење на Спортскиот центар кој се наоѓа во близина на општинските бараки

Почетокот на  акцијата за чистење го означија скопскиот градоначалник Коце Трајановски и градоначалникот на општината Шуто Оризари, Елвис Бајрам.„Акцијата за почисто Скопје во наредните три дена продолжува во општината Шуто Оризари. Со градоначалникот Бајрам се договоривме  општината да обезбеди бунари за техничка вода за овој простор постојано да биде зелен, а Градот Скопје ќе донира клупи и корпи за отпадоци. Во овој центар граѓаните на Шуто Оризари ќе може да се рекреираат и да се одмораат во летните горештини. Во акцијата за чистење се вклучени сите јавни претпријатија, ќе се крпат ударните дупки, ќе се средува зеленилото и ќе се расчистуваат дивите депонии кои во оваа општина, за жал, ги има во поголем број. Се надевам дека во соработка со општината и со јавните претпријатија општината Шуто Оризари ќе ја направиме да биде пристојно место за живеење. Моја порака до граѓаните на Скопје е секој да придонесе за почисто и зелено Скопје. Чисто Скопје е обврска на секој жител на нашиот град. Со овие акции сакаме да дадеме порака дека сериозно ќе се зафатиме со решавање на овој проблем. На Координативното тело на градоначалници се договоривме да вработиме што поголем број комунални редари кои ќе ги казнуваат сите граѓани кои нема да се придржуваат кон Одлуката за комунален ред. Само така ќе успееме Скопје да го направиме зелено и чисто“, рече на стартот на денешната акција градоначалникот Коце Трајановски.Градоначалникот на општината Шуто Оризари, Елвис Бајрам, смета дека за три дена не може комплетно да се исчисти општината, но се надева дека со дополнителните вработувања кои ќе се остварат преку Агенцијата за вработување оваа општина ќе стане чиста и зелена. Акцијата за чисто и зелено Скопје од наредната недела продолжува во Општината Сарај.