Европа
Меркел смета дека има волја за договор со Британија и со Турција
Челниците на Европската унија „имаат волја“ да постигнат договор за тоа како да се помогне Велика Британија да остане во Унијата, иако постигнувањето на договорот ќе биде тешко за многу земји, изјави германската канцеларка Ангела Меркел.
„Желбата постои Британија да остане членка на Европската унија. Се покажува дека договорот нема да биде лесен за сите, но волјата постои“, изјави германската канцеларка Ангела Меркел во петокот утрото.
По повеќечасовните преговори, Меркел изјави дека земјите членки застанале зад заедничкиот европско-турски план за ограничување на бројот на имигрантите во Европа.
„Важно е дека денеска не само што го потврдивме акцискиот план ЕУ-Турција, туку кажавме дека тој е и наш приоритет“, изјави германската канцеларка за новинарите, говорејќи за планот за заштита на европските надворешни граници, намалување на бројот на бегалците и борбата против нелегалната миграција.
Меркел додаде дека Австрија го поддржува планот ЕУ-Турција, и покрај едностраната одлука да воведе дневен лимит за мигрантите „Во Европа, ни секогаш сме партнери“, додаде.
Самитот на ЕУ, кој започна во четвртокот а продолжува во петокот, а на кој главни теми се имиргантската криза и прашањето за излегување или останување на Велика Британија од Унијата, би можело да трае и подолго од предвиденото, изјави за новинарите ирскиот премиер Енда Кени. „Би можело да трае и подолго“, изјави напуштајќи ја зградата во којашто се одржува самитот, мислејќи во прв ред на договорот околу условите за членство на Британија во ЕУ.
Претседателот на Европскиот совет, Доналд Туск, има намера да го претстави нацрт договорот на сите членки околу пладне. И самиот Туск вели дека „засега е постигнат напредок но дека уште многу работи остануваат да се направат,
Италијанскиот премиер Матео Ренци, пак, изјави дека сега сепак е помалку оптимист околу договорот за Британија, отколку кога пристигнал на самитот.
Најтешкото прашање од можниот договор со Лондон останува она кое се однесува на надоместокот за децата на небританските работници, кои не живат со родителите во Велика Британија. Се предлага надоместоците за таквите деца да се индексираат според стандардите на земјите во кои живеат, а не според британскиот стандард, Кај ова прашање дел од земјите не сакаат тоа да се применува ретроактивно, односно за децата на работниците кои веќе работат на Островот, туку само за новодојдените работници или новородените деца на работниците од другите земји членки кои работат во Велика Британија.
Нерешено е и прашањето на периодот на кој би се ограничиле социјалните надоместоци за новодојдените работници. Иако претходно се споменуваше можноста на новодојдените работници да им се ограничи правото на социјалниот надомест во првите четири години од работењето во Велика Британија, неофицијално се дознава дека британскиот премиер Дејвид Камерон го заострил своето барање бара таквите ограничувања да се овозможат на период од вкупно 13 години – во првите седум години, а потоа да може да се продолжува двапати по три години.
Останати се за преговори за уште неколку нерешени прашања, кои се сметаат за полесни од претходните две. Камерон изјави по доаѓањето во Брисел дека сака „веродостоен договор“ за да може да ги убеди своите сограѓани на референдумот да гласаат за останување во Европската унија./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.
Европа
Во Англија извикал „Алах Акбар“ и убил случаен минувач: „Го направив тоа за луѓето од Газа“
45-годишниот Ахмед Алид вчера беше прогласен за виновен за убиство и обид за убиство. На 15 октомври минатата година, барател на азил од Мароко со нож го уби 70-годишниот Теренс Карни во центарот на англискиот град Хартлпул. Тој претходно го избодел со нож својот заспан цимер Џавед Нури додека викал „Алах Акбар“.
Алид и рекол на полицијата дека сето тоа го направил „за луѓето од Газа“. Само осум дена пред да убие случаен минувач и да го рани својот цимер, милитантите на Хамас го нападнаа Израел. Алид се заколнал дека ќе убиел повеќе луѓе доколку имал митралез и друго оружје, изјави обвинителот Џонатан Сендифорд во Судот во Тесајд.
Алид делел куќа со други баратели на азил во североисточна Англија. Тој бил вознемирен што Нури го прифатил христијанството. Цимерите рекле дека Алид почнал да носи нож откако на телевизија видел прилог за настаните во Газа.
Европа
Крим главна цел: Пентагон откри за што Украина ќе ги користи моќните ракети АТАКМС
Министерството за одбрана на САД ја појасни целта за испорака на ракети со долг дострел во Украина, кои неодамна беа испорачани во тајност. Како што објави „Њујорк тајмс“, целта на испораката на американските ракети АТАКМС е да се зголеми притисокот врз Крим, кој беше анектиран од Русија по референдумот во 2014 година.
Крим го претставува центарот во кој се лоцирани голем број руски воздушни и копнени сили и кој досега, како што пишува американскиот дневен весник, „за нив бил релативно безбедно засолниште“. Ова го тврди анонимен американски функционер. Сепак, Пентагон одби да каже колку точно од овие проектили со дострел од 300 километри се испорачани на украинската страна.
Советникот за национална безбедност на Белата куќа, Џејк Саливан, претходно ја потврди испораката на овие ракети без да прецизира дали тие се модифицирани и имаат зголемен дострел.
Украинските сили веќе употребија АТАКМС, што претседателот Володимир Зеленски го потврди на 17 април, објавувајќи дека бил извршен напад врз воздухопловната база Џанкој, која се наоѓа на 165 километри од линијата на фронтот. Министерството за одбрана на Руската Федерација не ги коментираше овие наводи.
Pentagon reveals Ukraine’s targets for ATACMS missiles – NYT — (the usual baffling lack of retaliation threats from #Putin– instead just the usual bleating that ‘it’s impossible to justify’..Bring Stalin back to life please, Russia) https://t.co/8pi0Lx8tbt #CapeTown #SouthAfrica pic.twitter.com/ZtI5cG3r2m
— Peter Mayson (@theforeverman) April 26, 2024
Американскиот дневен весник потсетува дека Украина првпат добила ракети АТАКМС во септември минатата година, но дека станува збор за верзија со половина дострел. Се шпекулираше дека Украина можеби користела американски ракети за да го урне кримскиот мост, што на почетокот на месецов го потврди и самиот претседател Зеленски, велејќи дека неговата влада „навистина сака да го уништи мостот на Крим“.
Тој е симбол на руската окупација и преку овој мост Русија испорачува воена опрема и ги снабдува војниците во Украина. Во неколку наврати досега мостот беше цел на украински напади.
– Мислам дека е вистинското време, а шефот (Бајден) донесе одлука дека е вистинско време да и го обезбеди на Украина оружјето неопходно за тековната борба. Тоа е добро осмислена и многу конструктивна одлука – изјави адмирал Кристофер Грејди, заменик командант на Здружениот генералштаб на американската армија.
Руската страна го осуди потегот на САД, а рускиот амбасадор во Вашингтон Анатолиј Антонов рече дека тоа „ја зголемува заканата за безбедноста на Крим, вклучително и Севастопол и другите руски градови“.