Управата за јавни приходи не ја испочитувала процедурата при изготвувањето

на решението за поранешниот министер за здравство, Владо Димов, кој се товари

за затајување данок во вкупна вредност од околу 780 илјади евра

Управата за јавни приходи не ја испочитувала процедурата при изготвувањето

на решението за поранешниот министер за здравство, Владо Димов, кој се товари

за затајување данок во вкупна вредност од околу 780 илјади евра. Правниот

полномошник на Димов, познатиот адвокат Јово Трпеноски, кој во минатиот состав

на Антикорупциската комисија беше нејзин член, а своевремено и јавен обвинител,

вели дека УЈП не им го врачила решението за плаќање данок, како и дека поканата

за распит сопругата на Димов ја примила со еден ден задоцнување од закажаниот

термин. Од УЈП нагласуваат дека на нивните решенија, Димов, како и секоја друга

странка, има право на жалба, а доколку не се задоволни од одлуките на

даночниците, можат да се жалат и до Второстепената комисија при Министерството

за финансии. Иако не е јасно како ќе може да се упати жалба на решение што не е

примено.

Трпеноски вели дека на Димов му се заканува одземање на имотот без да се

испочитуваат правните процедури, како и дека има докази за изворите на приходи

на неговиот штитеник. Тој објаснува дека Димов, како и секој функционер, треба

да пополни анкетен лист за неговата имотна состојба и за неговото потесно

семејство и, доколку има измена, таа треба да се пријави во рок од 30 дена. Во

случајот со Димов немало промени во двата анкетни листа што се поднесуваат на

почетокот и по завршување на функцијата. „Овие податоци ги испитува

Антикорупциската комисија, која доколку констатира неправилности, пред да го

пријави случајот во УЈП, треба да го повика подносителот на пријавата на

распит. Тоа не е сторено“, вели Трпеноски, додавајќи дека, наместо покана за

распит, веднаш се носи решение со казнени мерки. Според Трпеноски, поканата за

распит била испратена по пошта, а сопругата на Димов ја примила на 5 јуни,

додека распитот бил закажан еден ден претходно, односно на 4 јуни. На поканата

било посочено дека во случај на отсуство или доколку повиканиот не може да

дојде, треба да се пријави тоа на одреден телефон. Полномошникот Трпеновски се

јавувал три дена едноподруго на посочениот телефон за да ги извести надлежните

дека Димов има платено отсуство од една година, што тече од септември 2006

година, за што од Клиниката за дигестивна хирургија има решение. Меѓутоа, на

телефонот никој не одговарал, па Трпеноски на 7 јуни лично го доставил

известувањето до УЈП со укажување ако треба комуникација со Димов, таа ќе се

одвива преку него како полномошник. Не им била дадена никаква можност да се

презентираат документите, туку веднаш било изготвено решение, за кое во

јавноста се шири дека е доставено, што, според Трпеноски, не е точно. Затоа,

смета Трпеноски, ова е атака врз личноста на Димов.

Од УЈП појаснуваат дека износот за кој се товари Димов, даночниците го

пресметале врз основа на проверката на поднесената годишна даночна пријава за

персонален данок на доход. Според постојната практика, откако ќе се испрати

решението, се оставаат три дена рок за негово примање, а потоа течат 15 дена за

одговор. УЈП првично отвори шеесетина постапки за неплатен данок, но, како што

појаснуваат од оваа институција, секој од овие предмети отворил нови три или

четири случаи кои биле поврзани со постојните. Данок од 140 илјади евра плати

кардиологот Борче Петровски. УЈП побарува данок и од судијката Снежана

Попчевска и од градоначалничката Виолета Аларова, кои поднеле жалби, но тие не

биле прифатени.

Имотната состојба на Димов уште пред две недели беше јавно објавена во

Собранието, кога пратеникот Влатко Ѓорчев од ВМРО-ДПМНЕ ја процени на два

милиона евра. Ѓорчев праша дали е точно тоа дека Димов има депозит од околу 400

илјади евра во Ситибанк во Грција, 33 илјади долари во банка во Виена и 18

илјади евра во Комерцијална банка. Од пратеничкото прашање произлегува дека

Димов располага со имот од 6.790 квадратни метри во Нерези, проценет на 135

илјади евра, четири стана во Скопје,.удел во фирмата „Бусамак“ ДОО од 168

илјади евра, како и побарувања од едно физичко и едно правно лице од вкупно 190

илјади евра.