Во Фондот за здравствено осигурување денеска беше промовирана кампањата „Нема повеќе трчање по шалтери“, откако по стапувањето на сила на Законот за општа управна постапка, се овозможи граѓаните да добијат потребен документ, без да носат други документи.

Министерот за информатичко општество и јавна администрација Иво Ивановски и директорот на ФЗОМ, Маја Парнаџиева – Змејковска го промовираа проектот, а група волонтери делеа флаери на осигурениците на кои беше објаснета целата постапка.

Целта на кампањата е да се запознаат подобро граѓаните кои се нивните права, доколку некоја институција или вработен во институцијата ги одбие да ги прибави потребните документи по службена должност.

Фондот најпрво се ослободил од барање непотребни документи, па така од досега бараните 54 документи за различни документи што ги издава ФЗОМ, сега се потреби половина од нив, од кои дел се обезбедуваат електронски, а дел ќе се набавуваат по службена должност.

„За сите 20 видови барања, вкупно 54 документи сме барале од други институции, а во моментот тој број е преполовен, бидејќи сите документи коишто ни биле потребни од Управа за јавни приходи, од Пензискиот фонд и од Агенцијата за вработување ги укинуваме како непотребни и истите ги обезбедуваме електронски“, вели Маја Парнаџиева – Змејковска, директор на ФЗОМ.

Таа појасни дека сите документи коишто останале како задолжителни да се обезбедуваат во прилог на барањето на граѓанинот во писмен формат и коишто се уште институциите не можат електронски да им ги обезбедат, ФЗОМ ги обезбедува преку комуникација со институциите.

Граѓанинот ќе треба да поднесе само барање за одредена постапка, или да достави отпусни писма, фискални сметки во зависност од барањата.

„Со оваа мерка очекуваме дека конкретно во ФЗОМ 40.000 баратели на услуги годишно нема да одат на повеќе шалтери. Денеска правиме една мала кампања, почнуваме од Фондот за здравствено осигурување, од подрачната единица затоа што ФЗОМ е една од трите институции кои нудат најмногу услуги и имаат најмногу посетители годишно“, рече министерот Ивановски.

По службена должност ФЗОМ ќе бара Изводи од матична книга на родени и документи од Министерството за труд и социјална политика за одредени специфични категории осигуреници.

„За прв пат како Фонд во име на граѓаните ќе обезбедуваме и документи за лекување во странство, односно фактури во комуникација со странство со болниците од другите држави како и од лекарските комисии коишто нема да бидат потребни граѓанинот да ги носи со себе“, рече Парнаџиева – Змејковска.

Се планира во наредните неколку месеци да се воведе електронско доставување на барањата од граѓаните, па не само што воопшто нема да носат документи, туку нема да има потреба да доаѓаат во Фондот./крај/мф/бб