Петнаесетгодишен средношколец е притворен во средата во местото Бунјан, во централна Турција, поради навредување на претседателот Реџеп Тајип Ердоган, пишуваат во четвртокот турските медиуми.

Малолетникот чиј идентитет според прописите е означен со иницијалите У.Е., бил уапсен пред интернет кафе и приведен во полициска станица, каде бил задржан во текот на ноќта, пренесува AFP повикувајќи се на локалната aгенција Cihan.

Најавено е дека во четвртокот треба да биде изведен пред судот, кој може да го обвини или да го пушти на слобода со парична глоба.

Судското гонење на момчето е можно според членот 299 од турскиот кривичен закон, според кој секој кој му нанесува штета на угледот на претседателот може да биде казнет до 4 години затвор.

Случајот на друг малолетник, седумнаесетгодишник, кој е уапсен во својот клас и повеќе денови мина во притвор, поттикна жестока јавна полемика во Турција во декември мината година и критики за авторитарното свртување на актуелните турски власти предводени од исламско-конзервативната Партија на правдата и развојот (AKP). Второво момче за истото кривично дело е условно осудено на 11 месеци затвор.

Критичарите ја обвинуваат власта дека откако Реџеп Тајип Ердоган во август беше избран за претседател, по 11 години минати на должноста премиер на Турција, зачестиле прогоните поради навреди на шефот на државата, и оти особено цел се уметниците, новинарите, но и обичните граѓани./крај/мф/сн

Извор: Reuters