Генералниот секретар на Интерпол, Роналд Нобл денеска изјави дека меѓународната полициска организација од Тајланд, до сега не добила барање за распишување потерница за поранешниот тајландски премиер, Таксин Шинаватра.

Генералниот секретар на Интерпол, Роналд Нобл денеска изјави дека меѓународната полициска организација од Тајланд, до сега не добила барање за распишување потерница за поранешниот тајландски премиер, Таксин Шинаватра.

„Ние мораме добро да размислиме, зошто тајландската влада бара да се издаде црвена потерница за кривично дело тероризам, за кое во таа земја е предвидено смртна казна. Ве уверувам дека ќе реагирам што е можно поскоро“, рече Нобл.

Судот во Тајланд во вторникот издаде налог за апсење на Таксин Шинаватра по обвиненијата за тероризам за наводна вмешаност во двомесечните демонстрации на неговите поддржувачи, во кои животот го загубија 88 лица.

Шинаватра деновиве престојуваше во Црна Гора, чие што државјанство и поседува.

Црногорскиот премиер Мило Ѓукановиќ во интервју за агенцијата Асошиејтед прес (АП) рече дека Црна Гора нема да го испорача поранешниот тајландски премиер, бидејќи нејзиниот устав го забранува тоа.

Но, Црна Гора, според зборовите на нејзиниот премиер, сака да го изведе Шинаватра пред суд ако добие доволно докази од Тајланд.

Ѓукановиќ рече дека Шинаватра во неколку наврати бил опоменат да не ја користи територијата на Црна Гора за активности кои ги поткопуваат владите на другите земји“.

Тајландските иследници тврдат дека поранешниот премиер Таксин Шинаватра, кој беше соборен од власта со воен удар без пролевање крв во 2006 година, помогнал во планирањето и финансирањето на антивладините протести на црвените кошули, според информациите од државната новинска агенција на земјата.

Адвокатот на Таксин излезе со соопштение во кое се тврди дека обвиненијата покажуваат дека сегашната влада предводена од премиерот Абхaсит Веџаџива нема легитимитет. „Режимот на Абхасит, кој ја има поддршката на армијата, ја изопачи правдата на тој начин што поведе обвинение што не ја почитува логиката, правото и секоја надеж за помирување“, изјави адвокатот Роберт Амстердам.

Од неговиот самонаметнат егзил во странство за да избегне судски процес по обвиненија за корупција, Таксин минатата недела изјави дека не е лидер на Обединетиот фронт за демократија, официјалното име на опозицијата, и дека нивното барање за распишување нови избори не е дадено во негово име.

Тој додаде дека владата има одговорност да го пронајде и судски да ги гони сите одговорни за какви било терористички акти. „Никогаш не сум се согласувал ниту сум одобрувал употреба на насилство“, изјави тој. „Верувам во мирот. Ја сакам својата земја исто колку и секој припадник на оваа влада. Верувам во мирни и ненасилни средства за окончување на конфликтот и се противам на секаква употреба на сила“./крај/бл/бд