Свет
Малиновски ќе го тужи Прчевски за клевета
Антикорупционерите ги оценуваат наводите на обвинителот за тенденциозни, паушални, недолични и субјективни
Антикорупционерите ги оценуваат наводите на обвинителот за тенденциозни, паушални, недолични и субјективни
Малиновски: Прчевски се обидува со дисквалификации да ја дефокусира јавноста од неповолните ефекти во борбата со корупцијата. Неговите обвинувања за конфликт на интереси се субјективни
Претседателот на Антикорупциската комисија ќе го тужи државниот јавен обвинител за клевета. Драган Малиновски вчера најави дека ќе поведе кривична постапка пред судот против Александар Прчевски, поради изречените обвинувања во парламентот за злоупотреба на функцијата. “Наместо да соработува, обвинителот се обидува со лични дисквалификации да ја дефокусира јавноста од неповолните ефекти во борбата со корупцијата. Неговите обвинувања за конфликт на интереси кај некои членови на Комисијата се тенденциозни, паушални и субјективни. Изјавите на Прчевски дека за одделни членови на Комисијата располага со докази оти сториле кривични дела, односно ја злоупотребиле својата службена должност, ги сфаќаме како директен притисок врз нашата работа”, изјави вчера првиот антикорупционер Малиновски. Во Комисијата коментираат дека нападот е најдобар начин за одбрана на неуспехот, во случајов поради немање разрешница во повеќе случаи кои ги иницирале тие, како, на пример, ОКТА, ?Фершпед”… Државната комисија за спречување на корупцијата очекува од Собранието да донесе соодветни ставови и оцени во расправата за годишните извештаи. Моментално пратеничките групи ги усогласуваат ставовите по барањето на обвинителот за одговорност од антикорупционерите.
Тројца претседатели на Државната комисија за спречување на корупцијата, Слаѓана Тасева, Јован Трпеновски и Драган Малиновски, во годишни извештаи и на прес-конференции секогаш го посочуваа Обвинителството како државен орган кој одбива да соработува. Конфликтот на релација антикорупционери-обвинител, кој тлееше речиси три години, избувна во директен судир завчера, кога јавниот обвинител, бранејќи го извештајот пред собраниското тело за политички систем, побара разрешување на тројца членови на Антикорупциската комисија – Малиновски, Трпеновски и Тасева. Причина, во нивниот случај бил утврден конфликт на интереси и злоупотреба на службената позиција. Прчевски ги обвини Трпеновски и Малиновски дека ги злоупотребиле материјалите од Обвинителството што ги добивале по службена должност, а потоа нив ги користеле да ги бранат обвинетите од нивните адвокатски канцеларии. Обвинителот тврди дека двајцата антикорупционери се интересирале за најмалку два предмета – едниот за подмитување, а другиот за кривична пријава за стечајна постапка во една фирма, за кои подоцна се јавувале како бранители на обвинетите.
?Додека бев претседател на Комисијата држев рамнотежа околу оцените за обвинителот, кој очигледно не може да сфати дека сме органи кои треба да соработуваат. Не сум изненаден од неоснованите напади на Прчевски, кој така сака да ги скрие сопствените слабости. Но, сум изненаден од неговото непознавање на кривично-материјалното и процесното право, како и од неинформираноста за состојбата во предметите по кои постапуваат пониските јавни обвинителства”, изјави вчера Јован Трпеновски, член на Антикорупциската комисија. Тој рече дека обвинителот не ги познава ниту одредбите од Законот за борба против корупцијата кои го регулираат конфликтот на интереси и дека покажува пренагласен субјективизам. ?Прчевски смета дека професионален адвокат не може да членува во Антикорупциската комисија. Ако е цврсто убеден во тоа, треба да предложи измени на Законот”, предлага Јован Трпеновски.
Тасева вчера не сакаше да ги коментира искажувањата на Прчевски кои за неа се недолични, неодмерени и непрофесионални. ?Ако обвинителот има докази за злоупотреба на функцијата од членовите на Антикорупциската комисија, тогаш нека не прави инсинуации, нека биде доследен и нека ги изнесе пред сите”, му порача Тасева на Прчевски. Според антикорупционерката, Обвинителството и нејзиниот прв човек не успеаја да одговорат на задачата, како најповикани да се спротивстават на корупцијата и организираниот криминал. Три на некој начин независни институции, Антикорупциската комисија, Државниот ревизор и Народниот правобранител констатираат дека комуникацијата со Обвинителството е несоодветна, што веќе потврдува дека нешто не е в ред, укажува Тасева. ?Некои луѓе треба да си ги расчистат работите околу конфликтот на интереси кои очигледно не ги познаваат. Каде е и дали има судир меѓу директор на Полициска академија што е службена работа и член на Антикорупциска комисија што е волонтерска работа”, го прашува Слаѓана Тасева обвинителот.
Пратениците на ВМРО-Народна ќе предложат промена и на Законот за ЈО и на законските одредби со кои е формирана Антикорупциската комисија. Во партијата на неформалниот лидер Љупчо Георгиевски сметаат дека двете инстанции треба да се реформираат. ?Очекував ваква разврска меѓу двете институции. Јасно е дека се води битка за политичка контрола врз Антикорупциската комисија, а резултатот во борбата против ова зло е нула. Антикорупциската комисија треба да биде општествен суд, да укажува, а не да пресудува. Истовремено, ни треба ефикасно Обвинителство. Во овој стадиум на развој нам ни треба јавен обвинител што го предлага опозицијата и Комисија која би требало да ја изберат оние кои ги немаат инструментите на власта во свои раце”, потенцира Слободан Чашуле од ВМРО-НП. Според него, корупцијата се спречува со ефикасна контрола во моментот, а не со гонење корумпирани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски ги критикуваше светските лидери: Разочаран сум што не доаѓаат
Украинскиот претседател Володимир Зеленски, кој денеска се сретна со американскиот секретар за одбрана во Сингапур, рече дека е разочаран што „одредени светски лидери“ не се обврзале да учествуваат на мировниот самит за Украина во Швајцарија.
Кинескиот претседател, Си Џинпинг, нема да учествува, а колку што е познато нема да учествува ниту американскиот претседател, Џо Бајден.
„Разочарани сме што некои светски лидери сè уште не го потврдија своето учество на мировниот самит“, рече Зеленски, без конкретно да ги спомене Кина или САД.
Зеленски денеска имаше „многу добар“ состанок со американскиот секретар за одбрана Лојд Остин во Сингапур, бидејќи тој се обидува да добие силна поддршка од Западот наспроти рускиот напредок на теренот.
Кина одби да дојде бидејќи Русија не беше поканета
Повеќе од сто земји и организации ветија дека ќе учествуваат на самитот во јуни во Швајцарија, рече Зеленски и ги покани земјите од азиско-пацифичкиот регион да се приклучат.
Кина во петокот рече дека ќе биде „тешко“ да се учествува на овој самит доколку Русија не биде поканета.
Средбата меѓу Зеленски и Остин дојде откако украинскиот претседател во петокот го пофали „напредокот“ откако САД му дозволија на Киев да користи американско оружје за напади на руска територија, под одредени услови.
Украина се бори да ја запре копнената офанзива на Русија во регионот Харков, каде Москва неодамна го направи најголемиот територијален напредок во последните 18 месеци.
Во последните денови Зеленски посети неколку европски земји со цел да побара поголема воена помош за украинската армија, која се повеќе се бори да се спротивстави на континуираните напади на Русија.
Свет
(Видео) Седум повредени лица се извлечени од урнатините на зградата во Истанбул
Трикатна зграда се урна во истанбулскиот кварт Кучукчекмез, а спасувачките тимови досега извлекле седум повредени од урнатините, јави денеска „Анадолија“.
Засега не е позната причината за уривањето на зградата, а на местото на несреќата се надлежни полициски, медицински и спасувачки екипи.
#SICAKHABER – Küçükçekmece’de bina çöktü. Enkaz altında kalanlar olduğu belirtiliyor. pic.twitter.com/I4RGqKGvKf
— Habertürk TV (@HaberturkTV) June 2, 2024
Во тек е акција за пребарување и спасување, а досега од под урнатините се извлечени седум повредени. Четворица се испратени во болница.
Од уривањето на зградата се оштетени и возила кои биле паркирани во близина, а оштетен е и автобус.
На местото на несреќата пристигна гувернерот на Истанбул Давут Ѓул.
Свет
(Видео) Се’ уште се трага по тројцата млади луѓе во Италија кои ги однесе реката додека стоеа прегрнати, најдена чантата на една од девојките
И втората ноќ од потрагата заврши без резултати во Премариакo, Италија, каде реката Натисон во петокот однесе тројца млади луѓе: Патриша (20), Бјанка (23) и Кристијан (25). Потрагата на пожарникарите и Цивилната заштита продолжува, со прелети на хеликоптери кои почнаа во зори.
На местото на исчезнувањето се и родителите на тројца млади, како и психолог. Едно од исчезнатите лица е 20-годишната Патриша Кормос, која живее во Кампоформидо. Пред да замине на брегот на Натизоне, тоа утро таа полагаше на Академијата за ликовни уметности Тиеполо во Удине, каде што е втора година. Останатите две се нејзините пријатели – Бјанка Дорош, која пред неколку дена пристигнала од Романија да ги посети нејзините родители кои живеат во Удине и нејзиното момче Кристијан Касијан Молнар, исто така од романска националност и жител на Австрија.
Во саботата наутро била пронајдена чантата на Патриша, а во неа имало мобилен телефон – сè уште вклучен, со кој успеала да повика помош – кој спасувачите го лоцирале претходниот ден.
Чантата била на брегот покрај реката, на неколку стотини метри низводно од мостот и можеби плутала поради нивото на водата.
Хеликоптерите се повторно во воздух, откако синоќа продолжи потрагата, со персонал на земја и беспилотни летала.
Се пребарува не само областа на Римскиот мост, последното место каде се видени, туку и низводно, сè до устието на реката Тора. Сепак, водата останува матна, што им ја отежнува работата на спасувачите. Родителите на тројцата исчезнати млади се гушкаат и се поддржуваат, пристигнале на местото каде првпат бил лоциран сигналот на мобилниот телефон на Патриша, кога таа се јавила на 911.
Тројцата млади луѓе сфатиле дека местото каде што се наоѓаат, наеднаш станал остров. За неколку минути, водата се подигнала и ги однела.
Дека биле во неволја прв сфатил случаен минувач кој слушнал врисоци од Римскиот мост во Премариако, на помалку од 15 километри од Удине и го вклучил алармот. Тоа беше почеток на потресна секвенца: повик до противпожарната бригада, смирување на младите луѓе кои се обидуваа да се спротивстават на силата на водата и група луѓе кои снимаа со мобилни телефони.
Тројцата пријатели биле во очајна прегратка за да се спротивстават на силата на водата, а во меѓувреме пожарникарите се обидувале да ги спасат: испружиле скала преку реката Натисон и фрлале јажиња.
Прегрнаните пријатели се обиделе да ги зграпчат, но не успеале. Потоа ги однела струјата и оттогаш им се губи секоја трага.
„Секогаш постои надеж дека ќе ги најдеме живи, но познавајќи ја реката, колку повеќе минува времето, толку е потешко да ги најдеме“, изјави Антонио Микелути, раководител на јавните работи во Премариако.
Тој додаде дека му е нејасно зошто младите луѓе биле таму знаејќи какви се условите.