Фалсификувани цигари вредни околу 500.000 евра се запленети во вчерашната акција на полициските специјалци во скопската населба Шуто Оризари.

Фалсификувани цигари вредни околу 500.000 евра се запленети во вчерашната акција на полициските специјалци во скопската населба Шуто Оризари. Во акцијата се уапсени и два члена на семејството Муча, кои петнаесетина години се главни во бизнисот со цигари во земјава. Третиот член на ова скопско семејство е во бегство уште од 2001 година кога го застрела еден од конкурентите во битката за подземјето. Според првичните сознанија на истрагата, разните видови цигари не биле произведени во земјава, но допрва се утврдува на каков начин стигнале во Скопје.

Десетина полициски специјалци вчераутро околу 6 часот упаднаа во куќата на семејството Муча во близина на Истражниот затвор „Скопје“ во Шуто Оризари. Во дворот, во кој било направено импровизирано стовариште, биле пронајдени 1.094 пакети со 54.700 штеки разновидни цигари без бандероли. Конкретно, станува збор за 600 пакети со 40.000 штеки од хрватските „примо“ и „респект“, потоа 114 пакети со 5.700 штеки на цигари со потекло од арапските земји и десет пакети со 500 штеки „роксборо“. Покрај странските брендови, во акцијата се запленети и 170 пакети со вкупно 8.500 штеки македонски цигари „партнер“. Чие дело е фалсификатот, односно како стигнале во земјава засега не се знае.

Плацот е сопственост на двајцата браќа Муча, но постариот веќе десетина години живее во Германија и тој бил надвор од бизнисот, кој го раководеле помладиот брат Фаик (66) и неговите синови Агим (33) и Насер, по кого е распишана меѓународна потерница. Тој уште пред шест години во мафијашка пресметка во битката за пазарот со шверцувани цигари ликвидирал член на конкурентското семејство Сума и оттогаш и’ бега на полицијата, иако е активен во нелегалниот бизнис.

Според извори од МВР, семејството Муча веќе петнаесетина години го имале главниот збор во бизнисот со фалсификувани цигари. Тие ги увезувале цигарите, ги транспортирале, а потоа работата ја преземале шест-седум луѓе од вториот ешалон, кои преку своите десетина „вработени“, пак, ги препродавале цигарите на пазарите, трафиките и улиците. Дури четири камиони им биле потребни на полицајците да ги натоварат цигарите за да ги однесат на вештачење. Од Секторот за организиран криминал укажуваат дека семејството Муча подолго време им бил трн во око и дека вчерашната акција многу била помогната од бриферите на МВР инфилтрирани во јадрото на шверцерите. И саботната акција кај скопски Бит-пазар кога беа запленети 10.000 штеки цигари од различни брендови била со цел да им се зададе претпоследниот удар на главните играчи на шверцот со цигари, кои мирно си живееле во куќата број 2 на улицата „Македонско-косовска бригада“ во Шуто Оризари.