Регион
Турција стравува дека на границата ќе има уште 600.000 сириски бегалци

Турција стравува дека поради борбите коишто последните денови се водат во околината на Алепо и во истоимената северна сириска покраина каде напредуваат силите на претседателот Башар ал-Асад, на нејзините граници ќе пристигнат 600.000 нови бегалци, изјави во понеделникот вечерта потпретседателот на турската влада, Нуман Куртумлуш, по седницата на владата.
„Најлошото сценарио кои би можело краткорочно да се случи на тоа подрачје е доаѓањето на уште 600.000 бегалци на турската граница“, изјави за новинарите вицепремиерот Нуман Куртумлуш.
Офанзивата против бунтовниците во покраината Алепо започната пред една седмица што ја поведе војската на сириската влада која напредува со локалните милиции и доброволечки единици од борци од соседните земји, како и со помош на руските воздушни удари, натерала десетици илјади цивили на бегство.
„Поради таквата ситуација во околина на Алепо, гледаме дека 200.000 луѓе се присилени на егзодус, од кои 65.000 во насока на Турција, а 135.000 внатре во Сирија, додаде Куртумлуш.
Околу 30.000 од нив, главно жени и деца, на студ и неизвесни услови се натрупани на турскиот граничен премин Ончипинар, кој турската влада засега го држи затворен, известуваат турските медиуми.
„Нашата цел засега е што е можно повеќе да го задржиме тој мигрантски бран подалеку од турските граници и таму да им се пружат потребните услуги“, додаде турскиот вицепремиер.
Турските власти веќе неколку денови повторуваат дека нивната политика на „отворени врати“ кон Сиријците не ја промениле и дека се подготвени, доколку е потребно, да се прифати и овој нов бран.
„Јасно дека како и досега ќе им помогнеме на нашите сириски браќа и ќе ги примиме кога тоа ќе биде потребно“, изјави во понеделникот турскиот премиер Ахмет Давутоглу, по разговорот со германската канцеларка Ангела Меркел која престојуваше во посета на Анкара.
Давутоглу, сепак, јасно предупреди дека неговата земја, којашто веќе прифати 2,7 милиони Сиријци, нема да може самата да го понесе сиот товар од прифаќањето на бегалците./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучевиќ: Блокадите во Србија претставуваат тероризам, а не граѓанска непослушност

Претседателот на Српската напредна партија, Милош Вучевиќ, денес изјави дека блокадите во Србија претставуваат тероризам, а не граѓанска непослушност и истакна дека поради блокадите на раскрсниците, изборите нема да бидат распишани.
„Некој мисли дека ако блокираат 50 раскрсници, Вучиќ ќе распише избори. Изборите нема да бидат распишани поради тоа. Добро е осмислено, со овие груби, навидум ненасилни дејства, тие се мешаат во нормалното функционирање на граѓаните. Најодвратно е што уживаат во фактот што некој не може да се движи слободно, што ја малтретираат и исцрпуваат полицијата“, рече Вучевиќ за ТВ „Информер“.
Вучевиќ изјави дека главната цел на сè што прават е соборување на претседателот на Србија, Александар Вучиќ, а со тоа и уништување на земјата.
„Тој е нивна пречка, нивна главна цел. Нивните цели се јавните пари да завршат во приватни џебови. Потоа ние да бидеме геноцидна нација и тие да ја завршат работата за Косово, за да биде завршено. Исто така, Србија да добие марионетска влада“, рече Вучевиќ.
Вучевиќ изјави дека оние што блокираат работат на уништување на економијата и спречување на граѓаните да живеат нормално.
Вучевиќ истакна дека блокадите си играат со нервите на мнозинството во Србија бидејќи 15-20 илјади луѓе малтретираат шест и пол милиони луѓе мислејќи дека ќе ги постигнат своите политички цели.
„По ова, никој нема сомнение дека ова се обиди за шарена револуција. Ги молам сите граѓани за трпение. Државата нема да запре. Издржавме агресија на НАТО, санкции, многу полоши работи. Ќе го сториме и ова. Економијата сигурно страда, луѓето се нервозни и немирни“, рече Вучевиќ.
Вучевиќ им честита на полицијата, БИА и на другите безбедносни агенции за нивната професионална работа.
„Им симнувам капа на сите што работеа. Тие ги консолидираа своите редови. Тие разбираат и го информираат државниот врв за она што ни се подготвува. Полицијата ја врати довербата на граѓаните. Врската помеѓу судството и Обвинителството сè уште не е доволно силна. Постојат тактики, некои се отворени за револуција“, рече Вучевиќ.
Според него, ниедно собирање на оние што протестираат не е легално, исто како што не е легална ниту блокадата на раскрсниците и железниците.
„Не е легално да се тепаат новинарки, да се линчува, прогонува и таргетира некого, не може да биде легално кога ја напаѓате полицијата“, рече Вучевиќ.
Фото: ЕПА
Регион
Дојава за бомба во авион на „Ер Србија“ во Црна Гора: уапсен млад човек од Србија

Сообраќајот на аеродромот Тиват во Црна Гора вчера беше запрен поради дојава дека наводно е поставена бомба во авион на Ер Србија кој слета од Белград околу 18 часот.
Информацијата ја потврди и компанијата Аеродроми Црна Гора, која исто така објави дека е покрената итна постапка за вакви случаи, дека авионот е изолиран, а патниците евакуирани, по што е извршена проверка на леталото.
„Аеродромските служби, во согласност со пропишаните процедури за вакви случаи, чекаат сигнал од надлежните органи за повторно воспоставување на редовен сообраќај“, соопшти компанијата Аеродроми Црна Гора.
„Вијести“ пишуваат дека 23-годишниот српски државјанин, С.М., е уапсен во Херцег Нови под сомнение дека пријавил дека во авион на „Ер Србија“ кој слета во Тиват од Белград бил поставен експлозивен материјал.
Поради вонредната состојба, неколку летови до Тиват беа пренасочени кон блиските аеродроми.
Регион
Мајка им давала на децата желе бомбони направени од канабис: уапсена 29-годишна жена во Грција

Полицијата во Ираклион, на грчкиот остров Крит, уапсила 29-годишна жена за која постои сомнение дека им дала на своите деца, на возраст од 14 и 10 години, препарати со канабис во форма на желе бомбони.
По консумирањето, децата се чувствувале лошо и биле префрлени во Универзитетската болница во Ираклион, каде што биле хоспитализирани на детското одделение, објавува грчкиот весник „Катимерини“.
Директорот на болницата, Јоргос Халкиадакис, изјавил дека нивната здравствена состојба е добра.
Жената, која работи во хотел, наводно изјавила дека пронашла желе бомбони во хотелскиот простор и, мислејќи дека се обични слатки, им ги дала на децата.
Предметот на истрагата го води Пододделот за сузбивање и истрага на кривични дела во Ираклион.
Се очекува резултатите од истрагата да фрлат повеќе светлина врз тоа дали мајката ја кажувала вистината, а доколку е така, да откријат како бонбоните стигнале до хотелот и дали имало некакви пропусти во безбедносните процедури.