Свет
Селмани проневерил милиони на сметка на болните
За бубрежно болен пациент од Тетово државата годишно плаќа пет илјади денари, а пациент со истата дијагноза во Кочани државата ја чини 64 илјади денари.
Мери Јордановска
За бубрежно болен пациент од Тетово државата годишно плаќа пет илјади денари, а пациент со истата дијагноза во Кочани државата ја чини 64 илјади денари.
На вакви нелогичности наишле државните ревизори при финансиската контрола во Министерството за здравство за 2004 година, чиј извештај беше објавен вчера. Во тој период прв човек на Министерството бил Реџеп Селмани, а неколку дена пред крајот на годината на оваа функција дојде сегашниот министер Владо Димов. Ревизорите утврдиле дека со владината програма за дијализа, Селмани паушално си префрлал пари во медицинските центри. Така, во Здравствената станица во Железара за 138 пациенти Министерството префрлало 2,3 милиони денари, колку што биле префрлани и во прилепскиот медицински центар, но за двојно помалку пациенти.
Според Државниот завод за ревизија, министерот Селмани незаконски потрошил повеќе од пет милиони денари од парите предвидени со владините програми за лекување болести. Од програмата за задолжителна имунизација на населението биле исплатени околу пет милиони денари за вакцини, шприцеви, гази, алкохол, и покрај тоа што вакцините веќе биле набавени од Министерството, а помошните материјали не биле предвидени со програмата.
И двајцата министри за здравство, поранешниот Селмани и сегашниот Димов, давале пари за специјализација на вработените во Министерството без да се утврди критериумот за тоа кој се може да специјализира. Во 2004 година за оваа намена биле потрошени 708 илјади денари.
„Овој нетранспарентен начин на избор на вработените чии специјализации ги финансира Министерството без пишан критериум ја доведува во прашање објективноста на постапката и ги доведува во нерамноправна положба другите вработени“, утврдиле ревизорите.
Според нив, Селмани проневерил повеќе од три милиони денари со тоа што парите за земање и за испраќање мостри за лабораториски испитувања при увоз на храна легнувале директно на сметката на Министерството, наместо во буџетот. Дел од уплатите, во согласност со правилникот, увозникот требало да ги плаќа на сметка на буџетот, но тие по грешка оделе на сметката на Министерството. Трите милиони денари никогаш не биле вратени во државниот буџет.
Кон крајот на 2004 година Министерството склучило незаконски договор за набавка на автомобили за 3,5 милиони денари. Договорот предвидувал авансирање на парите во вкупна вредност, спротивно на Законот за јавни набавки. Освен тоа, за сервисирање на возилата Министерството потрошило 283 илјади денари, без да спроведе постапка за јавна набавка.
Ревизорите укажуваат дека министерот за здравство мора да го почитува Законот за јавни набавки, пописната комисија да врши попис на парите, а Министерството да донесе акти за да се регулираат расходите.
Бучковски за џабе издавал земјиште до Воената болница
Александра К. Мишовска
Министерството за одбрана во времето на министерувањето на актуелниот премиер Владо Бучковски за 0,2 евра месечно издало 2.000 квадратни метри државно земјиште. Закупецот, скопската фирма „Мирадор“ две години не плаќал кирија, а данокот на додадена вредност го плаќало Министерството, утврдил Државниот завод за ревизија. За возврат „Мирадор“ бил обврзан секој месец за сума што е 20 отсто од закупнината да носи саксии и цвеќиња за Министерството и за Воената болница.
Покрај ова, последниот ревизорски извештај направен за работата на Воената болница покажува дека со дозвола на Бучковски за две години додека беше министер, Јован Манасиевски откако дојде на функцијата и Петре Утковски како управник, во Воена се набавувало во четири очи, се реновирале кабинети, се градело без постапки за тендер.
Надлежните во болницата трошеле буџетски пари за скапи инфузиски раствори и покрај тоа што имале опрема вредна околу еден милион евра. За тоа колку пари се потрошени по оваа основа ревизорите не успеале да утврдат бидејќи надлежните не ги чувале сите фактури. Имено, поради тој проблем целиот ревизорски извештај не содржи точни суми на злоупотребени пари. Управникот на болницата во 2004 година без законска можност наредил дел финансиски документи да се уништат.
Ревизијата констатирала дека Воената болница без тендер и дала на градежната фирма „Адинг“ повеќе од два милиони денари за реновирање на еден кабинет. Министерството и болницата секој месец и префрлале по 37.000 денари на фирмата БПЦ, која требало да го одржува компјутерскиот систем, кој, пак, како што констатирала ревизијата, се уште бил застарен и неефикасен.
Во извештајот на државната ревизија пишува дека Министерството за одбрана и Воената болница не плаќале и данок на додадена вредност, со што го оштетиле државниот буџет.
Хипербарната комора неотпакувана од 2002 година
Министерството за здравство се уште не ја активирало хипербарната комора, која чини околу 25 милиони денари, а била набавена во 2002 година, утврдиле ревизорите.
Тие сметаат дека со нефункционирањето на апаратот, од Фондот постојано се одлеваат пари за надомест на оние што користат такви услуги во странство.
„Освен еден допис упатен од министерот до директорот на Клиничкиот центар со кој бара да преземе мерки да се активира комората, на ревизијата не и беше достапен друг документ од кој може да се види дека се преземаат активности за апаратот да се стави во употреба“, се вели во извештајот на ревизијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанските студенти планираат протести против Израел
Студентите во Шпанија во наредните денови би можеле да почнат протести против „геноцидот што го изврши Израел во Палестина“ по примерот на универзитетите во САД, Холандија и Белгија, изјавија нивните претставници за шпанските медиуми.
На Филозофскиот факултет во Валенсија, приморски град на југозападот на земјата, студентите веќе една недела спијат во шатори и секојдневно протестираат.
„Бараме од нашиот универзитет да ги прекине сите врски со институциите и компаниите што соработуваат со Израел“, изјави 20-годишната Естер Монге, студентка по политички науки и социологија за весникот „Ел Паис“.
Во моментот многу универзитети одржуваат состаноци, на кои студентите и професорите гласаат за блокадите на факултетите.
„Студентскиот совет ќе одлучи за активностите во наредните денови“, рече Марија Хозе Лера, координаторка на „Палестиниум“, група за солидарност со палестинските аспирации.
Лера, која има докторат по психологија на Универзитетот во Севилја, вели дека моменно се одржуваат состаноци на универзитетите во Мадрид, Сарагоса, Барселона, Жирона, Гранада и во други градови.
Во понеделникот стотици студенти се собраа пред Универзитетот во Барселона, каде што ги развиорија своите транспаренти.
„Сакаме нашите факултети да ги прекинат сите односи со Израел и компаниите што работат таму“, рече 24-годишниот Пабло Кастиља, дипломиран студент по јавна политика.
Во Мадрид сѐ уште нема протестно кампување, но има демонстрации. На автономниот универзитет во Мадрид планираното предавање за НАТО беше откажано под притисок на пропалестинските демонстранти.
Друг јавен универзитет, Universidad Complutense de Madrid, објави декларација со наслов „Со Палестина против геноцидот во Газа“.
„По влошувањето на насилството врз палестинскиот народ, ги повикуваме професорите, истражувачите и вработените во администрацијата да се спротивстават на колективното казнување на Палестинците што го спроведува Израел“, се вели во декларацијата усвоена од администрацијата на Факултетот за политички науки и социологија.
Сведоци сме на геноцидот врз палестинскиот народ, што е продолжение на децениското систематско насилство врз палестинскиот народ и неговата присилна емиграција“, се вели во декларацијата објавена на веб-страницата на Факултетот.
Свет
Италијанскиот министер за одбрана: Треба да преговараме со Путин
Италијанскиот министер за одбрана, Гидо Крозето, изјави дека санкциите наметнати на Русија не успеале и го повика Западот да направи повеќе за да преговара за дипломатско решение со претседателот Владимир Путин со цел да се стави крај на војната во Украина.
Крозето за весникот „Месаџеро“ изјави дека Западот погрешно верувал дека санкциите може да ја запрат руската агресија и го прецениле неговото економско влијание во светот.
„Наместо тоа, единствениот начин да се реши оваа криза е сите да бидат вклучени, прво да се воспостави примирје, а потоа мир“, рече Крозето. На забелешката на новинарот дека Путин не покажал волја за преговори, министерот за одбрана на Италија одговорил дека „тоа е добра можност да се потрудиме повеќе“.
„Не смееме да пропуштиме ниту еден дипломатски пат, колку и да е тесен“, посочи тој. Тој, сепак, ја бранеше одлуката на Италија да продолжи да испраќа оружје во Украина со цел „да се обезбедат време и услови за постигнување прекин на огнот и мир“.
Министерот исто така предупреди дека во случај Русија да го окупира Киев „тоа неизбежно ќе доведе до конфликт со други земји, кои нема да прифатат руски тенкови да се наоѓаат на нивните граници“.
Тој ја нарече минатогодишната украинска контраофанзива грешка со оглед на воената супериорност на Русија велејќи дека лично го предупредил украинскиот претседател Володимир Зеленски дека е осудена на пропаст, „но тој не го послушал“.
Свет
Би-би-си: Русија можеби регрутира кубански државјани да се борат во Украина
Русија веројатно регрутирала кубански граѓани да се борат во Украина, ги пренесува Би-би-си резултатите од својата истрага.
Според извештаите, Кубанците биле намамени во руската армија со високи плати и пасоши, а во септември и октомври 2023 година на интернет на проукраинската платформа „Информ напалм“ излегоа податоците за пасошите на речиси 200 Кубанци, кои наводно ѝ се приклучиле на руската армија“, пренесува медиумот.
Според написите, документите излегоа на интернет и извештаите во медиумите сугерираат дека на Кубанците им се нудат месечни исплати од речиси 2.000 долари, што е огромна сума за Куба, каде што просечната месечна плата е помала од 25 долари, според Би-би-си. Рускиот пасош овозможува безвизно патување до 117 дестинации, а сопствениците на кубански пасоши се ограничени на 61.