Турција објави дека ги заострува условите за влегување на државјаните на соседен Ирак на нејзина територија, за успешно да се справува со илегалното доселување, и да го сопре бегалскиот бран што од неа го бара Европската унија.

Досега Ирачаните можеа да престојуваат во Турција триесет дена само со печатот кој го добиваа на граничните премини. Според новите прописи коишто во саботата ги објави турското министерство за надворешни работи, досегашната практика е укината.

Отсега само Ирачаните со виза или со дозвола за престој која ја издала некој од земјите на Шенгенскиот простор, САД, Велика Британија или Ирска, можат да ја користат едноставната процедура за влез во Турција. Сите други мора да поднесат барање а виза во пропишана форма, што е многу посложено. Засега не се знае од кога новиот систем ќе започне да се применува.

„Овие промени се дел од решителната борба која нашата земја ја води против илегалната имиграција“, изјави портпаролот на турската дипломатија, Танзу Боиглич.

Турција е еден од главните појдовни центри за имигрантите кои сакаат да се населат во Европската унија. Анкара објави дека досега примила 2,7 милиони Сиријци и околу 300.000 Ирачани кои ги напуштиле своите земји поради тамошните конфликти.

Брисел во последните седмици врши силен притисок врз Анкара за да го запре приливот на имигранти кон Европската унија, поради што е блокирана и помошта од три милијарди евра договорена минатата година./крај/мф/сн

Извор: Макфакс