Европа
Меркел: Грција доби великодушна понуда, за Цирпас тоа е уцена
Германската канцеларка Ангела Меркел ја повика во петокот владата на Грција да ја прифати „великодушната“ понуда на доверителите, додека грчкиот премиер Алексис Ципрас изјави дека ги одбива „ултиматумите и уцените“.
По завршувањето на европскиот самит во Брисел, германската канцеларка Ангела Меркел изјави дека во петокот рано претпладнето, заедно до францускиот претседател Франсоа Оланд, разговарала со грчкиот премиер Алексис Ципрас и дека двајцата му советувале да ја прифати „извонредно великодушната понуда“ на грчките доверители.
Доверителите (Европската комисија, Европската центрана банка и Меѓународниот монетарен фонд) во својата последна понуда предложиле продолжување на програмата за меѓународна финансиска помош за Грција до почетокот на декември 2015 година, и Атина во тој период би можела да добие до 15,5 милијарди евра. Од оваа сума, 12 милијарди би обезбедиле ЕК и ЕЦБ, а 3,5 милијарди евра ММФ.
За возврат Грција би требало да се обврзе дека ќе спроведе низа реформи, коишто вклучуваат кастрење на буџетските расходи. Проблемот е во тоа што тие предлози се во спротивност со она што владејачката коалиција на радикалната левица Сириза на Ципрас им го вети на своите гласачи на предвремените парламентарни избори кон крајот на јануари годинава.
Истовремено грчкиот премиер Алексис Ципрас изјави дека „ја отфрла Европската унија којашто би функционирала според принципот на ултиматуми и уцени“. Додаде дека „уште е долг патот“ до договорот.
Во сабота попладне повторно ќе се состанат министрите за финансии на земјите од еврозоната, за уште еднаш да се обидат да дојдат до договор со Грција. Почетокот на средбата првично беше закажан за 17 часот, а малку подоцна беше одложен за 14 часот. Канцеларката Меркел изјави дека овој состанок е „решавачки“.
На Грција ѝ преостанува уште многу малку време, имајќи предвид дека во некои земји и доколку во сабота биде постигнат договорот, потоа би требало за тоа да дискутираат националните парламенти. А веќе на 30-ти јуни Атина треба да ги исплати сите четири месечни рати од долгот кон ММФ во вкупен износ од 1,6 милијарди евра, што нема да е можно без договор со доверителите. Потоа во јули и август треба да плати вкупно 6,7 милијарди евра обврски кон ЕЦБ.
Претседателот на Европската комисија, Жан-Клод Јункер изјави дека понудата на институциите не се заснова на принципот „земи или остави“. „Европската унија не функционира така, не станува збор за пристапот ‘пливај или потони’“, рече Јункер. Одаде дека, сепак, е оптимист во врска со исходот од преговорите со Грција, но не и дека „преоптимистичен“.
Претседателот на Европскиот совет, Доналд Туск, пак, рече дека сега во Европската унија се „фокусирани на тоа како да ѝ се помогне на Грција во овој тежок момент“, како и дека нема ултиматуми, туку станува збор за временски теснец, имајќи предвид дека веќе во вторник истекува сегашната програма за надворешна финансиска помош на Грција и за наплата пристигнуваат 1,6 милијарди евра. „Не е политичка уцена која постојано го повторуваме фактот дека се приближува рокот. Во секој случај ќе биде критично, доколку не дојде до договор“, рече Туск.
Засега во Брисел не се споменува можноста од свикување вонреден самит на еврозоната, иако има слухови дека тој може да се случи доколку на состанокот на Еврогрупата (министрите за финансии на земјите членки на еврозоната) не биде постигнат договор. Во тој случај, на вонредниот самит не би се дискутирале за помош на Грција, туку за тоа како без неа, истакнуваат агенциите./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Деветгодишното девојче застрелано во ресторан во Лондон се бори за живот
Деветгодишно девојче, кое синоќа беше застрелано додека вечераше со семејството во ресторан во источен Лондон, е во критична состојба, јавува Скај њуз. Таа е една од четирите жртви во пукањето што се случи на истокот на градот.
Девојчето се бори за живот, соопшти полицијата, а тројцата мажи на возраст од 26, 37 и 42 години се во стабилна состојба.
"New normal" scenes in "Modern London" tonight as 4 people were shot in Hackney including a child, who is a critical condition in the shooting outside a restaurant at 21:20hrs. pic.twitter.com/O3qfUHr4Fp
— Tommy Robinson 🇬🇧 (@TRobinsonNewEra) May 30, 2024
Семејствата биле излезени на вечера кога се случило пукањето, а очевидци изјавиле за Скај њуз дека првично мислеле дека тоа е огномет пред да слушнат шкрипење на мотор.
Никој не е уапсен, полициската истрага е во тек.
Европа
„Фајненшл тајмс“: НАТО не може да ја заштити Источна Европа
НАТО има помалку од пет отсто од капацитетите за противвоздушна одбрана потребни за заштита на Источна и Централна Европа во случај на интензивен напад, пишува Фајненшл тајмс, повикувајќи се на неколку извори запознаени со доверливите одбранбени планови на алијансата, направени во 2023 година, пренесува Спутник.
„Воздушната одбрана е една од најголемите празнини што ги имаме. Тоа не можеме да го негираме“, изјави неименуван дипломат на НАТО.
„Способноста на алијансата да издржи ракетни и воздушни напади беше суштински дел од планот за одбрана на Источна Европа од инвазија“, вели друг извор.
„И сега го немаме тоа“, додаде тој.
Во написот се вели дека и на Велика Британија ѝ оди лошо во оваа област. Според „Фајненшл тајмс“, шесте разурнувачи дизајнирани за противвоздушна одбрана имаат недостатоци во дизајнот, а шесте модерни системи за воздушна одбрана „Скај Сабер“ имаат дострел од само 40 километри, а два од нив се наоѓаат во странство.
Европа
Макрон разговараше со претседателот на Палестина:„Решението за две држави не треба да се одложува“
Францускиот претседател Емануел Макрон изјави дека систематското одложување во спроведувањето на решението за две држави за Израел и Палестина треба да заврши.
„Макрон ја потврди посветеноста на Франција да работи, со своите европски и арапски партнери, на заедничката визија за мир што нуди гаранции за безбедност на Палестинците и Израелците“, се вели во соопштението на Елисејската палата по телефонскиот разговор меѓу францускиот претседател и неговиот колега Махмуд Абас.
„Овој процес треба да ја вклучи перспективата за признавање на палестинска држава со практична структура“, се вели во соопштението.
Макрон ја истакна потребата од реформирање и зајакнување на палестинската самоуправа за да може да ги извршува своите одговорности на палестинските територии, вклучувајќи го и Појасот Газа, за доброто на палестинскиот народ, пренесува француската новинска агенција АФП. Тој повторно го осуди неодамнешниот израелски напад во Рафах во кој, според локалните власти, загинаа 45 лица.
Разговорот меѓу францускиот и палестинскиот претседател дојде откако Норвешка, Шпанија и Ирска официјално ја признаа Палестина.
Вчера и Макрон изрази наклоност за француското признавање на Палестина, но додаде дека тоа треба да се случи во вистинско време.