Министерството за внатрешни работи во соработка со хрватската полиција екстрадираше осомничен од полициската акција „Чекан“, кој како дел од криминалната група од Гостивар се товари за изнуда, лихварство, перење пари и злосторничко здружување.

Четириесет и четиригодишниот гостиварец беше уапсен на граничниот премин Бајаково на 10 јануари по распишана меѓународна потерница од страна на Интерпол и беше спроведен во ектрадиционен притвор во Хрватска. По завршувањето на екстрадиционата постапка осомничениот бил преземен на аеродромот во Загреб и спроведен во затвор Скопје по претходно одредена мерка притвор во траење од 30 дена.Криминална група организирана од страна на пет лица меѓу кои и сега екстрадираниот гостиварец започнала да делува во континуитет од 2008 година, претежно на територијата на општина Гостивар при што мотивот бил стекнување на противправна имотна корист со извршување на повеќе кривични дела, а така стекнатата имотна корист ја пуштале во легалниот платен промет, за што користеле голем број на сопствени фирми, банкарски сметки, вложувајќи во недвижности и во превозни средства, стекнување на недвижен имот, како и давање на незаконски позајмици на физички и правни лица, притоа пресметувајќи им високи-лихварски месечни камати. За враќањето на позајмиците бил вршен притисок при што користени се сериозни вербални закани и физички напади врз оштетените. Инаку од страна на Одделот за сузбивање на организиран и сериозен криминал беше поднесена кривична пријава против 19 физички како и едно правно лице, додека пак во продолжение на акцијата “Чекан“ беше поднесена кривична пријава и против полициски службеник и Командир на полициската станица Гостивар. /крајј/мф