Европа
Полска: Почна ексхумацијата на останките на екс претседателот Лех Качински

Полското обвинителство започна во понеделникот ексхумацијана останките на поранешниот претседател Лех Качински, кој загина во воздухопловна несреќа во Русија во 2010 година, заедно со уште 96 луѓе, повеќето високи државни функционери, поради можна нова истрага за трагедијата којашто предизвика поделби во полската јавност.
Станува збор за најлошата несреќа од овој вид во Полска од Втората светска војна која длабоко го подели тамошното општество. Истрагата на претходната влада заклучи дека одговорноста паѓа на пилотот, капетанот на летот, кој од некои причини, наводно поради инсистирање на високи лица од државната делегација ги пренебрегнал предупредувањата од белоруската и руската контрола на летањето за лошите услови на аеродромот во Смоленск и не се упатил кон алтернативен аеродром, и при намалена видливост закачил во крошните од дрвата пред пистата. Несреќата се случи кога пилотот се обидел да го приземји авионот од советско производство „Ту-154“ во густата магла над аеродромот во западна Русија.
Несреќата кај рускиот град Смоленск, во западна Русија, во којашто загина и сопругата на поранешниот претседател, гувернерот на централната банка и врховниот воен командант, предизвика во Полска контроверзии, а некои тврдат дека несреќата е намерно предизвикана.
Поранешниот полски претседател Бронислав Коморовски ја критикуваше владата поради ексхумацијата, тврдејќи дека трагедијата во Смоленск се користи како „стап“ по главата на политичките ривали.
Сега владејачката партија Правда и справедливост (PiS) чиј челник е братот близнак на починатиот претседател Јарослав Качински, пак, се сомнева дека причина за несреќата е експлозија во авионот. Полскиот министер за одбрана во јуни годинава изјави дека авионот се распаднал на неколку метри над земјата, на 900 метри од местото на падот.
Новата полска комисија за истрагата тврди дека целосната верзија од записите на „црните кутии“ укажува дека во последните секунди од летот во авионот откажал генераторот, моторот и инструментите за отчитување на височината. Исто така, сега се сака да се испита дали телата се правилно идентификувани.
Полското обвинителство одлучи да ги отвори ковчезите на жртвите, кои беа запечатени во Русија, тврдејќи дека анализите на посмртните останки се потреби за да се утврди причината за падот на авионот. Шест од девет претходно ексхумирани тела биле погрешно идентификувани, беше утврдено во јуни.
Медиумите тврдат дека челникот на PiS, Јарослав Качински бил присутен во понеделникот на ексхумацијата на останките на неговиот брат близнак.
Анкетите покажуваат дека само десет отсто од Полјаците ја одобруваат ексхумацијата. Во октомври 200 членови на семејствата на 17 од 96 од жртвите напишаа отворено писмо до сегашниот полски претседател Андреј Дуда во коешто велат дека се „вознемирени поради свирепиот и безчувствителен“ чин. Дуда, пак, ги повика на „разбирање“ кон државните обвинители коишто според законот морале да наредат ексхумација.
Премиерката Беата Шилдо на протестите одговори дека „тоа е закон и тоа мора да се прифати“.
Полската делегација требаше да учествува на комеморацијата за 22.000 полски офицери кои во 1940 година и убила советската тајна полиција, а според некои историчари дел биле ликвидирани од нацистите. Претходно Русија на Полска ѝ ги предаде списите од архивите за овој масакр познат во историјата како масакрот од Катинската шума, но Варшава обвинува дека Москва не сака да ги врати остатоците од авионот. Тоа долева масло на огнот и така подгревајќи ги теориите на заговор. Москва, пак, порачува дека таа спроведува своја сопствена истрага./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Мелони: Пријавена сум во Меѓународниот кривичен суд за соучество во геноцид

Италијанската премиерка Џорџа Мелони вчера изјави дека таа и двајца министри се пријавени во Меѓународниот кривичен суд за наводно соучество во геноцид поврзан со израелската офанзива во Газа.
Во интервју за италијанската телевизиска станица РАИ, Мелони рече дека министерот за одбрана Гвидо Кросето и министерот за надворешни работи Антонио Тајани се пријавени во Меѓународниот кривичен суд и рече дека „мисли“ дека тоа се однесува и на Роберто Чинголани, шефот на одбранбената групација Леонардо.
„Верувам дека нема друг случај во светот или во историјата со вакви обвинувања“, рече Мелони.
Таа не прецизираше кој го поднел случајот против неа и министрите.
Меѓународниот кривичен суд истражува, гони и суди лица обвинети за геноцид, воени злосторства и злосторства против човештвото.
Италија беше место на серија демонстрации во изминатата недела, при што стотици илјади луѓе излегоа на улиците во знак на протест против масовните убиства во Газа, а многу демонстранти беа насочени кон Мелони.
Нејзината десничарска влада, во голема мера цврст поддржувач на Израел, неодамна се дистанцира од она што го нарекува „несразмерна“ офанзива во Газа, но не прекина никакви трговски или дипломатски врски, ниту ја призна државата Палестина.
Мелони рече дека е „зачудена“ од обвинувањето за соучество во геноцид бидејќи „секој што ја познава ситуацијата знае дека Италија, на пример, не одобрила нови испораки на оружје во Израел по 7 октомври“.
фото: принтскрин
Европа
Путин: Се докажа дека бевме во право во февруари 2022 година

Желбата на луѓето од Донбас и Новорусија да ја поврзат својата иднина со Русија докажа дека одлуките донесени во февруари 2022 година биле правилни, изјави рускиот претседател Владимир Путин. Тој го изјави ова отворајќи го состанокот со командантите на групите на сили во Санкт Петербург, пишува ТАСС.
Путин истакна дека фактот што „жителите на тие региони со огромно мнозинство гласаа за својата иднина како дел од Русија ја потврдува исправноста и актуелноста на одлуките донесени на почетокот на војната“.
Рускиот претседател, исто така, потсети дека 30 септември го означува „Денот на повторното обединување“ на самопрогласената Донецка Народна Република и Луганска Народна Република и (делови од) Запорошката и Херсонската област со Руската Федерација.
фото: принтскрин
Европа
Зеленски: 100.000 западни компоненти пронајдени во руски ракети и дронови

Украинскиот претседател Володимир Зеленски изјави дека повеќе од 100.000 компоненти произведени во Западот се пронајдени во беспилотни летала и ракети лансирани од Русија во Украина ноќта од саботата кон неделата. Наодите го потврдуваат континуираното присуство на западната технологија во руското оружје и покрај годините санкции.
Руските сили лансираа околу 500 беспилотни летала и повеќе од 50 ракети во голем напад врз Украина, насочен кон населени места низ целата земја, вклучително и оние далеку од линиите на фронтот. Најмалку шест лица беа убиени во нападот, вклучувајќи цело семејство од четири члена, а 18 други беа повредени.
Според Зеленски, беспилотните летала за напад содржеле 100.688 компоненти произведени во странство.
Околу 1.500 компоненти произведени во странство се пронајдени во ракетите Искандер, 192 во балистичките ракети Кинжал и 405 во крстосувачките ракети Калибр, објави Киев Индепендент.
Се вели дека овие компоненти се произведени од компании со седиште во САД, Кина, Тајван, Велика Британија, Германија, Швајцарија, Јапонија, Јужна Кореја и Холандија.
Зеленски истакна дека украинските партнери веќе имаат детални информации за секоја компанија и секој производ што е вклучен. Тој додаде дека Киев работи и на нови санкции насочени кон поединци и субјекти што ѝ помагаат на Русија.
„Од клучно значење е да се запре секоја шема што ги заобиколува санкциите, бидејќи Русија ги користи сите нив за да продолжи со убивањето. Светот има моќ да го спречи тоа“, рече тој.
фото: принтскрин