Политика
ДУИ не може да учествува во посетата на УБК, пратениците ја напуштија Комисијата
Пратениците од Демократската унија за интеграција (ДУИ) ја напуштија Комисијата за надзор на работата над Управата за безбедност и контраразузнавање (УБК) и Агенцијата за разузнавање, бидејќи пратеникот, член на оваа Комисија, Зулфи Адили, веќе една година немал добиено безбедносен сертификат за пристап до класифицираните документи на УБК.
Бидејќи нема сертификат, нема да може да биде дел од составот на Комисијата којшто ќе ја посети УБК, па затоа побара Комисијата да не го донесува заклучокот за посета на оваа институција, сé додека тој не добие одговор од УБК, зошто нема добиено безбедносен сертификат.„И по една година до денеска немам писмен одговор зошто немам добиено безбедносен сертификат. Колку години треба да минат за да добијам одговор. Зошто да имам доверба во тој орган?“, запраша Адили. За него, ова е предизвикува нееднаквост меѓу пратениците и непочитување на волјата на албанската етничка заедница којашто го изгласала за да ги претставува во Собранието. Зад него застана и заменик членот на Комисијата од редовите на ДУИ, Рафис Алити, кој рече дека со ова само се зголемува недовербата на јавноста кон оваа институција.Во знак на револт Адили и Алити ја напуштија работата на Комисијата. Роза Топузовска-Каревска, независен пратеник, рече дека недобивањето безбедносен сертификат е сериозен проблем и со неиздавањето на сертификати на одредени пратеници, според неа, УБК само ја покажува својата комотност и доведува до сомнеж за работата на оваа институција.„УБК има должност на писмен одговор. УБК се става над Владата, над Уставот, над државата, над парламентот“, изјави Топузовска-Каревска. Антонио Милошоски од ВМРО-ДПМНЕ побара членовите на Комисијата да го изгласаат заклучокот за посета на УБК за што побрзо да се оствари средбата. „Ако некоја институција или државата сакала да обесправи цела етничка заедница, без безбедносен сертификат немало да биде само еден пратеник, туку сите пратеници од албанската етничка заедница. ДУИ го политизира ова и сака да се претстави себеси како жртва“, рече Милошоски.Откако ДУИ ја напушти работата на Комисијата, Топузова-Каревска рече дека нема смисла натамошната работа и изрази сомнеж дека власта не сака да оствари посета на УБК. „Ова може да се толкува и како догово0р на коалициските партнери“, рече Топузова-Кареска и исто така ја напушти денешната работа на Комисијата.Заменик членот на Комисијата, поранешниот министер за внатрешни работи и челник на Демократскиот сојуз, Павле Трајанов, рече дека требало да се иницира промена на Законот за класифицирани информации, затоа што постапка за издавање на сертификат да трае 10 до 5 дена, а не една година, па според него да се отвори можност за манипулација или партиска пропаганда. Сепак, членовите на Комисијата го изгласаа заклучокот да се оствари посета во УБК и пратениците да извршат контрола на работа над УБК, иако пратениците од опозицијата ја бојкотираат работата на Собранието. Ја задолжија Управата и да им достави писмен извештај за нејзината работа од претходната година.Иако Трајанов побара да се почека исходот од денешните средби за решавање на политичката криза, по коишто би можело опозицијата да се врати во Собранието, сепак, пратениците го донесоа заклучокот за посетата.Составот на пратениците кои ќе ја посетат Управата за безбедност и контраразузнавање, останува неизвесен и зависи од исходот на средбите на политичкиот врв со европските посредници и од тоа дали пратениците од опозицијата ќе се вратат во Собранието.УБК се најде на удар во јавноста по објавените бомби на опозицијата, во коишто наводно се слуша гласот на сега поранешниот директор на УБК, Сашо Мијалков како зема мито од израелска фирма, го договара изборот на судии…По вооружениот напад во кумановско „Диво насеље“ се проширија шпекулации дека луѓе од УБК контактирале со дел од членовите на вооружената група којашто се судир со полицијата. По акцијата во Куманово, во којашто загинаа осуммина полицајци и десеттина припадници на групата, Мијалков си поднесе оставка./крај/мф/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мециновиќ: На носителите на ЗНАМ, на личните профили им стојат слики со Заев и Пендаровски
– На носителите на ЗНАМ, уште на личните профили им стојат слики за поддршка на Заев и Пендаровски. Тоа се поддршки што јавно им ги дадоа, така што сегашното нивно делување е малку повеќе лицемерно од нивна страна – истакна Носителот на ИЕ2 и портпарол на Левица, Амар Мециновиќ, во дебатата на ,,24 Вести”.
Според Мециновиќ, СДСМ ако ја примеа пораката, немаше Оливер Спасовски да биде носител во ИЕ2, после скандалите со пасошите за белосветски криминалци, за голготата за македонските граѓани со пасошите и за бегството на Груевски:
– Од друга страна, за СДС имам конкретна порака, но СДС не ја прима пораката! Пораката не е примена, затоа што нивниот носител во Двојка имаше страшни резултати. Имаше: од бегството на Груевски до оваа голгота што им се случи со пасошите на граѓаните и во меѓувреме – издавањето на пасоши за белосветски криминалци.
Говорејќи за Францускиот предлог и за ненаситноста кон бизнис – интересите од страна на СДСМ, Мециновиќ рече:
– Исто така, не ја примија ни пораката кога народот го отфрли Францускиот предлог. Не ја примија ни пораката кога Заев го изгуби легитимитетот, така што на сила се одржаа на власт до 2024 год. Практично, за да ги задржат нивните бизнис – интереси.
Мециновиќ постојано става акцент и на неоспорниот факт дека челниците од ЗНАМ го избришаа АСНОМ од Уставот:
,,ЗНАМ го избришаа АСНОМ од Уставот кога го носеа Преспанскиот, со оглед на фактот дека тогаш беа дел од раководството на тогашното СДС. Затоа, целата нивна сегашна реторика е лицемерна”.
Левица е единствена искрена, чесна, неподмитлива опција, која се бори за нулта – корупција, радикални промени во системот и нуди решенија за сите целни групи граѓани во Македонија:
,,На 8 мај, заокружете го број 5! Искористете го своето право на глас и гласајте за Левица! Со повеќе пратеници во Парламентот, борбата ќе биде посилна!”
Македонија
Аваја: Треба да се искористи потенцијалот на ромската заедница
Ромската заедница има најмлада популација во државата и тој потенцијал треба да се искористи, порача Ќемал Сулејманов, носител на листа во Изборна единица 3 на средба со жителите на Криволак.
„Нашата заедница е најмладата популација во државата. И нашите млади бегаат надвор од државата, барајќи решенија, а ние увезуваме работници од азиските држави. Мора да најдеме решение како нашите млади да останат во државата. Заеднички да ги направиме промените иво нашите инситтуции да имаме наши луѓе. Ветуваме дека промените почнуваат со Аваја. Вашиот глас го давате за подобра иднина и соединети да покажеме дека сме тука“ порача Сулејманов.
Според него, доволно е ромската заедница да биде третирана само како чистачи и амалџии „Драги браќа и сестри, ги знам вашите проблеми со кои се соочувате, тие се мои проблеми и мора да засукаме ракави по избори и заедно да ги решаваме. Мора да се сооединиме и да почнеме со промени. Мора да имаме наши луѓе во сите институции и тоа на раководни позиции. Доста не гледаа само како чистачи и нивни амалџии“, рече Сулејманов.
Претседателот на Аваја, Акиф Кариман, рече дека одлучил да ја жртвува индивидуалната кариера за да придонесе кон напредокот на народот. Тој говореше за тоа како другите политичари ги гледаат и вреднуваат Ромите.
„Зошто? Затоа што секогаш не потценуваат. Велат ние знаеме лесно да се справиме со вас. Малку ќе ве преплашиме и вие ќе се повлечете. Ќе ви дадеме под рака и вие ќе бидете на наша страна. Или ако тоа не функционира, ќе почнат со притисоци. И тоа досега функционираше. Но, сега ја имаме Аваја, формирана да биде рамо до рамо со сите нас. Ние сме тука да направиме голема промена и да го предизвикаме статус квото“, порача Кариман.
Македонија
Џафери за Велигден: Обединети да продолжиме и да осигураме благосостојба денес и за идните поколенија
Претседателот на Владата на Република Северна Македонија, Талат Џафери, во име на Владата на Република Северна Македонија и во свое име, испрати телеграма со честитки за најголемиот христијански празник, Воскресение Христово – Велигден, до поглаварот на Македонската православна црква – Охридска архиепископија, архиепископ охридски и македонски, г.г. Стефан, до Светиот архиерејски Синод, свештенството и монаштвото на МПЦ-ОА, до православните верници и до сите граѓани кои денеска го чествуваат празникот.
„Задоволство ми е во име на Владата на Република Северна Македонија и во мое име, да Ви го честитам најголемиот христијански празник, Воскресение Христово – Велигден, Вам, на Светиот архиерејски Синод, на свештенството и монаштвото на Македонската православна црква – Охридска архиепископија, на православните верници и на сите граѓани кои денеска го чествуваат празникот.
Велигденската порака за победата на животот над смртта е порака која влева надеж дека за животот, вреди да се преземе секој чекор на храброст и пожртвуваност, чекор кој води кон светла цел. Заедничкото добро, е благословена човекова определба, и тоа може да се постигне само ако се почитуваат основните постулати на кои упатуваат бројните примери низ историјата. Особено во денешен контекст, кога човештвото и светот секојдневно се соочуваат со најразлични предизвици кои се закана по животот, мирот, здравјето и менталната благосостојба, потребни се повеќе од кога било пораките на надеж, единство и верба во тоа заедничко добро, засновано врз практикувањето на универзалните вредности како што се хуманоста, солидарноста, одговорноста и взаемната почит.
Вашата улога има голема одговорност и јас Ви посакувам мудрост во исполнувањето на благородната мисија. Ви пожелувам празникот да го поминете во добро здравје, спокој во душата и среќа меѓу саканите, а со разбирање, меѓусебна почит и обединети, да продолжиме да ја унапредуваме Република Северна Македонија и да обезбедиме благосостојба денес и за идните поколенија“, стои во честитката од премиерот Џафери до поглаварот на МПЦ – ОА, г.г. Стефан.