Грција има волја да разговара со европските партнери и да бара „решенија на заедничка основа“, изјави во четвртокот претседателот на европскиот парламент Мартин Шулц по разговорите со новиот грчки премиер Алексис Ципрас, кој средбата ја оцени како „конструктивна“ и најави дека неговата влада има подготвено план да го осигури обновувањето на економскиот раст без примена на жестоките мерки за штедење.

Претседателот на Европскиот парламент, Мартин Шулц, е првиот челник на Европската унија кој се сретна со новиот грчки премиер Алексис Ципрас, откако неговата коалиција на радикалната левица Сириза победи на неделните предвремени парламентарни избори и, и покрај прогнозите, со десната партија Независни Грци брзо формираше влада, наоѓајќи го заедничкиот интерес во ветувањето дека ќе бидат сопрени непопуларните мерки за штедење и оти ќе се преговара за отпишување на значителен дел од грчкиот долг кон меѓународните доверители, што наиде на негодувања во Брисел.

„Постоеше стравување дека Алексис Ципрас ќе оди по својот пат, но тоа не е точно, тој е за дијалог (…) Грција бара решенија на заедничка основа со своите европски партнери.“, изјавил Шулц, пренесуваат грчките медиуми.

„Тоа е добар чекор напред и се надевам на конкретни чекори утре (во петок) со претседателот на еврозоната Јероен Дијсеблом“, кој доаѓа во Атина на разговори со грчкиот премиер, додал Шулц. Претседателот на Европскиот парламент изразил задоволство што меѓу приоритетите на Ципрас е „борбата против даночното затајување“ и „социјалните неправди поврзани со даночното затајување“.

Од своја страна, пак, Ципрас за медиумите изјавил дека неговата влада „има план за големи реформи“. „Имаме план за враќање на економскиот раст без примена на острите мерки за штедење“, додал грчкиот премиер.

Според Ципрас, „се водат преговори со партнерите на Грција за изнаоѓање заемно корисно решение за темите коишто се од заеднички интерес“. „Ние ја гарантираме стабилноста“, ветил премиерот додавајќи дека „за тоа е потребно време“.

Ципрас истакнал дека со претседателот на Европскиот парламент водел „плодна и конструктивна дискусија која ќе може да резултира со нова доверба меѓу институциите на ЕУ и Грција без меморандуми“, со меѓународните доверители за мерките за штедење во замена за финансиската помош, Европската централна банка, Европската комисија и Меѓународниот монетарен фонд.

Новиот грчки премиер потенцирал уште еднаш ека неговата влада има план за широки реформи „за борба против корупцијата, затајувањето на даноците и за обновување на производството и економскиот раст./крај/мф/сн

Извор: Макфакс