Најмалку 95 лица загинаа во двете експлозии кои одекнаа во саботата наутро во центарот на турската престолнина Анкара, пред почетокот на протесната поворка за мир во југоисточниот дел од земјата, што претставува најголемиот терористички чин во историјата на Турција, објави во саботата доцна вечерта кризниот центар што го формираше премиерот Ахмет Давутоглу.

Претходно италијанската новинска агенција ANSA, повикувајќи се на извори во опозициската Национална демократска партија (HDP), чии приврзаници се меѓу жртвите, кои имаа намера да учествуваат во поворката на која повикаа синдикатите и невладините организации, објави дека бројката на загинати се искачила на 97, но турските власти тогаш инсистираа на бројката од 86 загинати.

Како што ноќта кон неделата соопшти во Анкара министерот за здравство, Мехмет Мујезиноглу, покрај загинатите, уште 246 луѓе се ранети во експлозиите, од кои 48 се во критична состојба. Покрај тоа повредени се и 9 полицајци, пренесува интернет изданието на весникот Hurriyet.

Мујезиноглу изјави дека медицинските екипи брзо реагирале на местото на нападот, но „поради паниката и поради големината нападот имало некои пречки во нивното работење, што можеби довело до поголем број на жртвите“.

Сепак, министерот за внатрешни работи Селами Алтинок отфрли секаква одговорност на властите, велејќи дека не се размислува за оставка. Тој пред новинарите го повтори кусите информации за видот на нападот и неговата организација, истакнувајќи дека тие не потекнуваат од разузнавачки извори и изрази надеж дека предвремените парламентарни избори ќе се одржат во договорениот термин на 1-ви ноември.

Одделно, еден од челниците на владејачката Партијата на правдата и развојот (AKP) Омер Челик, исто така, изјави дека нападот кој турските власти го квалификуваа како терористички чин зад кој стојат екстремни сили, е во насока на претстојните избори. Тој повтори дека премиерот Ахмет Давутоглу, како претседател на AKP, ги суспендираше предизборните активност на партијата следните три дена. Челик ја истакна неопходноста од „обединета позиција“ во моментов.

„Овој терористички напад е насочен кон создавање хаос, поттикнувања на одредени улични немири и загрозување на изборите. Треба да останеме смирени на ваквите обиди“, порача Челик според кој нападот можел да се случи секаде низ Турција и дека е планиран и организиран од екстремистите и е насочен против сите во земјата./крај/мф/сн

Извор: Макфакс