Црна хроника
ОЈО истражува дали некој го поттикнал Крпач на самоубиство, СЈО не им дава доказ кој му се заканувал
Јавното обвинителство Скопје тврди дека сведокот на Специјалното јавно обвинителство, Коста Крпач неспорно се самоубил, но сега истражува дали има кривично дело, односно дали некој го навел и поттикнал да изврши самоубиство.
Истрагата за самоубиството е завршена и скопското Обвинителство врз основа на материјални, вербални докази и многубројни вештачења утврдило дека Крпач се самоубил на специфичен начин.Сега скопското Обвинителство отворило предистражна постапка и истражува кој, зошто и како му се заканувал на Крпач. Но, предистражната постапка ја кочело Специјалното јавно обвинителство кое не му го давало записникот од распитот на Крпач во кој тврди дека имал закани.Единствено нешто што добиле од СЈО биле информациите дека Крпач имал закани, но ним им требало доказ кој му се заканувал на Крпач за да продолжат со истрагата. Како што објаснија од Обвинителството, кад работеле со многу заштитени сведоци, Крпач морал да каже кој и зошто му се заканувал за да бара заштита од СЈО и сето тоа да биде внесено во записник. Записникот може да биде таен документ, но според Обвинителството, СЈО може да го даде овој документ со назнака доверливо.Скопското обвинителство уште во мај доставило барање до СЈО за да им се предаде записникот, но до денеска не добиле никаков одговор. Обвинителството упати апел до СЈО да надвладее разумот да им го предадат записникот.Истрагата на скопското Обвинителство утврдила дека револверот со којшто се самоубил Крпач бил негов и имал дозвола за негово поседување. Испитани биле 19 сведоци, сите кои Обвинителството ценело дека би можеле да придонесат за решавање на случајот. Десетмина од испитаните сведоци биле службени лица вработени во Министерството за внатрешни работи кои го вршеле претресот во домот на Крпач, а девет лица биле лица блиски со него, меѓу кои неговата сопруга, пријатели и бизнис партнери.Според Обвинителството, од истрагата произлегло дека промена на расположението кај Крпач се случила на 6 април, кога бил извршен претрес во неговиот дом по налог на Специјалното јавно обвинителство. Следниот ден Крпач бил испитан како сведок во СЈО и побарал заштита бидејќи имал закани. По неколку дена името на Крпач се најде на списокот на аболицирани лица којшто го објави Претседателот, Ѓорге Иванов, а истиот месец на 27-ми изврши самоубиство. Првин пукаше во комбе кое било паркирано пред влезот на неговата зграда во скопската населба Капиштец, но засега не е познато зошто Крпач пукал во комбето.Тој пукал кон комбето од терасата од станот каде што живее, а потоа влегол внатре и се самоубил. Случајот во полиција го пријавил пензиониран полицаец кој според Обвинителството, се нашол во погрешно време на погрешно место. Телефонот на Крпач не бил вештачен бидејќи стручните лица не успеале да го пробијат пасвордот на телефонот, којшто имал посебна заштита. По самоубиството неговата сопруга била повикана во обвинителството два пати и до тогаш таа немала никакви закани по нејзиниот живот.Обвинителството ги повика новинарите на брифинг по вчерашната прес-конференција на СЈО на која соопшти дека отворило нова истрага за случајот „Трезор“, а во оваа истрага е вмешана и фирмата чиј сопственик порано беше Крпач, „Финзи“. Со новата истрага на СЈО осомничени за злоупотреба на службена положба се три лица од Управата за безбедност и контраразузнавање и едно лице од Министерството за внатрешни работи, кои преку правното лице „Финзи ДООЕЛ“, од Велика Британија нарачува електронска и комуникациска опрема, со цена повисока за околу 862.000 евра. За оваа сума, преку повеќе договори и анекси на договори е оштетен Буџетот на Република Македонија, а со цел лично богатење и прибавување имотна корист./крај/ффс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.