Daily news
Турција помеѓу демократијата и диктатурата: Битката за моќ допрва започнува
Пишува Бојан Стојковски
Султан, диктатор, тиранин беа само дел од епитети кои ги доби турскиот претседател Реџеп Тајип Ердоган по прогласувањето на резултатите од референдумот на кој мнозинството Турци, односно 51,41 отсто или нешто повеќе од 25 милиони луѓе гласаа за уставни промени и зголемување на претседателските овластувања.
Европа како и повеќето светски политички центри изразија загриженост поради последните случувања и развојот на настаните во земјата, која во последната година се најде во центарот на вниманието на светска јавност поради бројни причини, иако пред се лоши, преку мигрантската криза, преку терористичките напади и борбата против терористичката организација Исламска држава, па се до неуспешниот обид за пуч и сето она што потоа следеше.
Веќе од понеделникот, ден по објавувањето на резултатите од референдумот, многумина ја прогласија Турција за диктатура, а Турците за народ кој ќе биде оставен на милост и немилост на Еродган. Макфакс на оваа тема разговараше со турски новинари и граѓански активисти, и за тоа како тие гледаат на резултатите од референдумот.
Уставните промени пред се ќе донесат промена на системот од парламентарен во претседателски, објаснува за Макфакс новинарката на Хуриет Дејли Њуз, Ипек Јездани. „Владиниот систем сега ќе премине од парламентарен во ексклузивно претседателски систем, со што Ердоган ќе има ексклузивни моќи кои ќе му овозможат да назначува министри и владини претставници, потоа да именува половина од вкупниот број на членови во највисокото судско тело на Турција, да издава декрети и да може да прогласи вонредна состојба. Промените ќе стартуваат во следните шест месеци, а се очекува претседателскиот систем целосно да почне да се имплементира во 2019-та, за кога се закажани и претседателски избори“, вели Јездани.
Главната опозициска партија во Турција, Народната републиканска партија веќе ги оспори резултатите од референдумот, а низ земјата веќе започнаа и протести против Ердоган. Сепак, не е се загубено, коментираат турските новинари, а како причини кои највеќе влеваат надеж за ова се поразите на Ердоган во Истанбул и Анкара.
„Прерано е да се коментира, со оглед на тоа што главната опозициска партија тукушто побара од изборната комисија поништување на референдумот и ова е нешто многу важно. Сметаме дека во следните неколку дена ќе се фокусираме на дебата околу легитимитетот на одржаниот референдум. Исто така, резултатите од економските и културните центри низ Турција се јасен пораз за Ердоган. Секуларците сега дури најавуваат и улични протести. Неговиот сон за добивање на поголеми моќи сега е оспорен, и иако среднорочно тој можеби ќе направи некакви промени, ризикува да ги загуби претседателските избори во 2019-та година. Можеби пред 24 часа тој беше семоќен, но сега за првпат во 23 години тој ги загуби Истанбул и Анкара, па дури загуби и во неговата населба Ускудар“, коментира за Макфакс турски новинар од Истанбул.
Во целата пострефендумска состојба, за опозицијата спорни се околу два ипол милиони гласачки ливчиња кои немаат печат, а кои според турската Државна изборна комисија се валидни.
„Иако резултатите од референдумот покажаа дека победија гласовите за уставни промени, има околу два ипол милиони гласачки ливчиња на кои нема печат од државната изборна комисија, а според комисијата, овие ливчиња сепак се валидни. Ова е нелегално, но и покрај ваквите незаконитости, три големи градови, Истанбул, Анкара и Измир сите рекоа „не“ за уставните промени. И покрај конечниот исход, ова е нешто ново и ветувачко за сите оние кои гласаа против уставните промени“, вели за Макфакс граѓанскиот активист Ела Ченудиоглу.
„Новите избори ќе бидат одржани во 2019-та, во време кога премиерската функција ќе биде укината. Дотогаш, претседателот ќе може да именува судии и да избира членови во националниот совет за безбедност. Во меѓувреме, почнувајќи од сега, јас и сите оние што гласаа против уставните промени, со загриженост ќе гледаме како новиот систем ќе влијае врз демократијата и иднината на земјата“, заклучува Ченудиоглу.
Стравувањата на светската јавност, пак, сега се насочени кон следните чекори на Ердоган, меѓу кои и воведувањето на смртната казна, референдумот за членство во ЕУ, а тука е и договорот помеѓу ЕУ и Турција околу мигрантската криза./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.