Денеска (18.01.2022) во периодот од 10.00 до 14.00 часот спроведена е зајакната акциска контрола за санкционирање на возачи кои не даваат првенство на минување на пешаци на територија на СВР Тетово при што се санкционирани 24 возачи. Од нив 15 на тетовското и девет на поширокото гостиварско подрачје. На сите прекршители изготвени им се соодветни поднесоци.

МВР апелира до сите учесници во сообраќајот на ги почитуваат сообраќајните правила и прописи и заеднички да придонесат за побезбедни патишта.

Едно лице е тешко повредено во сообраќајна несреќа што се случила вчера на регионалниот пат Струга – Дебар помеѓу две возила.

Во несреќата тешки телесни повреди добил К. А. (49) од струшкото село Велешта, констатирани во Специјалната болница „Св. Еразмо“ во Охрид. Извршен бил увид од екипа од Полициската станица Струга.

Скопското Обвинителство донесе наредба за спроведување истражна постапка против две лица што извршиле разбојништво во бензинска пумпа.

Двајцата соизвршители на возраст од 25 и 22 години, на 14 јануари, во раните утрински часови, со автомобил сер паркирале во близина на бензинска пумпа на локалниот пат од село ‘Ржаничино кон Катланово. Се маскирале со блузи што ги приспособиле како фантомки, со отвори за очите. Со ножеви во рацете им се заканиле на вработените барајќи да им го дадат дневниот промет на пумпата. На тој начин тие одзеле 7.815 денари и со возилото се оддалечиле од местото во правец кон селото Бадар, каде што го запреле автомобилот, но набргу биле откриени и фатени од полициски службеници.

Бидејќи постои опасност осомничените да се дадат во бегство, да ја попречуваат постапката со влијание врз сведоците/оштетените или да го повторат делото, јавниот обвинител до судијата за претходна постапка од Основниот кривичен суд Скопје достави предлог за определување мерка притвор.​​