Вчера, во 19.40 часот, на подрачјето на Ѓорче Петров, полициски службеници од Единицата за недозволена трговија при СВР Скопје ги лишиле од слобода Д. П. (20), Д. М. (19) и двајца малолетници, сите од Скопје.

При претрес во домот на Д. П., извршен со судска наредба, во кој биле затекнати и Д. М. и двајцата малолетници, биле пронајдени и одземени прашеста материја, семки од растението канабис и дигитална вага, а кај еден од малолетниците била пронајдена и одземена прашеста материја.

За настанот бил известен јавен обвинител, а по целосно документирање на случајот, ќе биде поднесена соодветна пријава.

На 3.10.2023, во 6.45 часот, на подрачјето на Ѓорче Петров, полициски службеници од Единицата за недозволена трговија при СВР Скопје го лишиле од слобода М. Ј. (31) од Скопје.

При претрес во неговиот дом, извршен со судска наредба, биле пронајдени и одземени марихуана и прашеста материја. За настанот бил известен јавен обвинител, а по целосно документирање на случајот, против него ќе биде поднесен соодветен поднесок.

По преземените мерки и активности, вчера, во Скопје, полициски службеници од Единицата за интервентна полиција при СВР Скопје го лишиле од слобода 18-годишниот Б. А. од село Студеничани, Скопско, кој беше баран по централен распис, извести МВР.

„Тој се сомничи дека на 28.8.2023, околу 4 часот, на улицата Градиште, во Старата чаршија во Скопје, со малолетник од с. Моране, Скопско, предизвикал пожар во угостителски објект. Малолетникот претходно беше лишен од слобода, а во домовите на двајцата беа извршени претреси, при што во домот на малолетникот беа пронајдени предмети што потекнуваат од кривичното дело“, соопшти МВР.

Од Единицата за насилен криминал – Одделение за крвни и сексуални деликти при СВР Скопје против двајцата беше поднесена кривична пријава поради постоење основи на сомнение за сторено кривично дело тешки дела против општа сигурност во врска со кривично дело предизвикување општа опасност. Б. А. е изведен пред судија на претходна постапка, кој му определил мерка притвор во времетраење од 30 дена по што бил спроведен во Казнено-поправната установа „Затвор Скопје“ за издржување на мерката притвор.