Ученикот кој вчера беше прободен во основно училиште во Ченто е во болница и е во добра состојба, вели градоначалникот на Општина Гази Баба, Бобан Стефковски. Нападот го извршил поранешен ученик, а повредениот е ученик во деветто одделение.

„Со жалење и сериозна вознемиреност ја примив информацијата за немилиот настан кој се случил во училиште во Ченто, каде што еден поранешен ученик кој минатата година го завршил своето образование во ова училиште, дошол и повредил ученик од деветто одделение. Во разговор со членови на семејството на повредениот ученик информиран сум дека детето е во добра здравствена состојба и се наоѓа на болничко лекување“, објави Стефковски.

Лицето кое го извршило нападот е уапсено. Според информации во јавноста, нападот се случил во основното училиште „25 Мај“. Од МВР известија дека 15 годишник вчера со остар предмет влегол во училиштето и повредил ученик.

Стефковски го осуди нападот и вели дека насилството не може да се оправда со ништо.

„Општина Гази Баба, останува во постојана координација со надлежните институции кои превземаат мерки за целосно расчистување на случајот“, вели градоначалникот.

Мицкоски и Муцунски ја кријат вистината, уставните измени се европско, а не билатерално прашање, изјави лидерот на СДСМ, Венко Филипче.

„Повторно видовме како функционира дипломатијата на ВМРО. Прво, Тимчо Муцунски премолче дека имал средба со бугарската министерка за надворешни работи, Велислава Петрова – Чамова. Потоа, кога излегоа информациите на европските медиуми, рече дека тоа било само кратка размена на зборови. Но, најважно од се, која е пораката на министерката на Бугарија, а што Тимчо Муцунски и Христо Мицкоски ја сокрија од јавноста. Ја цитирам – „Бугарија има јасно изразен став кој од 2022 година повеќе не е билатерално прашање, туку прашање меѓу Европската Унија и земја кандидат. Овај прозорец за проширување може да се отвори во наредните години и ако тие не го искористат навистина можат да изгубат“., рече Филипче.

Тој вели дека Бугарија потврдува дека прашањето за малцинствата во Уставот не е бугарско, туку е европско прашање и тоа е услов на Европската Унија, а не на Бугарија.

„Европско, а не билатерално прашање. Високата претставничка на ЕУ за надворешна и безбедносна политика Каја Калас, вчера исто така упати порака дека Брисел е подготвен да ги поддржи земјите од регионот, но дека истовремено се очекуваат и реформи. Истото го порача и Марта Кос, дека има место во Европската Унија за сите земји од Западен Балкан, но дека успехот зависи од спроведените реформи на земјите кандидати“, рече Филипче.

Тој обвини дека Мицкоски и Муцунски го блокираат европскиот пат за да ја заштитат, како што рече, својата криминална група и да продолжат со грабежот на државата.

„Што ветуваа, дека ќе го вратат името и дека ќе го поништат Преспанскиот договор? Гласаа против, а сега министерот Муцунски гостува на Еуроњуз и кажува колку НАТО, внимавајте, било позитивна стратешка одлука за иднината на државата и креирање на клима за инвестиции. Па вакво разобличување на уште една нивна лага на ваков европски канал досега немало. Луѓето кои што беа против НАТО, кои што беа против Преспанскиот договор, луѓето кои што ќе го поништуваа Преспанскиот договор и ќе го враќаа името, сега го фалат членството во НАТО“, рече Филипче.

Кадарот на Филипче, Заев и Ахмети испорачува за бандата и криминалците, Ислам Абази ја запре судската постапка за сомнителната набавка на мазут вреден 167 милиони евра, изјави Антонио Милошоски од ВМРО-ДПМНЕ.

„Шефот на ОЈО ГОКК, Ислам Абази, кој одработува за Филипче, Заев и Ахмети, односно за СДС и ДУИ, донесе контраверзна наредба за запирање на истрагата во предметот поврзан со набавките на мазут за потребите на ТЕЦ Неготино, вреден 167 милиони евра. Ислам Абази, соседот на Али Ахмети од Зајас, си ја одработува добиената функција шеф на ОЈО ГОКК, и по насока на триото Филипче, Ахмети и Заев, донесе одлука да се запре судска постапка во која осомничени меѓу другите беа и членот на СДС и бегалец од правдата Васко Ковачевски, и синот на пратеник од ДУИ, Асмир Јахоски и Ратко Капушевски“, рече Милошоски.

Тој кажа дека пред неколку часа дознал дека постапката против Васко Ковачевски и другите, за набавка на мазут е запрена. Обвинителството навело дека немале докази, но Милошоски прашува зарем бегството на Васко Ковачевски не е доказ или силна индиција дека осомничениот бега од правдата?

„Ковачевски не е во Македонија. Побегна кон крајот на 2024 година и оттогаш за органите на прогонот не е достапен. И наместо тоа да биде дополнителна индиција и мотив Обвинителството да го води овој случај, за обвинителот Абази тоа стана решение да го затвори овој случај. Нема присутен обвинет, нема водење на постапка, особено не ако припаѓаат на спонозорите на Ислам Абази“, рече Милошоски.

Тој потсети дека Антикорупциската комисија утврди дека на фирмата РКМ и биле платени повеќе пари за помалку доставен мазут. „Дури 18 илјади тони помалку мазут е скапо наплатен. Парите отишле во нечии џебови, а Мазутот не дошол. Дали дел од тие пари отишле кај менторите на Ислам Абази како обвинител?“, праша Милошоски.

„Денес поставуваме три прашања за кои очекуваме одговор: Прво, зошто Ислам Абази одлучи да ја запре оваа постапка и врз основа на чија проценка? Дали проценката е правна или лукративна? Второ, зошто запирањето дојде токму сега, додека Ковачевски е надвор од земјата и е недостапен за органите на прогонот? И трето, дали некој воопшто го побарал сведочењето на сите засегнати страни пред да се донесе оваа контраверзна и лукративна одлука?“, рече Милошоски и истакна дека Ковачевски треба се врати и да одговара, а ако е невин, нека го докаже тоа пред судовите, а не преку бегство и лукративно затворање на овој предметот.

ВМРО-ДПМНЕ го повика шефот на ОЈО ГОКК, Ислам Абази, веднаш да поднесе оставка, и, како што рече Милошоски, да ја остави работата на професионалците, коишто поради таквите обвинители како него, не можат да дојдат до израз во правосудството.