Како претседател на Собранието мојата главна одговорност е да ги почитувам и спроведувам Деловникот и неговите процедури, вели претседателот на Собранието, Африм Гаши, за случајот со Илире Даути.

„Во овој контекст, интерпелацијата на претседателот на Комисијата за социјална политика, демографија и млади, Илире Даути, беше спроведена во целосна согласност со Деловникот, законите и Уставот. Важно е да се напомене дека интерпелацијата, по својата природа, не носи правни последици или ефекти. Мојата улога како претседател заврши по завршувањето на процесот на интерпелација, како што се случи во случајот со интерпелацијата поднесена против мене пред неколку месеци“, соопшти Гаши.

Според него, прашањата, како што се разрешувања или оставки, се процедури на Комисијата за прашања на изборите и именувањата, пратеничките групи или пратениците.

„До денес не сум добил официјално известување за оставка од ниеден претседател на комисија.

Од процедурална гледна точка ова прашање е решено. Секое друго толкување, освен ова, е едноставно политичка реторика за дневна употреба и нема никаква правна основа, во која јас како претседател на Собранието нема да учествувам“, прецизира Гаши.

Со врнежи снег утрово свечено во употреба беше пуштен експресниот пат Градско-Дреново, долг 15,5 киломтери. За свеченоста, исто како и прд десет дена во Страцин, се собраа министри, директори, градоначалници, амбасадори и голем број граѓани.

Директорот на Јавното претпријатие за држави патишта, Коце Трајановски, потсети дека подготовките и плановите за овој експресен пат почнале во 2012 година со планови и проектирање, а договорот со првиот изведувач бил склучен во 2017.

„Во 2017 година е склучен договор со ’Терена скави’ од Италија меѓутоа со оглед на слабата реализација за само 3 години, по 30 и неколку проценти реализација, раскинат е договорот и во 2021 година е избрана фирмата ’Страбаг’ за изградба на оваа делница. До јуни 2024 година изграден е голем процент од овој пат, односно некаде од 80 отсто. Ја користам приликата да им се заблагодарам на сите оние кои учествуваа од идеја се до реализација на овие 80 отсто од овој експресен пат. Во јуни 2024 година морам да истакнам дека патот не беше завршен. По мојот избор за директор контстатиравме дека ’Страбаг’ една година беше повлечен од оваа делница поради нерешени финансиски проблеми и нерешени градежни и други технички проблеми. Скоро една година беа повлечени и вработените и механизацијата од оваа делница. Имаше тотален застој“, рече директорот Трајановски.

Проблемите ги надминале во септември кога повторно почнале градежните активности за довршување на останатите 20 отсто од експресниот пат за што Трајановски изрази низа благодарности на Владата , премиерот, министрите и градежниците.

Заедно со Градско – Дреново, во употреба беше пуштен и еден километар од патот Дреново – Фариш. Трајановски најави дека останатите девет километри од овој пат не се пуштени во употреба сега од безбедносни причини.

„Морам да кажам дека овој пат во голем процент исто така беше завршен меѓутоа од безбедносни причини со оглед на тоа што косините не беа добри и поради тоа што има карпести делови кои надвиснуваат на патот ќе се одложи неговото пуштање. Се надевам дека за неколку месеци ќе бидеме исто вака во голем број собрани да го пуштиме и овој пат и со тоа конечно ова тесно грло, овој опасен пат кој има многу црни точки да биде пат кој доликува на Македонија“, рече Трајановски.

„Ова е градба за македонските граѓани, не е политичка градба, нема ниеден од политичарите да ја стави во џеб и да си ја носи дома“, рече Мицкоски

Премиерот Христијан Мицскоски, слично како и на пуштањето на патот Крива Паланка-Страцин, во говорот уверуваше дека патот не е политичка градба и оти ниеден политичар нема да си го стави в џеб и да си го носи дома  туку е на граѓаните, но сепак ја искористи приликата и од бината им се заблагодари на опозициските партии кои седум години, додека беа власт, не го довршија патот, па морала оваа Влада да го заврши.

На свеченоста беше и амбасадорот на Европската Унија, Михалис Рокас, грчки дипломат кој на македонски јазик присутните ги поздрави со „Добар ден и среќна Нова година“. Патот Градско – Дреново рече дека претставува критичен дел од трансевропската мрежа која не поврзува како соседи и како партнери и дека не е само асфалт и бетон туку темел за напредокот на регионалната кохезија и заедничкиот прогрес.

За неколку дена од денес премиерот Мицкоски најави уште една свеченост – пуштање во употреба на првиот дел од пругата Куманово – Бељаковце.

Агресивната војна против Украина отвори можност за проширување на Европската Унија, но нема да има геополитички попуст, процесот на проширување ќе продолжи да се заснова на заслуги, изјави во комесарката за проширување, Марта Кос.

Таа разговараше со членовите на Комисијата за надворешна политика на Европскиот парламент. Посочи дека руската војна против Украина го оживеа процесот на проширување, но дека не треба да се очекува поради тоа да се разблажат условите за пристапување.

„Нема да има геополитички попуст, процесот на проширување ќе продолжи да се заснова на заслуги“, рече Кос. Таа изрази надеж дека во текот на следните шест месеци, за време на полското претседавање со Советот на ЕУ, Украина и Молдавија ќе може да отворат еден или два кластера, а земјите од Западен Балкан ќе отворат неколку кластери и ќе затворат некои поглавја.

„Доколку земјите кандидати истраат во своите реформски напори, би можеле да имаме поголем напредок за време на полското претседателство отколку во последните десет години. Можно е да се одржат 10 меѓувладини конференции за пристапување и мислам дека тоа е изводливо“, рече Кос. Таа додаде дека има реални изгледи за време на мандатот на оваа Комисија, една, две или три земји кандидати да стигнат до целта.

Истовремено, предупреди за сложеноста на процесот на проширување, кој е целосно во рацете на земјите членки, кои мора да дадат едногласна согласност за секој чекор во процесот. „Потребни се 150 едногласни одлуки за почнување и завршување на преговарачкиот процес на само една земја кандидат“, рече Кос.

Таа рече дека треба да се направи сѐ за да се избегнат билатералните прашања што влијаат на преговарачкиот процес, „но тоа веќе се случува и ќе се случува во иднина, па задача на сите нас е да ги решиме кога ќе се појават“.