Основното јавно обвинителство Скопје до Основниот кривичен суд Скопје поднесе обвинителен акт против едно лице што се oбидело да изврши кривично дело разбојништво.

Обвинетиот се товари дека на 27.12.2019 година влегол во аптека на булеварот Климент Охридски во Скопје и се заканил дека непосредно ќе нападне врз животот и телото на една вработена, која се наоѓала зад работниот пулт, па од неа побарал да му ги даде парите. Притоа, тој ставил маска на устата и ја откопчал јакната, а едната рака ја ставил во внатрешниот џеб каде што имал нож. Оштетената, исплашена за сопствениот живот, се стрчала кон магацинот, а обвинетиот тргнал кон неа. Во тој момент од магацинот излегол работник од агенцијата за обезбедување и го спречил обвинетиот во намерата да изврши разбојништво.

Надлежниот јавен обвинител до судот достави и посебен предлог за продолжување на претходно определената мерка притвор бидејќи оцени дека во конкретниот случај и натаму постои опасност обвинетиот да се даде во бегство, да влијае врз сведоците или да го повтори кривичното дело.