Арбен Таравари, поранешниот министер за здравство, ја објасни својата оставка во интервју за албанската телевизија МЦН. Како причина за напуштањето на Владата ја наведе игнорацијата кон Вреди и недостигот на координација меѓу албанските партии во владејачката коалиција.

„Ние како Алијанса за Албанците не сме навикнати да бидеме само декорација. Затоа решивме да одиме во опозиција и да се вратиме кај граѓаните. За нас е важно да се мобилизираме и да извојуваме победа на локалните избори во октомври“, изјави Таравари.

Тој посочи дека, иако првпат четири албански партии биле дел од една влада, во последните месеци дошло до сериозна дискоординација што, според него, ја искористила најголемата македонска партија.

Во меѓувреме, лидерот на ДУИ, Али Ахмети, синоќа од Арачиново му испрати порака на премиерот Христијан Мицкоски, обвинувајќи го дека со менување на Законот за употреба на јазиците и Охридскиот рамковен договор го загрозува мирот и стабилноста на државата.

„Албанците се над 30%, живеат на своите огништа и се нераскинлив дел од државноста. Ниту една сила не може да ја сопре оваа реалност“, порача Ахмети.

Политичките тензии се зголемуваат во момент кога се појавуваат гласини дека дел од пратениците на Европскиот фронт преминуваат во Вреди. Вицепремиерот Изет Меџити изјави дека најмалку четворица пратеници ќе се приклучат на новата група.

Од коалицијата Вреди, пак, денеска испратија соопштение во кое тврдат дека ДУИ се движи кон политичка бездна и дека Ахмети го доживува својот крај. Ги повикаа разочараните поддржувачи на Алијанса за Албанците да им се приклучат.

„Употребата на Таравари е само обид да се создаде димна завеса и да се скрие падот на ДУИ“, стои во нивното соопштение.

Новата пратеничка група Вреди, формирана пред два дена, моментално брои 9 пратеници, а нов координатор е Беким Ќоку. Дополнително, се најавува и посебна пратеничка група од крилото на Таравари во Алијансата, која според најавите ќе брои 5 пратеници и ќе поднесе барање до Собранието идната недела.

Наспроти најавите за потопло време, Управата за хидрометеоролошки работи (УХМР) предупредува дека ноќва и утре изутрина температурите во некои делови на државата ќе се спуштат под нулата. Се очекуваат минимални температури од -1 до 7 степени Целзиусови, а дневните ќе достигнат од 14 до 26 степени.

Од УХМР информираат дека следува период на стабилно и топло време, кој ќе трае до понеделник. Сепак, предупредуваат дека утринските часови ќе бидат студени, со што постои ризик за мраз, особено во ниските места и котлините, што може да предизвика штети кај чувствителните земјоделски култури.

„Во текот на наредната седмица, во попладневните часови ќе има локална појава на нестабилност, проследена со пороен дожд и ретки грмежи“, стои во најавата од УХМР.

Метеоролозите апелираат до возачите да бидат внимателни поради можна појава на лизгави делници рано наутро, како и до земјоделците да преземат мерки за заштита на посевите од утринскиот мраз.

Со поставување камен темелник денеска официјално започна реализацијата на инвестицијата на турската компанија „Шахтерм“, производител на грејачи и отпорници за бела техника и електрични апарати, во Технолошко-индустриската развојна зона (ТИРЗ) – Скопје. Во првата фаза, инвестицијата ќе изнесува 25 милиони евра и ќе отвори 200 нови работни места, додека во втората фаза се планира вкупна инвестиција од 50 милиони евра и преку 500 вработени.

Премиерот Христијан Мицкоски, присутен на поставувањето на темелите, истакна дека оваа инвестиција претставува важен чекор кон економскиот развој и индустрискиот напредок на земјата.

„Инвестицијата во првата фаза ќе изнесува 25 милиони евра со 200 нови работни места, додека планот е оваа инвестиција да има и втора фаза каде што вкупната вредност ќе изнесува 50 милиони евра, а бројот на вработени се планира да биде над 500“, изјави Мицкоски.

Тој додаде дека станува збор за проект кој потврдува стабилноста и економскиот напредок на државата, нагласувајќи ги последните економски показатели како позитивни сигнали за македонската економија.

„Индустриското производство во март 2025 година е пораснато за 5,2 проценти на годишно ниво. Странските директни инвестиции за 2024 година достигнаа 1,255 милијарди евра, со што Македонија е земја со најмногу странски инвестиции по глава на жител во Европа. Инфлацијата во март е под 3 проценти – 2,7, а во април 2,6 проценти. Платите растат од 9 до 10 проценти на годишно ниво, а кредитната активност во првиот квартал е зголемена за 13 проценти – што е шест пати повеќе од просекот во Европската Унија. Македонија е на добар пат да стане една од најбрзо растечките економии во Европа“, нагласи премиерот.

Фабриката на „Шахтерм“ ќе се протега на површина од над 13.000 квадратни метри и ќе вклучува и центар за истражување и развој. Ова ќе биде прв производствен капацитет на компанијата надвор од Турција.

Турскиот амбасадор во земјава, Фатих Улусој, изрази задоволство од почетокот на инвестицијата, истакнувајќи дека „Шахтерм“ е компанија која работи со најголемите светски брендови во индустријата.

„Ги охрабруваме турските бизнисмени да инвестираат во оваа земја и ќе продолжиме да го правиме тоа. Компанијата Шахтерм ќе го заземе своето место меѓу компаниите кои гордо ја претставуваат нашата земја во Северна Македонија и ќе го зголеми придонесот за економијата на Северна Македонија“, изјави Улусој.

Тој истакна дека трговската размена меѓу двете земји се приближила до 1 милијарда долари, со заедничка цел да се зголеми на 2 милијарди долари. Очекувањата се наскоро да започнат и преговори за ажурирање на Договорот за слободна трговија од 1999 година.

„Со многуте компании и организации кои работат во земјата – во банкарство, образование, култура, здравство, индустрија, обновливи извори на енергија, туризам, градежништво, земјоделство, текстил, малопродажба – Туркије ги продолжува своите економски врски и инвестиции со Северна Македонија“, рече Улусој.

Претседателот и основач на „Шахтерм“, Фарук Шахин, ја претстави компанијата и нејзините глобални капацитети.

„Имаме повеќе од 40 години искуство во дизајн и производство на системи за греење за бела техника и апарати за домаќинство. 60 отсто од нашето производство го извезуваме. Моментално сме дел од петте водечки компании во светот во оваа дејност. Работиме со брендови како ‘Вирпул’, ‘Амика’, ‘Горење’, ‘Беко’ и ‘Кенди’,“ рече Шахин.