Во последните 24 часа во Македонија се потврдени 316 нови случаи на коронавирус, 681 оздравен пациент и 11 починати, соопшти Министерството за здравство.

Во последните 24 часа се направени 1.562 тестирања, а регистрирани се 316 нови случаи на Ковид-19, и тоа во: Скопје – 164, Прилеп – 34, Куманово – 16, Кавадарци и Неготино – по 13, Тетово – 12, Гостивар – 10, Охрид – 9, Велес – 8, Гевгелија – 7, Штип – 6, Струмица, Струга и Кочани – по 5, Виница и Богданци – по 2, Кичево, Свети Николе, Крива Паланка, Делчево и Радовиш – по 1.

Регистрирани се 681 оздравен пациент, и тоа од: Скопје – 271, Кавадарци – 85, Прилеп – 42, Охрид – 31, Неготино – 28, Тетово – 24, Куманово – 23, Велес – 22, Струмица – 18, Делчево – 17, Гевгелија – 14, Штип – 13, Валандово – 12, Крива Паланка – 11, Струга, Гостивар и Битола – по 10, Богданци – 7, Кичево – 5, Крушево и Свети Николе – по 4, Радовиш и Кратово – по 3, Дебар, Берово и Кочани – по 2, Ресен, Виница, Демир Капија и Македонски Брод – по 1.

Пријавени се вкупно 11 починати лица – четворица пациенти од Скопје (76, 81, 79, 62), по двајца пациенти од Прилеп (77, 66) и Крушево (55, 76) и по еден пациент од Штип (65), Битола (85) и Охрид (59). Сите единаесет пациенти се починати во болнички услови.

Досега во земјата се направени вкупно 544.816 тестирања на Ковид-19.

Вкупната бројка на ковид-дијагностицирани лица во нашата земја од почетокот на епидемијата изнесува 107.479, бројката на оздравени пациенти е 95.410, на починати е 3.206, а бројот на активни случаи изнесува 8.863.

Од Јавното обвинителство велат дека активно постапуваат за утврдување кривична одговорност во предметите поврзани со групите „Јавна соба“, во пресрет на петтиот Марш за женските права, којшто е најавен за денеска со почеток од 15 часот, каде главен фокус ќе биде токму реакцијата на институциите по однос на овој счучај.

Од обвинителството посочуваат дека во врска со случајот „Јавна соба 1“ каде преку платформата „Телеграм“ се споделуваа интимни фотографии, нарушувајќи ја приватноста на жртвите, на 5 февруари годинава донеле наредба за спроведување истражна постапка против две лица за производство и дистрибуција на детска порнографија.

„Во периодот од 19 декември 2019 до 28 јануари 2020 година, двајцата осомничени, како основач и модератор на групата, биле должни да се грижат за содржината на текстуалните и аудиовизуелните содржини кои се споделуваат од членовите на групата. Но, тие со умисла дозволиле на групата да се направи достапна содржина – аудиовизуелен материјал на кој се прикажани очигледни полови дејствија со дете“, се наведува во соопштението на обвинителство во кое се додава дека истрагата во овој предмет е во тек и е во завршна фаза.

Во однос на вториот случај, „Јавна соба 2“, кој беше актуелен на почетокот на годинава, од обвинителството велат дека е во фаза на предистражна постапка.

„На 27  јануари годинава преку МВР од ‘Телеграм’ се побарани податоци за корисничките профили на креаторите, администраторите и членовите на групата. До овој момент од социјалната мрежа ‘Телеграм’ не е добиен одговор на ваквото барање. Овие податоци се неопходни со цел да се утврди идентитетот и Обвинителството да може кривично-правно да постапува против лицата инволвирани во оваа група“, посочуваат од обвинителството.

Поради ова, искористени се и механизми на меѓународна правна помош, па податоците се побарани и од Обединетото Кралство.

„Во Основното јавно обвинителство Велес во врска со ‘Јавна соба 2’ оформен е предмет и донесена е наредба за истрага против едно лице поради сомнение дека го сторило кривичното дело производство и дистрибуција на детска порнографија“, објаснуваат од обвинителството и додаваат дека при вештачење на мобилниот телефон на осомничениот, пронајдени се видеозаписи со детска порнографија.

Во однос на „Јавна соба 2“ оформени се предмети и во Битола, Прилеп и Кавадарци.

Битолското основно јавно обвинителството има издадено наредби за вештачење на ЦД и на мобилен телефон во насока на прибирање материјални докази, а во Прилеп од пријавеното лице се одземени два мобилни телефона и издадена е наредба за нивно вештачење.

Во Кавадарци во тек е прибирање на материјали докази, за кои обвинителството во моментов не е во можност да сподели детали.

Инаку, петтиот Марш за женските права, по повод Меѓународниот ден на жената, ќе се одржи под мотото „Држава што не постапува е држава што силува“.

„Маршираме за поддршка на сите жртви на криминалната група ‘Јавна соба’ и сите жртви на родово засновано насилство. Маршираме за да ги потсетиме институциите, МВР и Јавното обвинителство дека нема да застанеме додека не ги исполнат нашите барања“, велат организаторите на маршот.

Грција ја продолжи забраната за пристигнување патници од околните земји по воздушен, копнен и морски пат, а тоа правило важи и за патниците од земјите од третиот свет. Забраната важи две недели, поточно до 22 март.

Минатата недела Грција ги засили мерките на граничните премини Евзони и Какавија на северот на земјата, кон Северна Македонија, односно Албанија.

Царината работи пократко (од 7:00 до 17:00 часот) и бројот на лица кои можат да влезат во земјата дневно е ограничен на 400, а за нив е задолжителен четиринаесетдневен карантин.

Секој што сака да влезе во Грција мора да помине брз антиген тест за ковид, вклучително и возачи на камиони.

Новите ограничувачки мерки предизвикаа проблеми, па грчките и македонските возачи протестираа на Евзони во петокот.

На туристите исто така не им е дозволен влез, но тие можат да дојдат преку преминот со Бугарија Промахонас, потребно е само да покажат негативен ПЦР-тест направен во претходните 72 часа.

На граѓаните на земјите членки на ЕУ, како и на државјаните на Австралија, Нов Зеланд, Јужна Кореја, Тајланд, Обединетите Арапски Емирати, Велика Британија, Русија и Израел не им е забранет влез.

Здравствените работници, жителите на ЕУ, членовите на дипломатските мисии, дипломатите, возачи на камиони, транзитни патници, студенти, негуватели на стари лица и инвалиди и сезонски земјоделски работници се изземени од забраната за влез.