Од страна на полициски службеници од Единицата за внатрешни работи Аеродром и Драчево, на 14 септември, при обид за тешка кражба во црквата „Св. Петар и Павле“ на улица Горно Лисиче бил фатен и лишен од слобода 25-годишниот Ѓ.П. од Скопје.

Како што информираат од МВР, тој бил приведен во полициска станица и со него бил извршен службен разговор, при што 25-годишникот ги појаснил делата извршени во помошните простории на црквата.

Имено, истиот ден, тој со употреба на сила влегол и во капелата „Христово воскресение“, одзел пари и предизвикал пожар, кој за кусо време се изгаснал.

Во координација со Јавен обвинител, против него ќе следува соодветна кривична пријава.

Во скопското село Љубин, вчера околу 19.30 часот, единицата за интервентна полиција при СВР Скопје го уапсила 39-годишниот Е.А.

Како што информираат од МВР, при претрес во неговиот дом, извршен со судска наредба, биле пронајдени и одземени „битмејн“ и графички картички, кои потекнуваат од кривично дело тешка кражба извршена на 14 март годинава на улицата „Петар Драганов“, а биле користени за копање биткоини.

При претесот, исто така, било утврдено дека 39-годишникот врши и кражба на електрична енергија.

Тој бил приведен во полициска станица и по целосно документирање на случајот против него ќе бидат поднесени пријави за тешка кражба и кражба на електрична енергија.

Сообраќајната полиција во текот на вчерашниот ден (17 септември) спровела акциски контроли на територијата на град Скопје.

Како што информираат од МВР, притоа изречени биле вкупно 184 мерки, меѓу кои за возење повеќе од дозволената брзина 39 санкции, 27 за возење без возачка дозвола, шест за возење под дејство на алкохол, десет за технички неисправни и нерегистрирани возила.

Изречени биле и 9 мерки за користење мобилен телефон, 4 за некористење сигурносен појас, 8 прекршоци што ги чинат возачите на мотоцикли, како и 50 за непрописно паркирање.

Од ресорното министерство нагласуваат дека засилените акциски сообраќајни контроли ќе продолжат во текот на викендот.