Големи се шансите на 2 и на 7 април, доколку нема слух од спротивната страна, Сојузот на синдикатите на Македонија (ССМ) да излезе на протести, исто како и минатата година, најави денес претседателот на ССМ, Слободан Трендафилов. Место разбирање од Владата за покачување на минималната плата, Tрендафилов вели дека добиле ниски удари од политички структури на ВМРО-ДПМНЕ, партија која, место во парламентот со другите политички партии, се пресметува со ССМ.

„Јас лично како Слободан Трендафилов не знаев дека сум толку јак да ја обединам целата опозиција да застане зад мене и да поддржи зголемување на платите на работниците, а од друга страна, партијата на власт да се плаши од еден човек на кој планира да му ја скине главата. Тоа што сакам да го порачам денеска е дека нема да дозволиме апсолутно никому, без оглед дали доаѓа од власта или од опозицијатата, како ССМ, како организација што постои 79 години во Македонија, да ја напаѓаат. И не само да ја напаѓаат туку да работат и со политички наредби на локално ниво во јавните претпријатија, како и во министерствата од политичката партија ВМРО-ДПМНЕ, со наредба до нивните директори полтрони на нивните раководители и шефови да прават упади во локалните организации на ССМ сѐ со една цел – да го зајакнат КСС на сметка на работниците во Македонија, да прифати минималната плата да изнесува 24.400 денари“, рече претседателот на ССМ, Трендафилов.

Ги повика колегите од другите синдикати да кажат дали се за покачување на платите до 5,5 или сакаат заеднички да се изборат за 12,6 % покачување на платите на сите вработени во јавниот сектор, како и дополнително зголемување на минималната плата за 6.000 денари.

„Ако некој смета дека 24.400 денари е доволна плата за работниците во Македонија како минимална плата под која не може да се исплати ниедна плата, а најниската плата во регионот е 457 евра во Србија, мислам дека ќе треба да ги запалат автобусите и да нѐ преселат сите од Македонија, нешто што мислам дека треба да ги загрижи апсолутно сите“, рече Трендафилов.

И денес тој обвини дека Владата ги повлекла членовите од комисијата за утврдување репрезентативност за работниците да не може да се изборат за предлогот 500 евра минимална плата, а Владата пак да се оправда дека немала со кого да разговара.

Премиерот Христијан Мицкоски минатата недела најави дека членови на комисија за утврдување репрезентативност ќе назначат на утрешната владина седница за да може да се одржи седница на Економско-социјалниот совет и да продолжат преговорите за минималната плата да се искачи на 500 евра.

ССМ предложи, покрај усогласувањето овој месец, минималната плата да се покачи за дополнителни 6.000 денари, износ за кој побара Владата или да се откаже од придонесите или да ги субвенционира во рок до 12 месеци.

Претседателот на Судскиот совет, Александар Камбовски денеска изјави дека набрзо ќе биде избран в.д. претседател на Врховниот суд, а изборот како што појасни доцни бидејќи се уште не се спроведени постапките за интегритет и психолошкиот тест.

„Комисијата не успеа да го направи тоа, бидејќи имавме повеќе од 70 кандидати од Академија, кои исто така се тестираа. Претпоставувам тоа беше причината што повеќе се даде приоритет таму, бидејќи има многу кандидати и така се пролонгира постапката. Меѓутоа за брзо време ќе биде избран. Затоа изборот е ставен на седница на Судски совет, бидејќи во среда истекува мандатот на актуелниот претседател на Врховен суд, појасни тој пред почетокот на седницата на Судски совет.

На прашањето дали седниците на Судскиот совет кои се закажани за денеска и утре се користат како алиби за членовите за кои се бара интерпелација, да не присуствуваат на седницата на Собранието, Камбовски рече дека не постои таква намера.

„Апсолутно не. Немаше никаква намера. Ние кога се закажуваше нашата седница не знаевме дека ќе биде на иста дата и собраниската седница. Нашава седница воопшто не е пречка таа да биде одржана, и обратно, собраниската, пак, да биде пречка нашава да се одржи. Доколку некој од колегите изрази желба да отиде таму и да даде изјава, ние тука ќе ја прекинеме седницата и ќе почекаме да се врати. Значи нема да има никаква пречка ниту во Собрание, ниту во Судскиот совет“, појасни Камбовски и додаде дека останува да одлучат сами дали ќе бидат присутни на собраниската седница или не.

„Тоа е нивен избор, јас не можам во нивно име да кажувам, и не знам кој од нив одлучил да оди и да го користи правото да се обрати на Собранието. Доколку некој одлучи, ние тука ќе ја прекинеме седницата, ќе дадеме можност на колегата да отиде во Собрание, да си даде таму изјава, па ќе го почекаме да се врати назад и ќе продолжиме со нашата работа“.

Околу тоа дали очекува некој од нив да поднесе оставка, одговори дека тоа е личен чин.

„Не знам, тоа е личен чин, индивидуална одлука. Не можам јас, ниту очекувам, ниту не очекувам. Не знам како ќе се одлучат колегите, посочи Камбовски.

Камбовски кажа дека има пријавено кандидати за судии во сите судови, но нагласи дека смета оти нивниот избор нема да ги реши проблемите, туку само ќе ги ублажи.

„Треба уште судии за основните судови. Со ова го ублажуваме проблемот, но не го решаваме целосно’, нагласи тој.

Министерот за дигитална трансформација Стефан Андоновски не ги поништил тендерите за набавка со компанијата сопственост на сопругот на државната секретарка во Министерството за да не ја изложи институцијата на судски постапки. Денес, на прес-конференција, по последните обвинувања од СДСМ, рече дека до потписот не знаел чија е компанијата, но поради презимето истражил.

„До потписот јас не знаев дека постои ваква фирма, но поради презимето, истражив и бев ставен во една ситуација, доколку ја поништам постапката, го ставам Министерството на трошок да се спроведуваат против нас судски постапки, кои биле пракса во минатото, и да плаќаме пенали затоа што фирмата ги исполнува сите законски услови и нема ниедна законска пречка зашто таква фирма не треба да учествува на јавна набавка. Уставно право на секој граѓанин е да учествува во првниот промет. Ние сите потпишуваме изјави за судир на интереси и во овој случај ниту дел од мојата изјава за судир на интереси или изјавата за судир на интереси на вработените што учествувале во постапката не е прекршена“, рече министерот Андоновски.

Иако истражил чија е компанијата, Андоновски нагласи дека како министер нема законска можност или простор за истражување на контактите на секој од 150 вработени во Министерството и нивниот однос со приватни компании.

Државната секретарка Андоновски вели дека не учествува во ниедна фаза од постапките за јавна набавка, па од тука нема судир на интерес, но ги повика институциите да истражат.

Објасни дека не го оштетил, туку му заштедил да Министерството со изборот на компанијата.

„Лага број еден на СДСМ е дека договорот е на сума од 2,5 милиона денари.

Постигната е цена од 1.531.927,00 денари, која е речиси 40 % поевтина од планираната сума за јавната набавка од 2.500.000,00 денари. На тој начин заштедени се приближно еден милион денари (16 илјади евра) пари на граѓаните. Предвидените производи се навремено и квалитетно испорачани при преселбата на Министерството. При дополнително направената анализа направени се заштеди од 10 до 45 % од производ во споредба со пазарните цени, нешто што никогаш не било случај во време на владеењето на СДСМ. И втората набавка, за проект што СДСМ го блокира, е мала, од 500 илјади денари, во која исто така се постигнати пониски цени од пазарните до 40 %“, објасни министерот Андоновски.

Тој најави тужба за клевета против СДСМ доколку не му се извинат за сите напади изминативе недели.

„На крајот, дозволете да кажам нешто лично. СДСМ со недели не престанува да ме навредува, омаловажува, лаже за мене и за моето семејство. Ги повикувам за изнесените невистини и лаги и на денешната прес-конференција да се извинат. Во спротивно, ги задржувам правото и можноста да побарам нивна одговорност за навреда и клевета пред судовите во Македонија. Тоа не го направив досега, но веќе со тенденциозноста на нападите ме предизвикуваат да го направам“, рече министерот Андоновски.

СДСМ денес обвини дека во Министерството со кое раководи Андоновски, а државна секретарка е Гордана Клинчарова, тендери добива нејзиниот сопруг Мартин Клинчаров.