23-годишната Н.А. била зад воланот на возилото „Ауди“ кое пред два дена излелета од патот Сарај-Рашче и заврши во реката Вардар, информираат од МВР.

Несреќата резултираше со три жртви кои беа заглавени во превртеното возило во реката, а во текот вчерашниот дена, во 14:48 часот, беше пронајдено и безживотното тело на исчезнатото машко лице, А.А., во близина на местото на несреќата.

Полицијата го објави идентитетот на трите женски лица Н.А.(23), В.А.(25) и З.А.(59) сите од село Грчец, скопско. Единствено кој ја преживеа оваа несреќа беше 5-годишното момче кое излетало од возилото за време на падот. Тоа се спасило држејќи се за гранките, а беше пронајдено од локални минувачи.

Во соопштението од полицијата се потврдува дека е пронајдено машкото лице по кое се трагаше. На ова тело, како и на претходните жртви, јавниот обвинител издаде наредба за извршување обдукција, со цел утврдување на точните причини за смртта.

„Се работи на утврдување на причините за трагичната несреќа, а обвинителството продолжува со истрагата. Трагичните настани ги потресоа сите нас и напоменуваме дека истрагата ќе продолжи со цел да се утврдат сите околности“, изјавија од ОЈО.

Инаку детето кое беше повредено во сообраќајната несреќа кај Рашче, се очекува наскоро да биде пуштено на домашно лекување.

„Детето е во стабилна општа состојба, не е витално загрозено. Од денеска се наоѓа на оддел, значи не е повеќе на интензивна нега. Очекувам наскоро да биде пуштено на домашно лекување. Вчера имаше интензивен мониторинг, денеска контролни по протокол, биохемиски параметри за споредба, стабилно е, мислам дека сѐ ќе се разреши поволно за детето, кое има пет години“, изјави вчера директорот на Детска хирургија.

Полицијата продолжува со истражување на настанот и преземање на сите неопходни мерки за расветлување на сообраќајната несреќа која заврши со човечки жртви.

30-годишен скопјанец бил тешко повреден откако вчера во него удрило возило, по што возачот го напуштил местото на настанот.

Како што информираат од полицијата несреќата се случила вчера во 20:20 часот на паркинг простор на улицата Џон Кенеди во Скопје

Пешакот, кој се здобил со тешки телесни повреди, бил однесен во Градската општа болница „Св. Наум Охридски“, каде што му биле констатирани повредите.

Според информациите од полицијата, веднаш по пријавата, на местото на несреќата пристигнала увидна екипа од СВР Скопје, која спровела увид и ги прибрала сите потребни податоци.

„Се преземаат сите мерки за идентификување и пронаоѓање на сторителот. Насочени сме кон откривање на идентитетот на возачот и ќе преземеме соодветни законски мерки“, велат од СВР Скопје.

Полицијата продолжува со истрагата за утврдување на сите околности на случајот.

Две малолетни лица од Шпанија на возраст од 16 години вчера биле приведени на скопскиот аеродром.

Тинејџерите кои патувале со своите родители се уапсени бидејќи при контролата на нивниот багаж се пронајдени и одземени пиротехнички средства.

„По инцидентот, настанот беше пријавен во Основното јавно обвинителство (ОЈО) Скопје, како и до обвинител за малолетни лица. Беа дадени насоки за поднесување прекршочна пријава против малолетниците согласно Законот за експлозивни материи, додека со родителите ќе биде извршен информативен разговор“, информираат од МВР.

Полицијата продолжува со истрагата за утврдување на сите околности поврзани со инцидентот.