Полицијата во скопската населба Карпош поднесе кривична пријава против 36-годишен скопјанец со инцијали И.А, поради сомнение дека сторил кривично дело „затајување“.

Како што информираат од МВР, на 19 мај годинава, додека пријавениот бил на работното место на улица „Варшавска“ во Скопје, своеволно и без дозвола од работодавачот, од благајната на видео-лотариските терминали одзел 90.000 денари.

Подоцна, по пристигнување на менаџерот, заедно ги преброиле парите и бил констатиран кусок, по што му било побарано да ги врати парите, но работникот не го сторил тоа.

Синоќа, нешто по еден часот по полноќ, полицијата уапсила тројца жители на скопското село Бојане, А. Ќ. (23), М. Ќ. (30) и Г. Ќ. (25), поради сомнение дека претходно направиле инцидент пред угостителски објект во Сарај.

Како што информираат од МВР, во инцидентот што избувнал поради претходно меѓусебно нетрпение биле употребени огнено оружје и остар предмет.

Притоа повреди од огнено оружје добил В. Ќ., a повреди од остар предмет Ф. М., по што биле пренесени во Градската општа болница „8 Септември“, односно во комплексот клиники „Мајка Тереза“ за укажување лекарска помош.

Тројцата насилници се приведени во полициска станица за понатамошна постапка и се преземаат мерки за расчистување на случајот.

По повеќемесечно криминалистичко истражување, денеска Одделот за сузбивање организиран и сериозен криминал во координација со Единицата за специјални полициски операции спроведоа акција за сузбивање повеќечлена организирана криминална група.

Како што информираат надлежните, скопската група била со строго утврдена хиерархија и структура и се занимавала со продажба на дрога и оружје.

Во денешната акција извршени биле претреси на вкупно 20 локации, при што приведени се 12 лица од Скопје, меѓу кои и 33-годишен полицаец со иницијали Р. А.

Другите уапсени, меѓу кои има и една жена, се на возраст од 19 до 47 години: Б. А. (22), Б. А. (19), М. А. (47), Б. А. (23), С. Ј. (22), Е. Б. (27), З. М. (33), Љ. А. (30), Ш. А. (35), А. А. (26) и Е. С. (24).

Полицијата соопшти дека се трага по уште три лица што биле дел од групата.

При извршените претреси на повеќе локации се пронајдени дрога, муниција, два пиштола, автомобили, од кои еден блиндиран, поголема сума девизни и денарски парични средства, мобилни телефони и компјутерска опрема.

Надлежниот јавен обвинител, по добиената кривична пријава, ќе донесе наредба за спроведување истрага против лицата и ќе му предложи на судот да одреди притвор за сите осомничени.