Рано утрово луксузен „ланд ровер“ беше опожарен на улицата Моша Пијаде во Куманово.

Настанот бил пријавен во СВР Куманово на 30 август 2025 година, околу 05:10 часот, од лицето Б.Ц. Пожарот бил забележан на возилото сопственост на А.Г., кое веднаш било гаснато со помош на сопственикот и негов сосед, спречувајќи поголема катастрофа.

По насоки на дежурен јавен обвинител, увид извршила увидна екипа на ОКТУПА при СВР Куманово. Констатирано е дека станува збор за подметнат пожар. Засега непознат сторител со непозната течност го испрскал возилото на повеќе места, ја запалил и потоа успеал да побегне без да биде забележан.

Од полицијата информираат дека е причинета материјална штета во износ од околу 120.000 денари, а истрагата е во тек.

Полицијата во Скопје спречи грабеж извршен од двајца тинејџери, кои нападнале доставувач и му го украле ранецот со пратки.

На 29 август 2025 година, околу 18:20 часот, полициски службеници од СВР Скопје ги лишиле од слобода 17-годишен и 15-годишен малолетник, двајцата од скопско.

Според информациите, истиот ден околу 16:40 часот, малолетниците со употреба на физичка сила го нападнале 23-годишниот У.Д. од Скопје, кој во моментот извршувал работни задачи како доставувач на пратки. Тие му го одзеле ранецот со пратки, по што се обиделе да избегаат.

Брзата реакција на полицијата довела до нивно пронаоѓање и приведување во Визбегово. По целосното документирање на случајот, против нив ќе биде поднесен соодветен поднесок.

34-годишниот И.П.С од Скопје вчера бил уапсен во Неготино  откако неговата 36-годишна поранешна сопруга пријавила дека упаднал во нејзиниот дом во Неготино.

Според пријавата, мажот ѝ упатил сериозни закани и физички ја нападнал. Благодарение на брзата реакција на полицијата, тој бил веднаш приведен и задржан во полициската станица.

За случајот бил известен јавен обвинител и Центарот за социјални работи во Неготино, а по целосното документирање на настанот против насилникот ќе биде поднесен соодветен поднесок.

Нема информации за повреди на жената, но случајот повторно го отвора прашањето за заштитата од семејно насилство и потребата од брзи институционални реакции.