Oбвинител од Основното јавно обвинителство за гонење организиран криминал и корупција денеска донесе наредба за истражна постапка против шест лица.

Четворица од осомничените заедно, со умисла извршиле повеќекратно остварување на кривичното дело трговија со луѓе, а и останатите двајца се товарат дека го сториле истото кривично дело.

Во периодот од декември 2021 година до април 2022 година, трето и четврто осомничените – мајка и сестра на посебно чувствителната жртва, ја врбувале девојката​ злоупотребувајќи ја својата положба како најблиски роднини на жртвата врз која имаат контрола, како и нејзината ментална неспособност.

Потоа ја предавале на прво и второ осомничените кои ја прифаќале и засолнувале во нивните домови заради сексуална експлоатација со нив и со други засега непознати лица, за што на осомничените мајка и сестра на жртвата им давале надомест во пари или друга корист.

Жртвата е пронајдена од страна на полициските службеници од МВР во домот на шестоосомничениот кој ја прифатил со цел сексуално и трудово да ја искористува за надомест од 5.000 денари.

Надлежниот обвинител цени дека постојат услови кои укажуваат на неопходноста од определувањето на мерката притвор, односно дека осомничените ќе се дадат во бегство, ќе ја попречуваат истрагата со сокривање или уништување на трагите на кривичните дела, особено земајќи го предвид фактот што од страна на обвинителството сè уште се преземаат дејствија за собирање и обезбедување докази важни за правилно утврдување на фактичката состојба.

Воедно, постои основано сомневање доколку осомничените бидат на слобода можат да влијаат и да се закануваат на потенцијалните сведоци, како и да го повторат делото.

Поради сите овие околности, обвинителството му предложи на судијата на претходна постапка при Основниот кривичен суд Скопје да им биде определена мерка притвор на сите осомничени.​