Топ
Издадени наредби за обдукција на убиениот лекар и за обезбедување снимки од видеонадзорот
Дежурен јавен обвинител од Основното јавно обвинителство Скопје изврши увид на самото место во скопската населба Железара, каде што во текот на ноќта беше пронајдено безживотно тело на лекар со повеќе убодни рани. Телото на починатиот го пронашол синот.
„Јавниот обвинител издаде наредба за обдукција, како и наредба за прибирање и анализа на сите траги пронајдени на самото место и за обезбедување снимки од видеонадзорот. Се преземаат дејства за расчистување на настанот“, велат од Обвинителството.
Вчера, во 23.09 часот, во СВР Скопје било пријавено дека во сопственото возило „киа“, со скопски регистарски ознаки, во парк во близина на Поликлиниката „Железара“, со убодни рани на телото бил пронајден А. Т. (67) од Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Британски дипломат: Трамп најверојатно ќе победи, Камала ја прави истата грешка како Хилари
Доналд Трамп ќе победи на претседателските избори во САД на 5 ноември, освен ако демократската кандидатка Камала Харис не ги реши клучните пропусти во нејзината кампања, според поранешен британски амбасадор во Вашингтон.
Ким Дарок вели дека и покрај тоа што постигна јасна победа над Трамп во минатонеделната телевизиска дебата во живо, Харис ризикува да направи две клучни грешки во последните недели од кампањата, што значи дека поранешниот претседател сè уште е фаворит.
Тој истакна дека е важно што британскиот премиер Кир Стармер, кој се состана со американскиот претседател Џо Бајден и другите водечки демократи во Вашингтон минатата недела, сега бара средба со Трамп и неговиот тим, за да се изградат врски на двете страни.
„Важно е Стармер да ги запознае двајцата. Тимот на Трамп ќе го забележи тоа и ќе му замери ако не го направи тоа“, убеден е Дарок. Тој беше британски амбасадор во САД од 2016 до 2019 година, кога поднесе оставка поради протечените доверливи мејлови во кои се критикува администрацијата на Трамп како „несмасна и неспособна“.
„Трамп е сè уште способен да се поврзе со „аутсајдери“ на ниво на кое малкумина можат да се совпаднат, талент кој обезбедува посветена и трајна база на поддршка во земја каде што секој трет работник вели дека живее од плата до плата“, објасни тој за Обсервер.
Тој предупреди дека Демократската кампања е во опасност да направи две исклучително важни грешки. Тој ја повика Харис „ласерски да се фокусира“ на гласачите во клучните сојузни држави Мичиген, Пенсилванија и Висконсин во кои Бајден победи пред четири години.
Тој тврди дека гласачите во тие држави би можеле да се свртат кон Трамп, освен ако Харис не понуди „некои јасни, конкретни, насочени политики за враќање на работните места и надежта во уништените квартови“.
Тој додаде дека втората грешка на Камала Харис е што се крие од медиумите, како некогаш Хилари Клинтон.
„Трамп во 2016 година беше постојано присутен. Тој го прифаќаше секој повик. Тој дури и се јавуваше во утринските вести, непоканет, за да ги каже своите ставови за дневните прашања. Спротивно на тоа, Хилари Клинтон ги исклучи медиумите – и изгуби“, изјави тој.
Македонија
Бугарскиот амбасадор повикан во МНР: „Побаравме објаснување од бугарската страна за фотографирањето“
Денеска, во Министерството за надворешни работи и надворешна трговија беше повикан амбасадорот на Република Бугарија, Желјаско Радов, каде беше изразена загриженост поради отстапувањето од договорениот протокол за фотографирањето на двајцата претседатели, при што дополнително беше побарано објаснување од бугарската страна, соопшти Министерството.
Во разговорот со бугарскиот амбасадор било потенцирано дека средбата и заедничкиот ручек на двајцата претседатели поминале во пријателска атмосфера.
Дополнително, на амбасадорот Радуков му било укажано дека Министерството за надворешни работи и надворешна трговија е непријатно изненадено од последната изјава на амбасадорот Ангел Димитров, претседавач на бугарскиот дел од Заедничката мултидисциплинарна експертска комисија за историски и образовни прашања, дадена во емисијата „Офанзива со Љубомир Огњанов“ на НОВА Вести.
„Изјавата во основа го нарушува начелото дека претседавачот на експертската комисија не треба да дава политички изјави за Владата на соседна држава, која е легитимно избрана. Сметаме дека оваа изјава е несоодветна и непримерна“, велат од МНР.
На средбата во Министерството за надворешни работи и надворешна трговија, на амбасадорот Радуков, исто така, му било пренесено дека Република Северна Македонија и понатаму останува посветена на позитивен развој, унапредување и зајакнување на билатералните односи и соработката во сите области од заемен интерес за двете држави и нивните народи, за што била потврдена подготвеност и од другата страна.
Македонија
Од почит кон Бугарија, поради авионската несреќа, Муцунски не реагирал јавно во петокот за фотографирањето без македонското знаме
Пропуст и непочитување на договореното од страна на бугарскиот протокол e фотографирањето на македонската претседателка Гордана Сиљановска-Давкова со бугарскиот претседател Румен Радев, без македонското знаме, покрај знамињата на Бугарија и на Европската Унија, објаснија денес од Министерството за надворешни работи и надворешна трговија. Министерот Тимчо Муцунски, кој заедно со министерот за култура, Зоран Љутков, беше дел од делегацијата што ја придружуваше претседателката Сиљановска-Давква. Од Министерството за надворешни работи велат дека иако биле делегација од повеќемина, во работните простории на претседателот Радев, каде што била средбата, ѝ било дозволено да присуствува само на претседателката Сиљановска-Давкова. Другите членови на делегацијата како нејзина придружба биле сместени во посебна просторија.
„Фотографирањето беше на пат кон средбата меѓу претседателите. Македонскиот и бугарскиот протокол имаа координација пред средбата и јасно беше определено дека нема фотографирање. Ние сега бараме одговор на прашањето зошто бугарската страна отстапила од јасно договорениот протокол“, велат од Министерството за надворешни работи и нагласуваат дека по средбата, целата делегација заминала на заеднички ручек, на кој уверуваат дека имало и македонско знаме.
Иако можел веднаш да реагира на фотографирањето без македонско знаме, министерот Муцунски ја одложил реакцијата за првиот работен ден по посетата. Од Министерството објаснуваат дека министерот не реагирал од почит кон Бугарија поради авионската несреќа, во која загинаа двајца пилоти.
„Имаше консултации, но министерот не реагира јавно за време на посетата од почит оти фотографирањето беше само неколку часа по авионската несреќа во Бугарија, во која загинаа двајца пилоти. Беше оценето дека е несоодветно јавно да се реагира поради трагедијата“, уверуваат од Министерството за надворешни работи.
Од таму не објаснија зошто веднаш не реагирал македонскиот протокол, туку го дозволиле фотографирањето.
Денес, на состанок во Министерството е повикан бугарскиот амбасадор во Македонија, Желјазко Радуков, кому ќе му биде врачена протестна нота. Тоа нема да го направи министерот Муцунски, туку директорот на Инспекторатот за регионални инцијативи оти така било соодветно, објаснија од Министерството за надворешни работи.
Претседателката Сиљановска-Давкова и министрите Муцунски и Љутков во петокот имаа културно-дипломатска мисија во Бугарија. Отидоа за да го проследат настапот на Националната опера и Балет со операта „Набуко“ од Џузепе Верди, а настанот беше искористен и за средба на претседателката со бугарскиот претседател.