Граѓаните што имаат потреба од уверение за остварен приход, за да го извадат документот, повеќе не мора да одат на шалтерите на Управата за јавни приходи (УЈП) оти услугата е достапна електронски. Директорката Елена Петрова вели дека корист од дигитализирањето на услугата ќе имаат граѓаните што нема да чекаат на шалтерите, но и УЈП, оти системот автоматски ќе ја врши работата што за завршувале 29 службеници.

„Придобивките за граѓаните се добивање на уверението без физичко доаѓање на шалтерите во УЈП, без чекање во редови, за помалку од пет минути, со само неколку клика на компјутер или на мобилен уред, во кое било време. Освен граѓаните и УЈП, има и други придобивки од новиот процес бидејќи новата услуга ќе ослободи од други работни задачи речиси 30 вработени во УЈП. Ако просечниот број издадени уверенија на шалтер на годишно ниво е приближно 31.000, а вработените трошат во просек ефективно во просек околу два часа работно време за изработка на уверението, заштедата на УЈП е речиси 62.000 работни часа годишно и ова значи дека новата услуга ќе ослободи од други работни задачи 29 вработени во УЈП, чија работа изразена во работни часови изнесува речиси 62.000 часа годишно“, вели директорката Петрова.

Процесот е целосно автоматизиран и во најголем број случаи уверението е ослободено од плаќање административна такса, но кога е за определени цели, се наплаќа 100 денари и самиот процес на плаќање на таксата е целосно интегриран во автоматската процедура.

Директорката Петрова нагласи дека уверението е целосно усогласено со законот и правилникот за електронски документи, што обезбедува целосна доверливост и правна сигурност на документот што го издава УЈП. Услугата користи електронски временски жиг и QR-код со линк за пристап до оригиналниот електронски документ, што овозможува лесна верификација на неговата валидност.

Петрова вели дека електронското уверение е прва фаза од поголем реформски проект на УЈП, со кој во блиска иднина и другите уверенија и потврди што ги издаваат ќе станат електронски документи и ќе се администрираат бесконтактно и безхартиено. Со ова УЈП поставува нова нормала за управување со даночните услуги.

Пратеничката група на Социјалдемократскиот сојуз на Македонија и коалицијата, на денешената прес-конференција пред Министерството за финансии, побараа оставка од министреката за финасии после вчерашните дискриминаторски навреди упатени кон пратеничката на СДСМ, Славјанка Петровска.

На прес-конференцијата, пратеничката Јована Тренчевска, нагласи дека министерка која понижува граѓанки не заслужува да води министерство.

„Министерка која понижува граѓанка на оваа држава, која навредува пратеничка, која шири дискриминација, не заслужува да води министерство, не заслужува да седи во влада која тврди дека работи за сите граѓани. Затоа, денес сме тука, гласно и јасно да побараме – Гордана Кочоска мора да си поднесе оставка. Оставка ќе бараме секој ден додека не си оди од функцијата. Само така може да ги заштитиме граѓаните од идна дискриминација“, рече Тренчевска.

При тоа посочи дека оваа осуда не смее да трае само еден ден, туку тоа ова мора да биде пресвртница во борбата за достоинство и еднаквост.

„Вчера бевме сведоци на нешто срамно, нешто што не смее да помине како „обична политичка дебата“. Министерката за финансии, Гордана Кочоска, упати навреда која погодува длабоко – не само кон пратеничката Славјанка Петровска, туку кон секоја жена, секој човек кој некогаш бил дискриминиран, омаловажен или повреден. Кога министерка во оваа држава ќе се осуди да каже дека една жена не може да зборува за семејството само затоа што нема деца, тогаш тоа не е само навреда. Тоа е удар врз достоинството на сите нас. Тоа е ароганција, тоа е дискриминација, тоа е нечовечност“, нагласи Тренчевска.

Покрај барањето за оставка од министерката за финасии, СДСМ ќе понуди решенија за осуда на говорот на омраза и дискриминација во инсттуциите.

„Ќе побараме итна седница на Комисијата за дискриминација, каде ќе се расправа за однесувањето на Кочоска и поширокиот проблем на дискриминација врз основа на пол во институциите. Ќе иницираме законски измени или кодекс кој ќе ги санкционира дискриминаторските навреди и говорот на омраза во институциите, особено кога доаѓаат од високи функционери. Ова не е политичка пресметка. Ова не е само за Славјанка. Ова е борба за вредности. Ова е порака дека нема да дозволиме омаловажувањето да стане новото нормално со ВМРО-ДПМНЕ на власт“, рече Тренчевска.

Пратеникот од ВМРО-ДПМНЕ, Бране Петрушевски го повика Социјалдемократскиот сојуз да го осуди и исклучи од Централниот Одбор на партијата, Филип Андов Сокол.

Од ВМРО-ДПМНЕ велат дека поранешниот директор на затворот „Скопје“ во Шуто Оризари од установата направил хотел, а криминалците осудени за тешки дела излегувале кога ќе посакаат.

„Филип Андов Сокол како директор на затворот Шутка овозможил криминалци кои се во притвор за сериозни кривични дела да го напуштаат затворот и по 8 до 10 часа на ден. Криминалците кои Филип Андов Сокол ги пуштал во ниту еден случај не смееле да го напуштат притворскиот затвор. Овие криминалци биле изнесувани од затворот од страна на униформирани лица кои тајно ги транспортирале до местото до кое тие сакале, со службени возила и службени ресурси“, изјави Петрушевски.

Додаде дека со Филип Андов Сокол, државата, буквално работела за криминалци.

Според ВМРО-ДПМНЕ, ако опозициската партија не излезе да се извини јавно, да го разреши Сокол од партиските тела и да го осуди, ќе покажат дека ништо не смениле, ниту имаат сила да сменат.

Како што беше вчера соопштено, петмина осуденици од затворот во Шуто Оризари, незаконски биле привремено ослободувани по 8 до 10 часа, а тоа им го овзоможувал поранешниот директор Филип Андов кој е осомничен заедно со уште девет лица во постапката на Обвинителството за гонење на органзииран криминал и корупција. Тие се гонат за „Противзаконито ослободување на лице лишено од слобода“ и кривично дело „Злоупотреба на службена положба и овластување“.

Спроведувањето на осуденици од затвор се спроведува единствено до суд, здравствена установа или друг орган. Но, тие доставувале молба до Андов кој со факсимил или потпис одобрувал повремено да го напуштат затворот. Второосомничен е командирот на затворска полиција, кој изготувал наредба за нивен спровод, а понекогаш тоа го прваел и третоосомничениот затворски полицаец и личен возач на директорот.

Обвинителството до Кривичниот суд достави предлог за определување на мерки на претпазливост за осомничените.