Две лица загинаа, а три се повредени утринава на Цетиње во Црна Гора, кога била активирана експлозивна направа во близина на локалниот спортски центар, соопшти црногорската полиција.

Експлозијата се случила во 9.10 часот, а од силната експлозија испукале стаклата на зградата на Спортскиот центар. Според неофицијалните информации, убиени се припадници на озлогласениот криминален Шкаљарски клан, Петар Калуѓеровиќ и Драган Рогановиќ. Еден од нив починал на самото место. Според извор од полицијата, вториот подоцна им подлегнал на повредите.

Според црногорскиот медиуми, еден од убиените неодамна излегол од затвор.

Како што пишуваат медиумите, двајца повредени се припадници на организираната криминална група Шкаљарски клан.

Третото повредено лице е постара жителка на Цетиње, која во моментот на експлозијата минувала по таа улица. Таа била транспортирана во Клиничкиот центар во Подгорица.

Грчкиот премиер Кирјакос Мицотакис во интервју за радиото „Реал фм“ го коментира ставот на мандатарот за формирање влада, Христијан Мицкоски, во врска со употребата на името Македонија.

„Премиерот на Северна Македонија, ако од моментот кога ќе ја презеде должноста, инсистира на оваа реторика, ќе се најде во многу непријатна позиција кога ќе се сретнеме на НАТО-самитот“, рече грчкиот премиер.

Тој додаде и дека договорот од Преспа обезбедил едно име за севкупна употреба, а не двојна формула, и го повтори ставот дека оспорувањето може да создаде проблеми во односите со Грција, со НАТО и ЕУ, но и дека прашањето ќе го иницира на НАТО-самтитот во првата половина на јули.

„Секако, ќе го иницирам и мислам дека ќе имам многу сојузници во овој обид. Скопје да сфати дека не може да си игра со Атина за такво прашање бидејќи ако земјата се стремеше кон двојно име, прашањето ќе беше затворено пред многу години. Скопје влезе во НАТО токму преку договорот, кој има свои проблеми, меѓутоа обезбеди едно име за сите и ако ова се оспори, тогаш да знае Северна Македонија дека ќе има големи проблеми не само во нејзините билатерални односи со Грција туку и во односите со НАТО и Европската Унија кон која има амбиција во некој момент да стане членка“, рече Мицотакис.

Изминативе денови во јавноста една тема ги разбранува страстите и оправдано, тоа беше цената на електричната енергија, која практично ќе биде регулирана од страна на Регулаторната комисија за енергетика на Македонија во неделите што следуваат, а која ќе биде апликативна, односно важечка од 1 јули заклучно со 31 декември 2024 година. Во јавноста проструи информација дека таа ќе претрпи значителни корекции во негативен тренд за граѓаните, односно ќе биде зголемена. Како идна влада не сакаме да се мешаме во работата на независните регулаторни тела. Но, исто така како идна влада имаме одговорност, а тоа го ветивме пред граѓаните за време на кампањата на претседателските и парламентарните избори, дека тие ќе бидат нашиот приоритет, стандардот на граѓаните ќе биде наш приоритет и како такви и како идна влада имаме намера сериозно да се грижиме за стандардот на граѓаните, изјави Христијан Мицкоски, претседател на ВМРО-ДПМНЕ.

„И да не дозволиме истиот тој стандард, поради ситни интереси на поединци, да биде начнат, односно загрозен. Во таа смисла група пратеници од коалицијата ‘Твоја Македонија’, предводена од ВМРО-ДПМНЕ, денеска, прво, потпишан сум јас, доставивме до архивата на македонското Собрание предлог-закон за дополнување на Законот за енергетиката по скратена постапка. Каков е всушност овој предлог-закон за дополнување на Законот за енергетиката? Тоа е всушност предлог-закон со кој нема да има зголемување на цената на електричната енергија за домаќинството, односно стандардот на граѓаните ќе биде заштитен. А со овој предлог-закон нема да се дозволи она што проструи изминативе денови во јавноста како информација да биде драматично зголемена цената на електричната енергија. Цениме дека со овој предлог-закон за дополнување на Законот за енергетиката по скратена постапка, особено домаќинствата што се во првата и втората група нема да добијат зголемени сметки за електрична енергија. А исто така очекуваме и оние што влегуваат и во третата и четвртата група зголемувањето на цената на електричната енергија да не биде значително, односно да се движи помеѓу 1 и 2 %. Тоа е она што ние како идна влада можеме да го направиме“, додаде Мицкоски.

Како што посочува, нема да има зголемување на цената на електричната енергија за домаќинствата што добиваат електрична енергија од универзалниот снабдувач.

„Сега би навлегол малку и во суштината, ќе ми треба и стручно објаснување, ќе се обидам на едноставен начин сето тоа да го доближам до вас за да може на македонската јавност, на граѓаните, да им биде појасно. Како се формира цената на електричната енергија? Цената се формира како збир од четири собирока. Тоа е цената што за своите услуги ја наплаќа МЕПСО, цената што за своите услуги ја наплаќа ‘ЕВН дистрибуција’, цената што за своите услуги ја наплаќа операторот на пазар МЕМО, плус цената на самата електрична енергија.

Вие слушнавте во јавноста дека самата цена на електричната енергија, која поранешно ЕСМ, сега ЕЛЕМ, ќе ја доставува до компанијата која е универзален снабдувач, официјално сѐ уште таа цена не сме ја виделе, но слушнавме дека Владата донесла одлука на една од седниците таа цена да се зголеми. Од тоа што можевме во јавноста да го слушнеме, цената од 57 евра донеле одлука да ја зголемат на 60 евра за мегават-час, ќе видиме дали е тоа така. Но, бидејќи ние сме внимателни, рековме дека наш приоритет претставуваат граѓаните и нивниот стандард, затоа предвреме преземаме мерки со кои не би се случил овој ценовен шок за потоа да имаме инфлаторна спирала, која ќе го начне стандардот на нашите граѓани. Да се вратам сега на формирањето на цената. Сите овие 4 собирока се множеа со коефициентот 1,115. Зошто со овој коефициент, затоа што тоа беше старата маржа што универзалниот снабдувач ја наплаќаше од домаќинствата или тоа е 11,5 %.

Откако истече тој рок односно од како истече лиценцата со старата маржа за стариот универзален снабдувач се распиша нов јавен оглас, нов тендер и најповолната понуда ја намали таа маржа од 11,5 на 9,9 проценти. Што правиме ние со овој закон, со овој закон всушност односно дополнување на законот за енергетика всушност велиме дека не е потребно бидејќи станува збор за исто правно лице повторно формирање на ново правно лице, нова структура нови трошоци за банкарски сметки нови процедури и така натаму нешто што ќе трае со месеци туку велиме дека бидејќи станува збор за старо нов бидејќи истиот кој што и порано бил универзален снабдувач како правно лице ќе продолжи да биде универзален снабдувач како правно лице и во иднина, нема потреба да регистрира ново правно лице, бидејќи станува збор за истото, само му ја продолжува регулаторната комисија, по основ на овој предлог закон кој што ние го доставуваме за дополнување на законот за енергетика важноста на лиценцата и тоа значи дека наместо маржа од 11,5 проценти која што до сега им беше наплаќана на граѓаните, ќе биде наплаќана маржа од 9,9 проценти.

И истовремено упатувам порака до универзалниот снабдувач да врши многу внимателно оптимизација на своите потреби односно при набавката на електричната енергија да се води најпрво од интересите на граѓаните а потоа да направи вистинска оптимизација на своето портфолио кое што понатаму ќе го испорача кон граѓаните да не набавува количини на електрична енергија кои што нема да бидат потребни, туку да се држи до пристапот кој што ќе биде чесен, одговорен и пред се инспиративен за граѓаните, односно да направи оптимизација за својата набавка на електрична енергија.

Доколку овие две работи се случат, односно овој Закон за дополнување на законот за енергетика се донесе, ќе биде намалена маржата од 11,5% на 9,9 проценти и доколку универзалниот снабдувач направи оптимизација на своето портфолио, односно оптимизација на количините на електрична енергија, тогаш јас ве уверувам дека граѓаните нема да добијат повисоки сметки за електрична енергија. Ние сме влада која што е одговорна, ние сакаме да бидеме влада која што главен интерес ќе биде интересот на граѓаните, така во овој период додека сеуште не сме официјално влада се однесуваме, така ќе продолжиме во иднина.

А ќе сториме сѐ што е во наша моќ во овие шест месеци да го реорганизираме енергетскиот сектор во Македонија и веќе во следниот регулационен период од 1 јануари 2025 до 30 јуни 2025 година граѓаните да добијат поевтини сметки за електрична енергија, индустријата да добие, онаа  што е на регулираниот пазар, поевтини сметки за електрична енергија. На тој начин инфлацијата ќе биде задушена, односно цените, наместо да се качуваат, ќе се намалуваат, граѓаните се нашиот приоритет и како идна влада имаме намера да ни бидат исклучиво важни граѓаните. Граѓаните направија тоа што требаше да направат, сега идната влада предводена од ВМРО-ДПМНЕ треба да направи за граѓаните“, рече Мицкоски.