Основното јавно обвинителство од Скопје поднелo обвинение против 41-годишен скопјанец, управител на фирма од Рашче, поради тоа што во текот на 2021 година со лажна лиценца за вршење меѓународен патен сообраќај негов автобус преку возачи што го управувале автобусот на фирмата 20 пати ја преминал државната граница.

„По спроведена опсежна претходна постапка и направените детаљни проверки, јавен обвинител од Основното јавно обвинителство Скопје денеска поднесе обвинителен предлог против едно физичко и едно правно лице за продолжено кривично дело фалсификување исправа.

Обвинетиот 41-годишник како управител на правното лице од Рашче, искористувајќи ист траен однос, исти услови и слични околности, преку возачите што управувале автобус во сопственост на фирмата, извршил повеќе временски поврзани дејства и употребувал како вистинска лажна јавна исправа извод од лиценца за вршење јавен превоз во меѓународниот патен сообраќај“, велат надлежните.

Ваквата лиценца за наведениот автобус воопшто не била издадена од Министерството за транспорт и врски, а управителот изготвената лажна јавна исправа им ја давал на возачите што го управувале автобусот и со неа тие ја преминувале државната граница. Во текот на постапката надлежниот јавен обвинител обезбеди докази дека во периодот од 10.1.2021 до 21.11.2021 година автобусот на тој начин 20 пати ја преминал државната граница на разни гранични премини.

Со опишаните дејства обвинетиот сторил кривично дело фалсификување исправа по чл. 378 ст. 3 во врска со ст. 1 во врска со чл. 45 од Кривичниот законик, а правниот субјект сторил кривично дело фалсификување исправа по чл. 378 ст. 4 во врска со ст.3 во врска со ст.1 во врска со чл. 45 од Кривичниот законик.

Прибраните докази во текот на претходната постапка, кои се однесуваат на постапувањето на царинските службеници на граничните премини задолжени за контрола на изводите од лиценци, Основното јавно обвинителство Скопје ќе му ги достави на надлежно постапување на Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење организиран криминал и корупција.​