Премиерот Христијан Мицкоски вели дека има исклучително блиска и непосредна соработка со министерот за животна средина, Изет Меџити, кого ДУИ со денови го обвинува за корупција. Мицкоски ја повика партијата да достави докази, доколку ги има.

„Сите што поседуваат докази за такво нешто ги повикувам, го знаат мојот број, ако треба, ќе напуштам состанок за да ги предадеме на органите што треба да постапуваат. Во спротивно, морам да ги предупредам од ДУИ дека продолжуваат да сеат пердуви, да се занимаваат со магла, магла што е оптоварена со зборот корупција, бидејќи тоа беше нивно второ име во минатото, во кое главен атрибут беше трговскиот центар ‘Соравија’ во Скопје, автомобилите ‘ролс-ројс’ на сватовите, деловните простории на тогашниот потпретседател и шеф на кабинет на господинот Ахмети и така натаму. Можам на една цела прес-конференција да ги редам скандалите. Разбирам дека тоа е Фројд и дека тоа владее со нивната потсвест, но јас апсолутно имам доверба во работењето на господинот Меџити“, рече денес премиерот Мицкоски одговарајќи на новинарски прашања во Владата по објавата за реконструкциите на болницата „8 Септември“ и охридскиот аеродром „Св. апостол Павле“.

Демократската унија за интеграција и денес потсети на корупцискиот скандал во Министерството за животна средина, каде што контролата на Државниот управен инспекторат утврдила злоупотреба на службената должност на министерот Меџити и на неговиот кабинет. ДУИ наведува дека доверливи извори од Министерството за животна средина потврдиле дека шефот на кабинетот на Меџити бил клучна фигура во шемата за уцени и мито со вршење притисок врз компании и граѓани за секоја административна услуга.

Македонија е една од земјите што се коспонзор на предлог-резолуцијата на САД за Украина, а истовремено Европската Унија, предводена од Германија и Франција, поднесува своја резолуција.

Премиерот Христијан Мицкоски кусо изјави: „Така одлучивме“, прашан зошто бил преземен таков чекор. Тој изрази очекување дека резолуцијата ќе биде поддржана од мнозинството во рамките на Обединетите нации.

Советот за безбедност на ОН ќе гласа за нацрт-резолуцијата за Украина предложена од САД. Покрај Македонија, коспонзори на резолуцијата се и Израел, Грузија и Унгарија. Во текстот се изразува тага за трагичната смрт на луѓето во руско-украинскиот конфликт и се апелира на ставање крај на војната. Американскиот државен секретар Марко Рубио ја нарече резолуцијата едноставна и историска и ги повика членките на ОН да ја поддржат со цел да се зацрта патот кон мирот.

Од друга страна, во резолуцијата на Франција и Германија се зборува за „целосна инвазија на Украина од страна на Руската Федерација“ и се бара итно и безусловно повлекување на сите сили на Москва.

Наместо да донесат одлука што директно ќе го олесни товарот врз семејните буџети, пратениците од владејачката коалиција одбија да ги поддржат измените и дополнувањата на Законот за ДДВ, со кои предложивме намалување на ДДВ-то за електричната енергија од 18 на 5 отсто и укинување на ДДВ-то за основните прехранбени производи, објави пратеникот од СДСМ, Фатмир Битиќи.

Како што рече, во време кога цените на храната растат без контрола, кога електричната енергија стана најскапа во регионот, кога граѓаните се принудени да живеат во постојана неизвесност за наредниот месец, мнозинството ги отфрли конкретните мерки, што веднаш ќе значеа помали сметки за струја и поевтина храна.

Предлогот предвидуваше намалување на ДДВ-то за струјата, што, како што велат предлагачите, ќе значеше 13 отсто пониски сметки за над 600 илјади домаќинства. За сметка од 3.000 денари, граѓаните ќе заштедеа 400 денари месечно, а за повисоките сметки, заштедата ќе беше уште поголема.

Истото тоа важи и за основните прехранбени производи. Намалувањето на ДДВ на нула проценти ќе значеше директно поевтинување на храната, односно над 3.000 производи ќе беа поевтини, меѓу кои лебот, брашното, млекото, јајцата, маслото, шеќерот и сите други основни продукти што секојдневно ги купуваат граѓаните, рече Битиќи.

Најави дека СДСМ ќе продолжи политички да се бори за системски решенија за замрзнување на цените на основните производи, за фиксни маржи што ќе спречат злоупотреби, за итна примена на Законот за нефер трговските практики, за поевтин зелен картон и за зголемување на платите преку замрзнување на придонесите.