Црна хроника
Пошле во викендичката, начекале крадци

Двајца кумановци отишле во викендичката, а таму ги пречекале крадци со пиштоли, ги врзале со кабел, украле се од викендицата и со возилото на домаќините избегале.
Како што соопшти полицијата, во понеделникот, З.С. (51) од Куманово пријавил дека во неговата викенд куќа во месноста Зубовска река, во атарот на село Зубовце, кумановско, над него и неговиот сосед Л.Д. (64) од Куманово, двајца непознати сторители извршиле разбојништво.
Кога З.С. и Л.Д. дошле пред влезната врата на викендичката, излегло непознато машко лице кое им вперило пиштол и им рекло да влезат внатре, каде било уште едно непознато лице.
Сторителите им пребарале по облеката и од З.С. одзеле околу 8.000 денари и мобилен телефон, а од Л.Д. одзеле околу 2.000 денари и мобилен телефон.
После тоа, едното лице држело пиштол вперен кон нив, а другото со кабел им ги врзало рацете и нозете, по што излегле од викендицата и со автомобил „рено сеник“ со кумановски регистарски ознаки, сопственост на З.С., побегнале во непознат правец.
По неколку минути и двајцата успеле да се одзврзат, излегле надвор и од соседите побарале телефон и настанот го пријавиле во полициска станица. Од извршениот увид во викендицата, и по кажување на оштетениот, од викендицата недостисгаат телевизор, сателитски ресивер, ДВД, појачувач, музички миксети и други предмети. Се преземаат мерки за пронаоѓање на сторителите и за целосно расчистување на случајот./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Ѝ одзеле нож со остатоци од кокаин, а дома ѝ нашле амфетамин, кривична против 36-годишна скопјанка

СВР Скопје поднесе кривична пријава против В.А.(36) од Скопје поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанции и прекурзори“.
На 06.04.2025 во Скопје, полициски службеници извршиле преглед над пријавената, при што е пронајден и одземен нож со остатоци од кокаин и прашкаста материја, а при извршен претрес во домот на пријавената е пронајден и одземен амфетамин, соопшти полицијата.
Црна хроника
Скопјанка повредена откога со електричен велосипед удрила во пешак на Партизанска во Скопје

Синоќа скопската полиција добија пријава за судир на велосипедистка и пешак во која била повредена велосипедистката. Несреќата се случила на булеварот Партизански одреди.
„На 27.06.2025 во 20.20 часот во СВР Скопје е пријавено дека на булеварот Партизански одреди во Скопје се случила сообраќајна незгода во која учествувале електричен велосипед ’бенели’, управуван од 55-годишната С.Ј. и пешакот З.Н.(50) од Скопје. Во несреќата со тешки телесни повреди се здобила С.Ј., констатирани во Градската општа болница ’Св.Наум Охридски’ во Скопје“, извести Министерството за внатрешни работи.
Увид на местото на несреќата направила увидната екипа од СВР Скопје.
Топ
Разбојништво во фризерски салон во Битола: му го зел прометот на фирзерот и му се заканил дека ќе го испрска со солзавец

Основното јавно обвинителство Битола донесе наредба за спроведување истражна постапка против 22-годишен битолчанец осомничен за кривично дело – разбојничка кражба од член 238 став 1 од Кривичниот законик.
На 23 јуни околу пладне, осомничениот влегол во фризерски салон и побарал пари од фризерот. Тој одбил доброволно да му даде, по што осомничениот го искористил моментот кога оштетениот се оддалечил од фиоката во која го чувал прометот од фризерските услуги, ја отворил фиоката и ги одзел речиси сите пари кои биле внатре, односно 3.000 денари.
Веднаш се обидел да избега од салонот, но оштетениот го фатил и го држел за да го спречи да замине додека не биде повикана полиција. Затекнат при кражбата, осомничениот му се заканил на оштетениот дека ќе го испрска со солзавец, поради што тој го пуштил да си замине со украдените парични средства.
„Лицето е се уште во бегство и полицијата трага по него. Во меѓувреме, јавниот обвинител до судијата на претходна постапка од Основниот суд во Битола достави предлог за определување мерка притвор која ќе започне да се применува веднаш по неговото пронаоѓање и лишување од слобода. Притворската мерка е побарана бидејќи се работи за лице кое и претходно е осудувано за исти и слични дела и очигледно е дека се крие и се обидува да ги избегне органите на прогонот“, соопшти Обвинителството.
Важни докази за настанот, како што велат од Обвинителството, се исказите на оштетениот и на сведоците кои во моментот биле присутни во фризерскиот салон, па без најстрогата мерка за обезбедување постои реална опасност осомничениот да се обиде да влијае врз нив и со тоа да ја попречува истражната постапка. Јавниот обвинител го зел предвид исказот на оштетениот кој се чувствува загрозен и бара да биде заштитен од осомничениот во текот на постапката.