Дали вие знаете дека минатата година за субвенции за Јавното сообраќајно претпријатие, Градот Скопје одвои 685 милиони денари, 11 милиони евра и со цел памет директорот на ЈСП и вие коишто го браните со тоа дека не бил почитуван возниот ред, 11 милиони евра и возниот ред не е почитуван, вели советникот од ВМРО-ДПМНЕ Филип Јаневски, на денешната Седница на Град Скопје говорејќи за предлог-одлуката за именување на линискиот превоз на патници во градот.

Тој појаснува дека оваа година во овој буџет на ЈСП му е доделена можност за 800 милиони денари или 13 милиони евра што претставува рекордна сума. Притоа истакнува дека и покрај овие енормни суми ЈСП е доведено до дереџе да не може да се испочитува ниту возниот ред.

„Да сме набавиле нови автобуси, па вие овие што ги имате не можете резервни делови да набавите. Тие нови автобуси кој ќе ги сервисира, кој ќе плаќа за резервни делови? Овие што ги имате вие не можете да ги сервисирате, за овие нема шофери, ама нови автобуси да сме набавиле. Се истуривме пари давајќи во тоа претпријатие за да дојдеме до дереџе овде денес да ми велите вие дека ние ги лажеме граѓаните“, концизен е Јаневски.

Јаневски исто така посочи дека со приватните превозници на секои шест месеци се јавуваа проблеми, со вработените исто така, а паралелно секои два месеци беше и блокирана сметката на ЈСП, што поради долговите кон приватните превозници, што поради добавувачите на нафта.

„И вие мене ми велите да го смениме возниот ред, да не сме ги лажеле граѓаните, а до го смениме на пример директорот или градоначалникот тоа не ви текнува како решение можно. Затоа што може градоначалничката не ја бидува. Тука нас ни глумите дека се грижите за граѓаните дека немале автобус, можеби и се грижите да не грешам, па дајте да видиме зошто се потрошени 24 милиони евра во последните две години само за субвенции“, прецизен е Јаневски.

Со жалење констатираме дека нашиот сосед повторно се обидува одговорноста за неисполнувањето на нивните меѓународните обврски да ја префрли врз нашата држава, велат од МНР во врска со вчерашната реакција од страна на Министерството за надворешни работи на Република Бугарија.

„Истакнуваме дека почитувањето и спроведувањето на одлуките на Европскиот суд за човекови права (ЕСЧП) не се билатерални прашања, туку задолжителна обврска на секоја земја членка на Советот на Европа. Република Северна Македонија останува целосно посветена на владеењето на правото и почитувањето на човековите права и слободи како темелни вредности на европската интеграција и не може да прифати нивно негирање или релативизирање, вклучително и кога станува збор за правата на припадниците на македонското малцинство во Република Бугарија. Дополнително, сакаме да нагласиме дека Република Северна Македонија максимално е посветена на процесот на европската интеграција сметајќи дека тој процес не треба да биде злоупотребен со воведување дополнителни политички услови, кои не се дел од Копенхашките критериуми. Политиката на условувања и неосновани обвинувања е непринципиелна пречка на евроинтегративниот пат на нашата држава и не придонесува за градење добрососедски односи, туку, напротив, создава непотребни тензии, кои не одговараат на европскиот дух на соработка“.

Во оваа пригода силно се залагаме, како што велат од македонското МНР, за развивање на пријателските односи меѓу двете држави и за решавање на сите отворени прашања преку рамноправен дијалог, одговорно однесување, заемна почит и разбирање.

„Во наведената насока очекуваме еднакво конструктивен пристап и од страна на Република Бугарија, заснован на целосно почитување на целите и принципите на Повелбата на ОН и правилата на меѓународното право затоа што тоа е во интерес на нашите граѓани, во интерес на двете земји и во прилог на зацврстување на регионалниот мир, стабилноста, безбедноста и заедничката европска перспектива“.

Вчера, бугарското МНР излезе со реакција на изјавите на премиерот, од каде беше истакнато дека Мицкоски уште еднаш демонстрира недоволно разбирање на одлуките на Европскиот суд за човекови права. „На тој начин, сакајќи или не сакајќи, промовира манипулативни и лажни тези, кои би можеле да се сметаат за вистинско мешање во внатрешните работи на Република Бугарија“, стоеше во реакцијата.

Претседателот на Владата Христијан Мицкоски, денеска одговарајќи на новинарското прашање поврзано со интерпелација на Судскиот совет и барањето на оставка на Љупчо Коцевски посочи дека партиски луѓе не треба да има во судството.

„Последниот браник и цврст штит во моментот на поранешната влада на СДСМ и ДУИ се дел од судиите и дел од обвинителите меѓу кои е именуваното лице за коешто вие сега зборувате. Најголемиот дел би рекол 95% од обвинителите и судиите се луѓе коишто чесно си ја работат својата работа, коишто обвинуваат и судат според закон и Устав. Но, за жал има и такви коишто останаа да бидат партиски измеќари и коишто ценат дека кога ќе ја облечат тогата наместо да заборават на партиските привилегии и оние коишто ги предложиле таму, тие се уште се верни слуги на истите коишто на времето ете бидејќи такви се законите и процедурите ги предложиле да бидат таму каде што се“, одговори Мицкоски.

Мицкоски го потенцираше однесувањето на еден обвинител којшто наместо да биде заштитник на владеењето на правото, одбрал да биде верен слуга и измеќар на една партија којашто беше долги години на власт и дел од коалицијата во поранешната влада.

„Посебно би го потенцирал однесувањето на еден обвинител од пред неколку дена којшто одлучи наместо да биде обвинител и заштитник на владеењето на правото и правдата да биде верен слуга и измеќар на една партија којашто беше долги години на власт и дел од коалицијата во поранешната влада“, објасни Мицкоски.