Топ
Пријава за лихвар од Липковско, за заем од 1.500 евра му ја зел куќата на соселанец

Кумановската полиција поднесе кривична пријава против 52-годишен жител на селото Опае со иницијали Б. С. поради сомнение за сторено кривично дело лихварство.
Во текот на 2014 година пријавениот на соселанец со иницијали Х. И. му дал 1.500 евра и искористувајќи ја неговата материјална состојба го условил со месечна камата од 500 евра, а главниот долг да остане ист.
Откако Х. И. не успеал да ги врати главниот долг и каматата, пријавениот во неколку наврати го зголемувал главниот долг, кој во 2015 година достигнал 20.000 евра. По барање и со закани од страна на лихварот, Х. И. во јануари 2016 година со нотарски договор, кој требало да важи до враќање на парите, му ја препишал куќата во село Опае.
Додека Х .И. бил да работи во странство за да ја обезбеди бараната сума, Б. С. ја принудил сопругата на Х. И. со семејството да ја напуштат куќата, а кога се вратил во октомври 2020 година, Х. И. преку посредник стапил во контакт со пријавениот, кој тогаш побарал од него до март 2021 година да му даде 90.000 евра за да му ја врати куќата. По изминување на последниот рок, Х. И. го пријавил случајот во кумановската полиција.
Како што соопшти портпаролката на МВР, Сузана Прањиќ-Талевска, лихварот моментно е на издржување казна затвор за друго кривично дело.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Топ
Маж нападнал девојче со нож, полицијата пукала за да го спречи, но тој избегал

Велешката полиција вчера попладне испукала неколку предупредувачки куршуми во воздух во обид да го спречи нападот од 23-годишно лице кое држело остри предмети и се заканувало на граѓани и на полициски службеници. Осомничениот успеал да побегне, но неговиот идентитет е познат и по него се трага.
Инцидентот се случил на 13 јуни 2025 година, околу 18 часот, кога во СВР Велес бил пријавен физички напад врз малолетно девојче на улицата „Хаџи Косте“ во Велес. Нападот го пријавил нејзиниот татко, 25-годишниот Е.Х. од Велес, кој информирал дека неговата ќерка била нападната од С.У. (23) од Велес, кој користел и метален предмет при нападот. Дополнително, откако на местото пристигнала и мајката на девојчето, 27-годишната сопруга на пријавителот, С.У. и кон неа упатил закани.
На местото на настанот интервенирале полициски службеници кои го затекнале С.У. со остри предмети во рацете. Му дале наредба да ги фрли предметите, но тој не се придржувал, продолжил да им се заканува и се движел кон нив со намера да ги нападне.
Во тој момент, полицијата испукала еден предупредувачки куршум во воздух и повторно му наредила да ги остави предметите. И покрај тоа, С.У. продолжил со заканувачко однесување, по што бил испукан и втор предупредувачки куршум. Дури тогаш, напаѓачот го фрлил еден од предметите и почнал да бега.
Полицајците испукале уште два предупредувачки куршуми додека го следеле бегалецот, кој во меѓувреме го фрлил и вториот остар предмет. Двата предмети се пронајдени и одземени од страна на полицијата.
За случајот се известени јавен обвинител и Центарот за социјални работи Велес, а по С.У. интензивно се трага.
Економија
Мицкоски: Земјоделците се херои на денешницата, Владата останува посветена на нивната поддршка

На манифестацијата „Од нива до трпеза“, која денеска се одржува во Скопје, премиерот Христијан Мицкоски упати јасна порака за поддршка на македонските земјоделци, нагласувајќи дека Владата силно се залага за развојот на земјоделскиот сектор и поддршка на оние кои го одржуваат аграрот жив.
„Македонија има потенцијал – и тоа не е празна фраза, туку фактичка состојба. Имаме сонце, имаме вода, имаме плодна почва, но најважно од сè – имаме луѓе. Луѓе кои не се плашат да станат рано наутро, да ги извалкаат рацете во кал, да работат до доцна навечер. Тие се тивките херои на нашето време. Тие се темелот на нашата економија, чуварите на традицијата и креаторите на иднината“, изјави премиерот.
Мицкоски подвлече дека земјоделството е еден од стратешките приоритети на Владата, наведувајќи дека во последните 11 месеци биле исплатени повеќе од 8 милијарди денари за субвенции и други форми на финансиска помош за земјоделците.
„Ова не се празни ветувања – ова се мерливи резултати. Тие говорат за нов пристап, нова енергија и визија со која сакаме да го издигнеме земјоделството, да ги поттикнеме младите генерации да се вклучат во овој сектор, и пред сè – да ја зајакнеме довербата кај секој земјоделец“, рече премиерот, апелирајќи до граѓаните да избираат македонски производи и со тоа директно да го поддржат домашното производство.
На манифестацијата учествуваат 25 општини од целата земја, претставувајќи уникатни традиционални производи како што се домашни вина, печива, мед и рачни изработки.
Настанот е во организација на здружението „Наша традиција, наша иднина“, со поддршка од Министерството за земјоделство, шумарство и водостопанство. Главната цел е да се истакне богатството на македонската традиционална храна и да се промовира руралниот туризам како ресурс со сериозен економски и културен потенцијал.
Топ
Го следеле од менувачница, го нападнале и му ги зеле парите

Основното јавно обвинителство Куманово поведе истражна постапка против две лица осомничени за кривично дело – Разбојништво по член 237 став 1 од Кривичниот законик, откако пред четири дена физички нападнале маж и му одзеле поголема сума пари.
Според информациите од обвинителството, осомничените го забележале оштетениот додека разменувал девизи и почнале да го следат со намера да му ги одземат средствата. Откако тој се приближил до неговата семејна куќа, двајцата го нападнале, нанесувајќи му удар со тупаница во пределот на главата. Жртвата паднала на земја и изгубила свест, по што му биле одземени 172.000 денари и 37.460 српски динари.
Со цел обезбедување на истрагата и спречување на можноста за бегство, судија на претходна постапка им определи мерка притвор во траење од 30 дена на двајцата осомничени.
Обвинителството продолжува со прибирање на докази за целосно расветлување на случајот.