Топ
Пронајдено телото на скопјанецот што се удави во Дојранското Езеро

По преземените мерки и активности, тим пожарникари од Територијалната противпожарна единица Струмица, денеска, околу 7 часот, во Дојранското Езеро го пронајдоа телото на Д. М. (43) од Скопје, кој вчера се удави во езерото, соопшти полицијата.
Имено, вчера во 10.10 часот во СВР Струмица беше пријавено дека тој скокнал од чамецот во езерото, пливал неколку метри по што се удавил.
Во акцијата за пронаоѓање и извлекување на телото учествуваа и полициски службеници од СВР Струмица – ОВР Гевгелија и нуркачки екипи.
Лекар од итна медицинска помош констатирал смрт, а увид на местото извршила екипа од ОВР Гевгелија.
По наредба на јавен обвинител, телото на починатиот било дадено на обдукција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Црвените линии на СДСМ и Венко се нов подарок за Бугарија

Претседателот на ВМРО-ДПМНЕ, Христијан Мицкоски на денешниот митинг во Ѓорче Петров во рамки на кампања за локалните избори 2025 истакна дека овие избори се одлука дали ќе одиме напред или ќе се вратиме назад. Со заокружување на бројот 9 на 19 октомври бираме програма и план со кој општините и државата ќе станат современо и убаво место за живеење.
Мицкоски нагласи дека 15 месеци владата ги гради темелите кои претходно СДС и ДУИ 84 месеци ги рушеа и ги упропастуваа.
„Оваа Влада е на позиција и ја има одговорноста пред граѓаните точно една година и три месеци. Во овој период од 15 месеци ги градевме темелите кои претходно 7 години, цели 84 месеци, ги рушеа и целосно ги упропастуваа. Кренавме држава пред банкрот. Кога го слушам Венко Филипче, излегува како тие никогаш да не биле власт во оваа држава. Како да не беше тој најсигурниот министер на кој Зоран Заев се потпираше. Тој денес ни објаснува дека во негово време и во време на неговиот ментор подобро се живеело, и дека тие двајцата се бореле за сопствениот дом, а ние не сме се бореле. Ова е врвно лицемерие. Тоа беше време кога 500 илјади граѓани живееја со само 150 денари дневно. Единствен „подарок“ за животниот стандард беше инфлацијата, која редовно беше двоцифрена и го јадеше стандардот на граѓаните. Се сеќавате ли на скандалите, тендерите во РЕК, фирмите на поединци кои добиваа работа и провизиите што транспарентно ги редеа во свои џебови?“ кажа Мицкоски.
Мицкоски ги потенцира скандалите на СДС и Филипче и истакна дека СДС и ДУИ се грижеа за „нашиот дом“ така што ја клекнаа Македонија на колена.
„Венко сака да ни објасни дека се грижеле за нашиот дом, а пред само 15 месеци, немаше ден без скандал. Предавство по предавство правеа. Се грижеа за „нашиот дом“ така што ја клекнаа Македонија на колена. Прво беше промената на името, потоа договорот за пријателство со Бугарија, со кој ја отворија Пандорината кутија, што денес нè доведе до оваа ситуација до која што сме а потоа следеше прифаќање на оној бугарски ултиматум. Вчера го слушав како се повикува на АСНОМ. А заборава дека тој и неговиот учител, ментор, се поплукаа на АСНОМ тогаш кога кажаа дека нашиот источен сосед за време на втората Светска војна во Македонија биле ослободители, биле администратори а не окупатори. Дека јазикот ни „паднал од небо“ последните децении и дека нема историски континуитет. Не може Венко да се повикува на АСНОМ, а да не се огради од ова. Не може да бидеш од една страна и партизан а од друга страна соработник со окупаторите во Втората светска војна“, нагласи Мицкоски.
Македонија
Филипче од Велес: Маја Хеско за урбан ред во Велес, нова сала, затворен базен и средено Езеро Младост

Претседателот на Социјалдемократскиот сојуз на Македонија, Венко Филипче, на граѓанската трибина во Велес го истакна разочарувањето на граѓаните од владеењето на локалната власт на ВМРО-ДПМНЕ, која четири години не успеала да реализира ниту еден капитален проект.
„Градот стагнира, проектите стојат, ветувањата останаа само на хартија. Нема донесен Генерален урбанистички план. Не е реконструирана зградата на Противпожарната служба, нема ниту нови возила – безбедноста на граѓаните е загрозена. Индустриската зона Мамутчево 2 не е проширена, не е инфраструктурно уредена – затоа нема нови фабрики, нема нови работни места”, рече Филипче.
Тој додаде дека во Велес градоначалникот нема резултати бидејќи ВМРО-ДПМНЕ е без визија и капацитет да го развива Велес, набројуваќи проблеми кои локалната власт ги оставила на велешани.
„Нема изградено пречистителна станица за отпадни води. Езерото Младост е претворено во еколошка катастрофа.
И најиронично – сите овие неостварени проекти пак се ставени во нивната нова програма! Како да мислат дека народот има кратка меморија”, посочи Филипче.
Филипче потенцираше дека решението е во чесните и способни кандидати на СДСМ, давајќи поддршка на кандидатката за Градоначалничка, Маја Хеско и советничката група.
„Маја Хеско како кандидатка за Градоначалничка и советничката група на СДСМ нудат конкретни проекти и решенија: нова урбанистичка регулација за справување со сообраќајниот хаос, реконструкција на спортската сала „Гемиџии“, изградба на затворен базен, модерна пречистителна станица за езерото Младост и целосно уредување на зелените површини и јавните простори“, порача Филипче.
Лидерот на СДСМ рече дека на 19 октомври граѓаните ќе изберат тим кој ќе работи за Велес да биде модерен и европски град.
„Ова се луѓе кои знаат како да работат, кои имаат интегритет и резултати зад себе. Масовното излегување на изборите на 19 октомври ќе покаже дека граѓаните избираат тим што може да го врати животот во Велес и да го направи градот по европски стандарди, каде младите сакаат да останат“, порача Филипче на граѓанската трибина на СДСМ и Коалицијата „Се бориме за нашиот дом”, во Велес.
Македонија
Ѓорѓиевски: Ние ќе ги решаваме проблемите на скопјани, оваа битка не е само битка за поубави и почисти улици и паркови, ова е битка за душата на нашиот главен град

Орце Ѓорѓиевски, кандидат за градоначалник на Град Скопје од ВМРО-ДПМНЕ на претстојните локални избори, се обрати од денешниот народен митинг, кој се одржа во општина Ѓорче Петров, во рамки на изборната кампања чиј слоган е „Вистинскиот избор! Твојот човек! Твоето место! За твојата иднина!“.
„Во Ѓорче Петров, ВМРО-ДПМНЕ ќе победи како никогаш до сега. Ви благодарам однапред за вашата поддршка, за вашата посветеност, Скопје да го направиме градот кој повторно ќе биде нашата гордост. Ѓорче Петров да продолжи успешно да се развива како и до сега со Александар, но од после изборите и градот Скопје да заличи на едно убаво и пристојно место за живеење, за сите нас скопјани. По изборите секој еден од вас кој сега е мојот глас до граѓаните ќе оди гордо по ѓорчевските улици“, рече Ѓорѓиевски.
Ѓорѓиевски потенцираше дека ќе го даде својот максимум, како градоначалник на Град Скопје, и како што вели тој, важно е да се гледа на предизвиците како решенија на перспектива.
„Скопје, почитувани, нема повеќе време за изговори. Скопје повеќе нема време за експерименти. На Скопје му треба докажана работа. На Скопје ќе треба да го дадеме својот максимум, со љубов и да гледаме на предизвиците како решенија на перспектива“, кажа Ѓорѓиевски.
Ѓорѓиевски им порача на опонентите, дека Скопје нема време за втори шанси.
„Сакам само кратко да им порачам на нашите опоненти, јасно и гласно. Скопје нема време за театар, нема време за неуспешни обиди и нема време за втори шанси“, истакна Ѓорѓиевски.
Тој претстави дел од проектите, кои ќе ги реализира како иден градоначалник на Град Скопје, и кои ќе го променат животот на скопјани.
„Нема да дозволам, вашето Ѓорче Петров да тоне во ѓубре. Тоа повеќе нема да биде случај како што имаме проблем во моментов. Нашето Скопје, но и Ѓорче Петров мора да бидат чисти. Мојата прва акција како градоначалник на главниот град ќе биде генералка на главниот град. Масовна акција во која што за 72 часа ќе си го исчистиме нашиот главен град“, истакна Ѓорѓиевски и додаде:
„Веднаш потоа ќе следува 4 годишната програма, град без депонии со која моменталните диви депонии ќе станат минато зад нас. Сакам да најавам и за новиот резервоар за слаб притисок на водоводот во Ѓорче Петров. Во Ѓорче Петров, каде граѓаните со години се соочуваат со слаб притисок и со несигурност со водоснабдувањето ќе изградиме нов резервоар и пумпна станица на оризарски рид. Ќе обезбедиме стабилен притисок и сигурна вода која што ќе им служи на генерациите после нас“.
Ѓорѓиевски посочи дека не бега од проблемите, туку има решенија за истите.
„Ние не бегаме од проблемите ние ќе ги решаваме. Оваа битка не е само битка за поубави и почисти улици и паркови, ова е битка за душата на нашиот главен град. Битка за иднината на нашите деца да растат во метропола со европски вредности, но со македонски печат пред се“, заклучи Ѓорѓиевски.