Судија на претходна постапка при Основниот кривичен суд Скопје, постапувајќи по предлог на Основното јавно обвинителство за гонењев организиран криминал и корупција за определување мерки за обезбедување присуство против 4 лица, осомничени за кривичното дело терористичка организација од чл. 394 – а од КЗ, донесе решенија со кои го прифати предлогот на ОЈО ГОКК и на сите четири лица, кои утрово беа спроведени во судот, им определи мерка притвор во траење од 30 дена.

„Во согласност со решенијата за притвор, постојат основани сомненија од чл. 165 ст. 1 т. 1 и т. 2, односно опасност дека осомничените може да се дадат во бегство и опасност тие да ја попречат истрагата со влијание на сведоци, па поради тоа и е определена мерката притвор.

Против овие решенија странките имаат правно на жалба пред Кривичниот совет“, соопшти Кирвичниот суд.

Министерот за економија и труд Бесар Дурмиши соопшти дека откако вчера почна мерката новогодишна кошничка, бројката на производи кои што се опфатени со неа се зголемил на 1.036. Со мерката, како што претходно беше најавено од страна на Владата, граѓаните ќе може да набавуваат поевтини производи за 10 %.

Според Дурмиши, во акцијата досега се приклучиле над 90 производители и дистрибутери на производи.

Новогодишната кошничка почна вчера и, според најавите на надлежните, ќе трае до 15 јануари 2025 година. Дурмиши оценува дека со мерката ќе може директно да им се помогне на граѓаните преку подобрување на животниот стандард и празниците да ги поминат во пристојни услови.

Производите што се опфатени со акцијата се обележани на рафтовите со посебна ознака, појасни Дурмиши.

Листата на производи, како што нагласи, не е затворена, а Државниот пазарен инспекторат ќе врши контроли на терен со цел утврдување злоупотреби на мерката и доколку тие бидат регистрирани, како што најави, ќе се пишуваат казни.

На рафтовите, како што истакна, треба да биде истакнати и новата и старата цена на производот.

Дурмиши апелира до компаниите доследно да ја почитуваат акцијата што сами тие ја имаат креирано, а доколку граѓаните имаат забелешки, да ги пријават на бесплатниот телефонски број 191 или на веб-страницата на Инспекторатот.

Директорот на Пазарниот инспекторат, Влатко Стојкоски, без прецизен одговор дали трговците ги зголемиле цените 30 дена пред да почне новогодишната кошничка и дали Владата е изиграна.

„Постапуваме според Законот за заштита на потрошувачите. Кога е акциска продажба, се утврдуваат цените во изминатите 30 дена“.

На забелешката дека инфлацијата во ноември пораснала токму во делот на храната и пијалаците и дека тоа покажува дека некој во ноември ги зголемувал цените во тој дел, тој укажа дека законот е јасен.

„Конкретно за оваа иницијатива на трговците, цените се утврдуваат за изминатите 30 дена, а за другото формално правно имаме механизам да ги провериме уште еден месец наназад, но според Закон на потрошувачите ние ги контролираме овие 30 дена. Треба да видиме на што се должат тие зголемувања, некаде имаме и берзански производи, а потоа да излеземе со коментар. Во секој случај тоа треба да го провериме“.

На прашањето за можни казни доколку имало злоупотреба, тој рече дека Законот за потрошувачите е јасен.

„Се надевам дека трговците, ова е нивна иницијатива, и се надевам дека ќе ја почитуваат и се надевам дека на дело ќе ја изразат својата општествена одговорност, а пред сè, тука се граѓаните да судат. Втор ден е од акцијата, ние вчера бевме на терен, генерално, имаме ситни забелешки, но денеска имаме информација дека се отстранети“.

Надлежните порачаа дека сите неправилности што ќе бидат утврдени во однос на изигрување на цените да бидат навремено пријавени до пазарната инспекција. Ќе има, како што беше речено на прес-конференцијата, првин опомени, а постојат и казнени одредби за што надлежните оценуваат дека нема да има простор бидејќи мерката треба да има влијание за заштеда на семејниот буџет на граѓаните.

До крајот на годината ќе биде распишан огласот со кој трајно вработување, место сегашното со договор на дело, ќе добијат приближно 1.100 лица, средномедицински персонал во јавните здравствени установи во земјата, најави министерот за здравство, Арбен Таравари. И со овој оглас недостигот од средномедицински персонал нема да се покрие оти го има секаде во државата, според податоците што министерот Таравари ги добива на неделно ниво од внатрешноста.

„Јас се надевам дека до крајот на оваа година ќе биде објавен конкурс со кој ќе бидат примени на работа речиси 1.000 средномедицински лица. Тука не подразбирам само медицински сестри, туку и болничари, лаборанти, оние што беа со договор на дело. Меѓутоа, повторно е малку, повторно ќе имаме потреба од вработување уште“, рече министерот Таравари.

За него, средномедицинскиот кадар е столб на здравствениот систем, а огласот за вработување, кој треба да се распише, е дел од стратегијата на државата за нивно здржување во земјата заедно со уште неколку мерки преземени изминатата година.

„Триста специјализанти оваа година ќе примиме на работа и триста в година, 1.100 лица средномедицински персонал, имаме колективен договор, покачување на платите… Ова е тоа што може да го направи една Влада. Повеќе од ова за шест месеци јас не знам дали ќе можевме да направиме. Ова се наталожени проблеми, од 2017 година. И тогаш се бараше специјализантите да бидат вработени, за приватните зборувам, и тогаш се бараше колективниот договор и сега по седум години, успеваме за шест месеци да ги решиме овие проблеми, кои стојат подолго време во државата“, рече министерот Таравари.

Министерот извести дека од денес на Онкологија за пациентите се достапни двата биолошки лека, кои недостигаа. Објасни дека набавката на лековите задоцнила поради долгите и сложени процедури, кои мора да се следат оти станува збор за меѓународни тендери. Недостиг од двата лека Таравари вели дека имало само неколку дена и затоа смета дека се направил поголем метеж отколку што требало.