59 лица загинаа во големиот пожар што утрово се случи во дискотека во Кочани. Повредени се 155 лица, изјави пред малку министерот за внатрешни работи Панче Тошковски.

Од загинатите идентификувани 35 лица, од кои 31 се од Кочани и 4 од Штип.

„Досега се извршени разговори со 10 хоспитализирани лица, со еден член од групата ДНК. Распишана е централна потерница по четири лица. Се испитува и документацијата за дозволите на дискотеката од Министерството за економија“, изјави Тошковски и додаде дека меѓу загинатите бил и еден полицаец кој вршел контрола за евентуално откривање на дрога.

Благојчо Георгиев од здружението „Хендикеп“ во видео-снимка објавена на социјалните мрежи кажа дека изолацијата во дискотеката во Кочани била направена од најевтини материјали и прашува кој ја дал дозволата за работа и дали некој направил контрола.

„Само што почна пожарот, почнаа да ми стигнуваат видеа. Нека почиваат во мир душите на трагично загинатите во Кочани во дискотеката. Помеѓу нив имам и братучед мој, имам комшивче што го бараат се уште. Сфаќате ли за што зборам цело време. Душата ме боли. Зошто зборам против овој систем. Две години мои луѓе ја обезбедуваа дискотеката. Газдата едно парољупче, невидено, не постои друг како што тој сака пари. Внатре дискотеката е целата излепена со најевтината изолација, со сунѓер“, рече Георгиев.

„Кој даде дозвола на таа шупата таму да работи, дискотека да се нарекува. Кој направи контрола. Јас имам лично пријавувано дека внатре има еден куп малолетници“, додава тој.

Во моментов пред болницата Св. Наум Охридски се читаат имиња на повредените и ги пуштаат родителите да ги видат во групи од по неколкумина.

Црвениот крст донесе вода.

Рампите за паркинг се кренати, паркирањето е бесплатно.

Во оваа болница се хоспитализирани 29 пациенти.

Сиљановска Давкова во изјава за медиуми пред „Св.Наум Охридски“ изрази уверување дека повеќето што се повредени ќе се спасат.

-Ништо не можам да кажам, страшно. Знам дека тоа се млади храбри луѓе. Верувам дека повеќе од нив ќе се спасат лекарите се тука. Не можам да сфатам како е можно ова се случи, рече Сиљановска Давкова.

Таа истакна дека ја споделува болката со родителите, додајќи дека не може да поверува како ова се случило.

-Ова е нешто мора однапред да се предвиди, бидејќи не е првпат да сме се соочиле со вакво нешто, рече Сиљановска Давкова.