Министерството за внатрешни работи во понеделникот соопшти дека го расветли грабежот на возилото на Стопанска банка А.Д. Битола кога беа украдени 450 илјади евра

МВР соопшти дека пронајдени се двајцата извршители кои под закана со огнено оружје одзедоа околу 450 илјади евра од службеното возило на Стопанска банка А.Д. Битола, на излезот од Прилеп. Против сторителите, Жарко Николоски (40) од Скопје и Марјан Трајкоски – Клун (49) од прилепското село Дуње, поднесена  е кривична пријава, за сторено “разбојништво“.На пријавениот Ж.Н. истражен судија веќе му одреди мерка притвор во траење од 30 дена. Во меѓувреме, припадниците на МВР го лоцираа и приведоа и второпријавениот М.Т. кому исто така, истражен судија му одреди мерка притвор во траење од 30 дена, соопштува МВР.Во моментов приведени се и уште неколку други лица за коишто постојат индиции дека биле логистика односно помагачи во планирањето на кривичното дело или во обидот за прикривање на трагите, и доколку се утврди инволвираност во делото ќе бидат поднесени соодветни кривични пријави.Сторителите се познавале од одлежување казна затвор во КПУ Идризово и подолго време го планирале разбојништвото. Кога двајца вработени во банката со службеното возило “голф“ од трезорот во Прилеп, подигнале четири кутии со пари – вкупно 27.000.000 денари во апоени од 500 и 1.000 денари, во петокот, се упатиле кон Битола.

Но, кај клучката на самиот излез од Битола пријавените го попречиле патот со нивното возило.

Двајцата службеници биле принудени поради попреченоста на патот да застанат со возилото, при што првопријавениот Ж.Н. држејќи пиштол во рака испукал еден куршум во воздух, дошол до возачот на службеното возило, и под закана дека ќе го убие, го истргал од возилото и го удрил со пиштол по главата нанесувајќи му телесна повреда.

По ова Николоски влегол во возилото и заканувајќи му се на вториот службеник го истерал од возилото и со возилото го напуштил местото следен од “рено кампус“.

Тие се упатиле по магистралниот пат за Скопје, свртеле во лево од патот по улицата “Круме Беќар“, каде што за кусо застанале ги извадиле кутиите со пари кои ги префрлиле во другото возило и се упатиле во непознат правец.

По преземените активности МВР го пронајде возилото во домот на Трајкоски уште истиот ден, пребојадисано во црвено, но пријавениот не е пронајден дома.

Набргу потоа, во Скопје, приведен е првопријавениот Николоски кај кого се пронајдени 68 илјади денари во апоени од по илјада денари, како и потврда, каса-прими, на негово име на сума од 10 илјади денари за исплатен долг од кредит.