Синот на пратеникот Амди Бајрам, Габриел Бајрам, и уште три лица од Скопје добија кривични пријави за демолирањето на кафулето „My place“ во Дебар Маало, соопштуваат од МВР

Според документираните сознанија на полицијата, во вторникот околу 13:30 часот во локалот најпрвин влегол Габриел Бајрам со уште еден од пријавените и почнале да и викаат на шанкерката да им каже каде извесен Д.Ј. Откако шанкерката им одговорила дека не знае каде е, сопственикот на локалот се понудил да им помогне.Двајцата се упатиле кон сепарето каде што седел сопственикот и почнале да го навредуваат со пцовки и погрдни зборови, по што во локалот дошле и другите двајца пријавени.Бајрам со раце го фатил за јакната сопственикот и почнал да му се заканува дека физички ќе го нападне, додека неговиот другар почнал да го удира со столица во грб, за потоа сите пријавени да почнат да го тепаат.Сопственикот успеал да избега и да се скрие во тоалет.„Присутните малолетни лица уплашени од насилничкото однесување веднаш го напуштиле локалот, во моментот кога пријавените почнале да го кршат и превртуваат инвентарот во локалот. Вработената шанкерка исто така се уплашила за нејзината безбедност и се сокрила во кујната, затворајќи ја вратата“ соопштуваат од МВР.По физичкиот напад на сопственикот, пријавените почнале да го кршат инвентарот, ги превртеле масите и столиците и избегале. Направиле материјална штета од  околу 100 илјади денари.Полицијата го повикала на информативен разговор и лицето кое го барала групата во кафулето, кој признал дека со Бајрам од пред еден месец имале нерасчистени односи во врска со купопродажба на возило. По четворицата пријавени распишана е потерница.