Случајот за момчето, кое што во неделата вечер почина на плоштадот „Македонија“ во Скопје, за време на славењето на изборната победа, е расветлен

Министерството за внатрешни работи пред малку соопшти дека осомничен за смртта на момчето  е припадник на специјалната единица „Тигри“, којшто е приведен.Идентификувано е и починатото момче, за што е известено и неговото семејство. Станува збор за Мартин Нешковски роден 1989 година, жител на скопската населба Козле.Осомничениот за убиството е Игор Спасов, полицаец од специјалната единица „Тигар“ на МВР, а вчера по 18 часот самиот се пријавил кај својот старешина и го признал злосторството што го сторил.Момчето починало рано утрото во понеделникот пред зградата на МЕПСО. Како што претходно јави Макфакс,  телото на момчето кое почина на 6-ти јуни под се’ уште неразјаснети околности на плоштадот Македонија, е префрлено во капела во Бутел. Од судска медицина велат дека телото на момчето е префрлено во Бутел уште вчера. Од Основен суд 1, за Макфакс изјавија дека сè уште чекаат извештај од судска медицина за причините за смртта на момчето, и се очекува наскоро и тие да излезат со извештај за тоа дали имало траги на насилство. Момчето било донесено од страна на четири до пет лица од плоштадот, каде се одржувал Баскер фест, пред МЕПСО, бидејќи според укажувањата на сведоците, му се слошило, велат од СВР Скопје. Викната е Брза помош на лице место и констатирана е смрт. Истата вечер на плоштадот се случуваше и спонтана прослава на одредени приврзаници на политичките партии по повод изборите, но од СВР Скопје засега немаат информации дали инцидентот е поврзан со прославата.Вчера вечер стотина луѓе маршираа на плоштадот и низ центарот на градот со барање за итно расветлување на случајот. Протести на социјалните мрежи се најавуваат и за попладнево.