Охридската полиција поднесе кривична пријава против 40-годишник и против правно лице од Охрид поради сомнение за сторено кривично дело даночно затајување.

Пријавениот, со цел да одбегне делумно плаќање данок и придонес, приложил лажни податоци за своите приходи и за приходите на правното лице на име на данок на добивка и персонален данок на доход.

Со тоа пријавените го оштетиле државниот буџет и стекнале противправна имотна корист во вкупен износ од 2.043.369 денари.

Полицијата поднесе кривична пријава против 36-годишен скопјанец кој е осомничен дека ја убил невенчаната сопруга.

Според информациите на МВР, И.Е.(36) е осомничен дека на 3 август минатата година ја усмртил жената со удари со тврд предмет во главата.

„Осомничениот во куќа на ул. Гарибалди во населба Шуто Оризари, во која живеел во вонбрачна заедница со Х.Б.(33) од Скопје, поради меѓусебно недоразбирање, физички ја нападнал и ја удирал со тврд предмет по главата, по што Х.Б. починала на местото“, соопштија од МВР.

По тоа, пријавениот И.Е. го завиткал телото во најлонски вреќи и ќебе и го оставил во атарот на село Горно Оризари, Скопско, покрај патот што води од населба Шуто Оризари кон Горно Оризари.

Телото било пронајдено два дена подоцна, на 5 август.

Деветгодишно дете со тешки повреди било пренесено во болница откако во него удрил автомобил.

Според информациите на полицијата, несреќата се случила вчера во 17:20 часот на бул. Видое Смилески-Бато во Тетово, кога „фолксваген голф“, со тетовски регистарски ознаки, управувано од А.М.(39) од Тетово, удрил во деветгодишен пешак од Скопје.

Детето со тешки телесни повреди било пренесено во Клиничката болница Тетово. Извршен бил увид на местото на незгодата од Јавен обвинител и увидна екипа од СВР Тетово.