Игор Спасов, обвинетиот за убиството на младиот Мартин Нешковски на денот на изборната победа минатата година поднесе жалба до Апелациониот суд на пресудата на Основниот суд Скопје 1, со која беше осуден на 14 години затвор за „убиство со умисла“.

Обвинетиот и неговата одбрана бараат или да се преиначи пресудата, да се донесе одлука со која обвинетиот се ослободува или да се укине пресудата и да се врати повторно на судење во Кривичниот суд.

Обвинетиот останува на своето тврдење, дека тој не го убил Мартин Нешковски. Тој тврди дека Мартин не го удрил во глава, туку дека го удрил во слабината, а како причина за неговата смрт е наведен ударот во носот.

„Менталниот склоп вечерта, мене не ми бил да убивам, туку да го заштитувам претседателот на Владата. Мене ми е многу жал што изгубивме млад живот и две семејства сега патат. Меѓутоа јас не го убив Мартин Нешковски“ рече Спасов пред судиите од Апелациониот суд.

Одбраната вели дека пресудата е неразбирлива и противречна и дека во неа не е наведен мотивот поради којшто е извршено убиството. Освен тоа тие имаат забелешки и поради тоа што не биле земени во предвид лекарските прегледи кои што ги правел Спасов за време на неговото работење како специјалец.

Го оспорија психијатриското вештачење во кое се вели дека Спасов биле емоционално незрела личност.

Јас работев со оружје, мора да бидам психофизички здрав. На секои шест месеци правев психофизички прегледи, но судот не ги зеде во предвид тие прегледи. Три години работев како лично обезбедување на актуелниот претседател на Владата, а 1,5 година го обезбедував Љубчо Георгиевски“ рече Спасов.

Тој вели дека ниту го познавал Мартин, ниту пак, дека имал намера и мотив да го убие. Спасов за време на убиството тврди дека бил работно ангажиран како и неговите колеги и дека сите наредби ги примал од старешината.

Иако, како што тврди, неговите колеги ги смениле брзо исказите, според него не е логично сите да биле на плоштад за „да шлапкаат раце на победата на ВМРО ДПММЕ“, а еден од нив и со службено возило.

„Првостепената пресуда е контрадикторна со основниот доказ со секциониот протокол. Јасно е наведено во првостепената пресуда дека го удирал со клоци и со рака, со боксови во пределот на главата. Секциониот протокол е тотално контрадикторен со диспозитивот на пресудата. Таму јасно  стои дека имало гребаници на надлактицата, имало гребаница на носот и скршеница на носната коска. Не постојат тие удари во секциониот протокол коишто се наведени во диспозитивот на пресудата. Тоа е основна, почетна контрадикторност на пресудата со доказите“ изјави адвокатот на Спасов, Ване Андреев.

Вишиот обвинител побара да се одбие нивната жалба во целост, бидејќи пресудата била јасна и законита.

На јавната расправа беше присутно и семејството на убиеното момче Мартин Нешковски. И тие очекуваат случајот да се врати на почеток.

„Да го вратат случајот од почеток и да ги инволвираат буквално сите. Да ги земат во предвид доказите кои судот не сакаше да ги прими и да ги погледне . Јасно се гледа дека од качувањето на бина на Груевски до моментот до кога Мартин е убиен, тој не бил во близина на бината. Го нема во радиус од 40, 50 метри. Униформираните полицајци кои биле активни цела вечер, гледале сè и и не направиле ништо“ изјави Александар Нешковски, братот на Мартин.

Сега ќе се чека одлуката на Апелацискиот суд./крај/фф