Црна хроника
Полицијата на дело фати крадци во Скопје

Кривична пријава е поднесена против лицата Н.Д. (48) И В.Ј. (34), двајцата од Скопје, кои биле начекани од полицијата на дело, како ограбуваат стан во центарот на Скопје.
Истражен судија на двајцата пријавени им одреди мерка притвор во траење од 30 денови.
Пријавените, делото го извршиле околу 3.30 часот во стан лоциран во центарот на градот на ул. „Васил Главинов“, каде што пристигнале со моторно возило „Форд Мондео“, сопственост и управувано од Н.Д.
Откако со ѕвонење по домофоните утврдиле дека во станот на Г.С. нема никој, со употреба на хебла и две метални шипки насилно ја отвориле влезната врата.
Влегле во станот, а во ходникот пронашле тениска торба во која го ставиле алатот, по што започнале со претурање и пребарување по станот.
Вревата што ја направиле при обивањето на вратата и со претурањето по станот ја чул сосед на оштетениот, кој телефонски го пријавил случајот во Центарот за информирање и команда.
Веднаш по дознавањето за случајот, со брза интервенција на полициски службеници од Единицата за спречување на уличен криминал, пријавените се затекнати на местото на настанот, каде се лишени од слобода и приведени во Полициската станица од општа надлежност Кисела Вода.
По извршениот разговор, утврдено е дека Н.Д. и В.Ј. се можни сторители на други кривични дела, за што по обезбедување на материјални докази и документирање, ќе следуваат соодветни поднесоци.
Инаку, пријавените уште како малолетници се регистрирани сторители на имотни деликти за што од надлежен суд им се изрекувани казни, малолетнички затвор, додека по стекнувањето на полнолетност покрај имотни деликти, сторители се и на деликти проследени со насилство, измами и фалсификување на исправи.
Притоа, за извршени кривични дела, вкупно против двајцата се поднесени 23 кривични пријави, за кои од надлежен суд им се изречувани соодветни затворски казни.
Покрај ова СВР-Скопје, со кривична пријава, до надлежното ОЈО за натамошна постапка, го предаде и лицето Ш.В. викан “Шапче“ (55) познат сторител на имотни деликти од Скопје, поради постоење основано сомневање дека минатата недела, односно во петокот (10.08.) извршил една “тешка кражба на особено дрзок начин“, при што се стекнал со противправна имотна корист од околу 7.000 денари.
Истражен судија на пријавениот му одреди мерка притвор во траење од петнаесет дена.
Имено, Ш.В. во продавницата „Рибопродукт“, лоцирана во кругот на Зелениот пазар, околу 11,45 часот, откако забележал дека вработената е сама влегол внатре ја турнал и од касата одзел 7.000 денари.
Вработената кривичното дело го пријавила во Полициската станица од општа надлежност Центар, каде и се покажани фотографии од познати сторители на кривични дела, при што оштетената со сигурност го посочи Ш.В., кој пак уште како малолетник е регистриран како деликвент за што од надлежен суд му е изречена казна малолетнички затвор, а откако станува полнолетен му се поднесени 91 кривична пријава, за што од страна надлежни судови му се изрекувани 49 решенија за издржување казна затвор, од кои Ш.В. издржал затворска казна од 14 месеци./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Запленета поголема количина брендирана стока без документација, лишено од слобода едно лице

Полицијата заплени поголема количина брендирана стока без соодветна документација и приведе едно лице, соопшти Министерството за внатрешни работи.
„На 01.08.2025 околу 20:00 часот на наплатна рампа Романовце, на автопатот Скопје-Куманово од страна на полициски службеници од Мобилната единица за компезаторни мерки при ОГРМ, бил лишен од слобода Д.Ц. (30) од Крива Паланка, затоа што при преглед на возилото „ауди“, кое тој го управувал, пронајдена е поголема количина на брендирана стока, без соодветна документација. По документирање на случајот, против Д.Ц. ќе биде поднесена кривична пријава по чл 285 ст.1 од КЗ“, стои во известувањето од МВР.
Топ
Браќа од Струшко нападнале семејство во возило во кое имало и деца, ја удирале жената со боксови и клоци

Основното јавно обвинителство Струга поведе постапка против две лица за кривично дело – Насилство.
Двајцата браќа, по потекло од струшко, а со привремено живеалиште во Швајцарија, на 30 јули на локалниот пат меѓу селата Горно Татеши и Добовјани, со автомобил со швајцарски регистарски ознаки го попречиле патот на струшко комбе во кое се превезувало семејство – маж, жена и две малолетни деца.
Веднаш започнале да се закануваат и агресивно да се однесуваат, излегле од автомобилот и се упатиле кон возачот на комбето. Со сила го повлекле подотвореното стакло на возачката врата и го скршиле. Парчиња од стаклото ја расекле по раката жената која излегла од комбето во обид да ја смири ситуацијата. Дополнително, осомничените и нанеле и телесни повреди со удари со боксови и клоци по главата и телото. Си заминале откако жената се заканила дека ќе повика полиција.
Поради опасност од бегство, особено имајќи предвид дека двајцата имаат привремено престојувалиште во странство, а исто така и поради ризикот и изложеноста на оштетеното семејство повторно да им биде загрозена сигурноста, јавниот обвинител до судијата на претходна постапка достави предлог за определување мерка притвор за осомничените браќа, со цел да го обезбеди нивното присуство во текот на постапката и да спречи повторување на насилството.
Црна хроника
Обвинение за шест лица за фалсификување пари

По спроведена истражна постапка, Основното јавно обвинителство за гонење на организиран криминал и корупција денеска поднесе обвинителен акт против шест лица за кои постои основано сомнение дека како злосторничка група, организирана од првоосомничениот, сториле кривични дела против јавните финансии, платниот промет и стопанството.
На пет лица им се става на товар кривичното дело Фалсификување пари, додека првообвинетиот и уште едно лице се обвинети и за кривично дело – Правење, набавување или отуѓување средства за фалсификување.
„Од крајот на 2023 година до февруари 2025 година првообвинетиот на територија на македонска и српска територија создал група на која припадници станале останатите обвинети – македонски државјани и шест српски државјани за кои постапката се води во РСрбија. Првообвинетиот неовластено набавил и држел опрема и материјали за правење на лажни банкноти – евра во апоени од 20, 50, 100 и 200 евра, кои припадниците на групата ги дистрибуирале до заинтересираните купувачи во РСрбија по цена од 25-30% од номиналната вредност на вистинските банкноти. Шестообвинетиот неовластено изработувал машини и делови за правење лажни пари и истите ги одржувал. Од јуни 2024 година до јануари 2025 година 114.150 лажни евра групата ги продала за 42.400 евра.
Со обвинителниот акт обвинителството бара и продолжување на мерката притвор.